لُوقَا 7 - كِتاب العَهد الجَّديد مِن الكِتاب المُقَدَّس

إيمان رَئيس الجّيش

¹ و لَمّا كَمَّل كُلّو كَلامو لِلنّاس القاعِدين يَسمَعوهو، دَخَل كَفْرَنَاحُوم.

² و رَئيس الجّيش كان عِندو خَدّام مَحبوب ليهو. و كان عَيّان قَريب لِلموت.

³ و لَمّا سِمِع عَن يَسُوع، رَسَّل شُيوخ اليَهود، و طَلَبو مِنّو يَجي يَشفي خَدّامو.

⁴ و لَمّا جو لِيَسُوع، سألوهو كَتير و قالو: ”هو بِستَحِق تَعمِل ليهو دا.

⁵ عَشان بِحِب الشَّعب بِتاعنا، و هو زاتو بَنى لينا بيت الرَّب.“

⁶ و يَسُوع مَشى مَعاهُم. و لَمّا ما كان بَعيد مِن البيت، رَئيس الجّيش رَسَّل ليهو أصحابو يَقول ليهو: ”يا رَب، ما تَتَعِّب نَفسَك، عَشان أنا ما بَستَحِق إنتَ تَدخُل بيتي.

⁷ و عَشان كِدا، ما حَسبتَ نَفسي مُستَحِق أجي ليك. و لَكِن قول كِلمَه و خَدّامي يَكون طَيب.

⁸ عَشان أنا كَمان راجِل تِحِت السُّلطَه، و عِندي عَساكِر تِحِت إيدي. أقول لِدا: أمشي، و يَمشي. و لِتاني: تَعال، و يَجي. و لِخَدّامي: أعمِل دا، و يَعمِلو.“

⁹ و لَمّا يَسُوع سِمِع الكِلمات دي، إتعَجَّب مِنّو و إتلَفَت لِلنّاس التِبِعوهو و قال: ”أقول ليكُم، أنا ما لِقيت و لا في إِسْرَائِيل إيمان قَدُر دا.“

¹⁰ و وَكِت ما رَجَعو المُرَسَّلين لِلبيت، لِقو الخَدّام بِقى طَيب.

يَسُوع يَقَوِّم وَلَد الأرمَلَه

¹¹ و حَصَل بَعَد اليوم دا إنّو مَشى لِمَدينَه إسِما نَايِين. و تَلاميذو و ناس كُتار مَشو مَعاهو.

¹² و لَمّا قَرَّب لِباب البَلَد، شوف، كان في ناس شايلين زول مَيِّت، و هو وَلَد وَحيد عِند أُمّو. و هي أرمَلَه. و مَعاها ناس كُتار مِن البَلَد.

¹³ و لَمّا شافا، الرَّب كان عِندو رَحمَه ليها و قال ليها: ”ما تَبكي.“

¹⁴ و قَرَّب و لَمَس العَنقَرِيب، و الشايلينو وَقَفو. و يَسُوع قال: ”يا شاب، أقول ليك، قوم!“

¹⁵ و الكان مَيِّت قَنَّب و إبتَدا يتكَلَّم، و يَسُوع سَلَّمو لِأُمّو.

¹⁶ و الخوف مَسَك كُلَّهُم، و هُم مَجَّدو الله و قالو: ”نَبي عَظيم قام في وَسِطنا!“ و ”الله جا عَشان يَساعِد شَعبو.“

¹⁷ و الخَبَر دا مَشى في كُل اليَهُودِيَّه و في كُل البِلاد القَريبَه مِنّو.

يَسُوع و يُوحَنَّا المَعمَدان

¹⁸ و تَلاميذ يُوحَنَّا كَلَّموهو عَن الحاجات دي كُلَّها.

¹⁹ و يُوحَنَّا نادى إتنين مِن تَلاميذو، و رَسَّلُم لِيَسُوع و قال: ”إنتَ هو الجّاي؟ ولّا نَنتَظِر واحِد غيرَك؟“

²⁰ و لَمّا جو ليهو الراجلين، قالو: ”يُوحَنَّا المَعمَدان رَسَّلنا ليك عَشان يَسأل: ’إنتَ هو الجّاي ولّا نَنتَظِر واحِد غيرَك؟“

²¹ و في السّاعَه ديك شَفى ناس كُتار مِن أمراضُم، و عَياهُم، و مِن أرواح شَرّيرَه. و فَتَح عُيون عَميانين كُتار.

²² و رَدَّ و قال ليهُم: ”أمشو و خَبِّرو يُوحَنَّا بِالحاجات الشُّفتوها و سِمِعتوها. العَميانين بِشوفو، و العُرُج بِمشو، و المُجَزَّمين بِتنَضَّفو، و الطُرُش بِسمَعو، و المَيِّتين بِقومو، و المَساكين بِبَشِّرو ليهُم.

²³ و مُبارَك الما يَقَع عَلَشانّي.“

²⁴ و بَعَد ما مَراسيل يُوحَنَّا مَشو، هو بِقى يَقول لِلنّاس عَن يُوحَنَّا: ”طَلَعتو في الخَلا تَعاينو في شِنو؟ قَش بِتهِزّو الهَبوب؟

²⁵ ولّا طَلَعتو تَشوفو شِنو؟ زول لابِس هِدوم سَمِح؟ شوف! اللابسين الهِدوم الجَّميل و البِعيشو زي الغَنيين، هُم في سَرايات المُلوك.

