لُوقَا 6 - كِتاب العَهد الجَّديد مِن الكِتاب المُقَدَّس

رَب السَّبِت

¹ و حَصَل في سَبِت تاني إنّو فات في وَسط الزِّراعَه. و كانو تَلاميذو يَقطَعو راس الدُّرَه و يَفرُكوها بِإيديهُم، و ياكلوها.

² و بَعَد الفَرِّيسِيِّين قالو ليهُم: ”لِشِنو بِتَعمِلو الشّي الما بِالقانون في يوم السَّبِت؟“

³ و رَدَّ يَسُوع و قال ليهُم: ”ما قَريتو العَمَلو دَاوُد لَمّا كان جَعان، هو و الكانو مَعاهو؟

⁴ هو دَخَل بيت الله و أخَد و أكَل الرَّغِفان المُقَدَّسَه، و أدّا لِلمَعاهو كَمان. هو أكَل الما بِالقانون أن ياكلو إلّا لِلقُسُس بَس.“

⁵ و قال ليهُم: ”إبن الإنسان هو رَب السَّبِت.“

⁶ و حَصَل في سَبِت تاني، دَخَل بيت الرَّب و كان يَعَلِّم. و كان في زول هِناك إيدو اليَمين يابسَه.

⁷ و كانو مُعَلِّمين القانون و الفَرّيسيّين يَعاينو ليهو عَشان يَشوفو إذا هو يَشفي في السَّبِت، عَشان يَلقو كيف يَشتَكوهو.

⁸ لَكِن هو عِرِف أفكارُم، و قال لِلرّاجِل الإِيدو يابسَه: ”قوم و قيف في الوَسِط.“ و هو قام و وَقَف.

⁹ و يَسُوع قال ليهُم: ”أسألكُم شي. بِالقانون يَعمِل عَمَل كوَيس في يوم السَّبِت ولّا عَمَل بَطّال؟ يَخَلِّص النَّفس ولّا يَكتُلو؟“

¹⁰ و عايَن ليهُم كُلَّهُم، و قال لِلرّاجِل: ”مِد إيدَك!“ و عَمَل كِدا. و إيدو بِقَت طَيبَه زي التّانيَه.

¹¹ لَكِن هُم كانو زَعلانين جِدّاً، و إتكَلَّمو بَعضَهُم لِبَعض بيَعمِلو شِنو بِيَسُوع.

الإتناشَر رَسول

¹² و حَصَل في الأيام ديل إنّو مَرَق في الجَّبَل عَشان يَصَلّي. و صَلّى طول اللّيل لِلَّه.

¹³ و لَمّا كان النَّهار، نادى تَلاميذو و إختار مِنَّهُم إتناشَر السَّمّاهُم كَمان رُسُل.

¹⁴ سِمْعَان السَّمَّاهو كَمان بُطْرُس، و أنْدَرَاوُس أخوهو، و يَعْقُوب و يُوحَنَّا، و فِيلُبُّس، و بَرْثُلَمَاوُس،

¹⁵ و مَتَّى، و تُومَا، و يَعْقُوب إبن حَلْفَى، و سِمْعَان البِسَمّوهو الغَيُور،

¹⁶ و يَهُوذَا إبن يَعْقُوب، و يَهُوذَا الإِسْخَرْيُوطِي البِقي خاين.

بَرَكات و مَصايب

¹⁷ و نَزَل مَعاهُم و وَقَف في مَكان وَصِف. و كانو مَعاهو جَمَع كَتير مِن تَلاميذو و ناس كُتار مِن كُل اليَهُودِيَّه و أُورُشَلِيم و جَمب صُور و صَيدا. و هُم جو عَشان يَسمَعوهو و عَشانو يَشفيهُم مِن أمراضُم.

¹⁸ و التَّعبانين مِن الشياطين، هو شَفاهُم.

¹⁹ و كُل النّاس جَرَّبو يَلمَسوهو، عَشان قُدرَه كانَت بِتَمرُق مِنّو و كان يَشفيهُم كُلَّهُم.