²⁶ و لَكِن طَلَعتو تَشوفو شِنو؟ نَبي؟ أيوَه، أقول ليكُم، و أحسَن مِن نَبي.

²⁷ دا هو المَكتوب عَنّو، شوف! أرَسِّل مَراسيل قِدَّامَك، اليَحَضِّر ليك طَريقَك قِدَّامَك.

²⁸ و أقول ليكُم إنّو ما في زول مِن المَولودين مِن النِّسوان أكبَر مِن يُوحَنَّا. و لَكِن الأصغَر في مَلَكوت الله أكبَر مِنّو.“

²⁹ و النّاس كُلُّهُم و البِلِمّو الضَّريبَه، لَمّا سِمِعو، شِهِدو لِعَدل الله. و هُم كانو مِتعَمِّدين بِمَعموديَّة يُوحَنَّا.

³⁰ و لَكِن الفَرِّيسِيِّين و مُعَلِّمين القانون رَفَضو إرادَة الله فِشانُم، و يُوحَنَّا ما عَمَّدُم.

³¹ ”ناس الزَّمَن هُم زي شِنو؟ و يَشبَهو مِنو؟

³² هُم زي أولاد قاعِدين في السّوق و بِنادو بَعضَهُم لِبَعض و يَقولو: غَنّينا ليكُم و ما رَقَصتو، و بَكينا ليكُم و ما بَكيتو.

³³ عَشان يُوحَنَّا المَعمَدان جا ما ياكُل عيش و لا يَشرَب خَمر. و إنتو بِتقولو: عِندو شيطان.

³⁴ إبن الإنسان جا ياكُل و يَشرَب، و إنتو بِتقولو: شوف! دا راجِل بياكُل كَتير و شَرّاب خَمر، و بِحِب البِلِمّو الضَّريبَه و الخاطيين.

³⁵ و الحِكمَه تَوَرّي عَديله بِكُلّو أولادا.“

مَسحَة يَسُوع

³⁶ و طَلَب مِنّو واحِد مِن الفَرِّيسِيِّين عَشان ياكُل مَعاهو. و دَخَل بيت الفرِّيسي، و قَعَد ياكُل.

³⁷ و شوف، مَرَه كانَت في البَلَد، و هي خَاطيَه. و لَمّا عِرفَت إنّو قاعِد في بيت الفرِّيسي، جابَت قِزازَه فيها ريحَه.

³⁸ و وَقَفَت وَراهو عِند كِرعينو تَبكي. و بِقَت تَغَسِّل كِرعينو بِالدِّموع. و كانَت تَمسَحُم بِشَعَر راسا، و تَقَبِّل كِرعينو و تَدهِنُم بِالرِّيحَه.

³⁹ و لَمّا شاف كِدا، الفرِّيسي الناداهو قال في نَفسو: ”الرّاجِل دا إذا نَبي كان عِرِف مِنو المَرَه دي، و مِنو هي البِتَلمَسو إنَّها خَاطيَه.“

⁴⁰ و رَدَّ يَسُوع و قال ليهو: ”يا سِمْعَان، عِندي حاجَه أقولا ليك.“ و قال: ”قول، يا مُعَلِّم.“

⁴¹ ”كان في زول، مَديونين ليهو راجلين، واحِد عَليهو خُمسُميَّه جِنيه، و التّاني خَمسين.

⁴² و لَمّا ما كان يَقدَرو يَدفَعوها، غَفَر ليهُم الإتنين. و عَلى كِدا، مِنو فيهُم بِحِبّو أكتَر؟“

⁴³ و رَدَّ سِمْعَان و قال: ”أظِن الغَفَر ليهو أكتَر.“ و قال ليهو: ”حَكَمتَ بِالحَق.“

⁴⁴ و إتلَفَت لِلمَرَه و قال لِسِمْعَان: ”شايف المَرَه دي؟ أنا دَخَلتَ بيتَك، و إنتَ ما أدّيتني مويَه لِكِرعيني، لَكِن هي بِدِموعا، غَسَّلَت كِرعيني، و مَسَحَتُم بِشَعَر راسا.

⁴⁵ و إنتَ ما سَلَّمتَ عَلي، لَكِن هي مِن وَكِت ما دَخَلَت، ما بَطَلَت تَقَبِّل كِرعيني.

⁴⁶ و إنتَ ما مَسَحتَ رَاسي بِالزِيت، لَكِن هي مَسَحَت كِرعيني بِالرِّيحَه.

⁴⁷ و عَلى كِدا، أقول ليك، إتغَفَرَت ليها خَطاياها الكَتيرَه، عَشان حَبَّت كَتير. و اليِتغَفَر ليهو قَليل، يَحِب قَليل.“

⁴⁸ و قال ليها: ”إتغَفَرَت ليكي خَطاياكي.“

⁴⁹ و المَعزومين مَعاهو إبتَدو يَقولو في نُفوسُم: ”مِنو دا البِغفِر الخَطايا كَمان؟“

⁵⁰ و يَسُوع قال لِلمَرَه: ”إيمانِك خَلَّصِك. أمشي بِالسَّلام.“