²⁰ و رَفَع عُيونو لِتَلاميذو و قال: ”مُبارَكين، يا مَساكين، عَشان ليكُم مَلَكوت الله.

²¹ مُبارَكين، يا جَعانين هَسَّع، عَشان بِتَشبَعو. مُبارَكين، يا البِتَبكو هَسَّع، عَشان بِتَضحَكو.

²² مُبارَكين لَمّا النّاس بِكرَهوكُم، و ما بِقعُدو مَعاكُم و بِشتِموكُم، و بِطَلِّعو عَليكُم إسم بَطّال عَشان إبن الإنسان.

²³ كونو فَرحانين في اليوم داك، و نُطّو مِن السُرور. شوف! أُجرَتكُم كَبير في السَّما. عَشان أبَهاتُم عَمَلو كِدا بِالأنبياء.

²⁴ و لَكِن، مُصيبَه ليكُم، يا غَنيين، عَشان أخَدتو راحَتكُم.

²⁵ مُصيبَه ليكُم، يا الشَبعانين هَسَّع، عَشان تَبقو جَعانين. مُصيبَه ليكُم، إنتو البِتَضحَكو هَسَّع، عَشان بِتَحزَنو و تَبكو.

²⁶ مُصيبَه ليكُم، إذا كُل النّاس يَقولو فيكُم كَلام كوَيس، عَشان أبَهاتُم عَمَلو كِدا بِالأنبياء الكَضّابين.

مَحَبَّه لِلعُدوان

²⁷ لَكِن أقول ليكُم، يا ناس السامِعين. حِبّو عُدوانكُم. و أعمِلو كوَيس لِلنّاس البِكرَهوكُم.

²⁸ و بارِكو البِقولو عَليكُم لَعنَه. و صَلّو عَشان اليَعمِلو حاجَه بَطّالَه ليكُم.

²⁹ اليَضرُبَك عَلى جَمب واحِد مِن وَشَّك، أقلِب ليهو التّاني كَمان. و الياخُد بَدَلَك، ما تابا تَدّيهو قَميصَك كَمان.

³⁰ و كُلّو واحِد اليَطلُب مِنَّك، أدّيهو. و الياخُد مالَك، ما تَطلُبو مِنّو تاني.

³¹ و زي ما إنتو عاوِزين النّاس يَعمِلو بيكُم، أعمِلو إنتو بيهُم كِدا.

³² و إذا بِتحِبّو النّاس البِحِبّوكُم، الفايدَه ليكُم شِنو؟ عَشان الخاطيين كَمان بِحِبّو النّاس البِحِبّوهُم.

³³ و إذا تَعمِلو الخير لِلبيَعمِلو ليكُم الخير، الفايدَه ليكُم شِنو؟ عَشان الخاطيين كَمان بيَعمِلو زي دا.

³⁴ و إذا تَدّو سُلفَه عَلَشان تاخدو مِنَّهُم مَرَّه تانيَه، الفايدَه ليكُم شِنو؟ عَشان الخاطيين بِدّو سُلفَه لِلخاطيين، عَشان ياخدو مِنَّهُم زيهو.

³⁵ لَكِن حِبّو عُدوانكُم، و أعمِلو الخير ليهُم و أدّو سُلفَه، و ما تَنتَظِرو حاجَه. و أُجرَتكُم تَكون كَبيرَه، و إنتو تَكونو أولاد الله العالي. عَشان هو عِندو نِعمَه لِلما يَشكُروهو و الشَّرّيرين.

³⁶ كونو مَليانين رَحمَه زي ما أبوكُم كَمان رَحيم.

حُكم عَلى التّانيين

³⁷ و ما تَحكُمو عَلى زول، عَشان إنتو ما بِتكونو مَحكومين. ما تَلَوِّمو، عَشان ما بِتكونو مَلَوِّمين. أغفِرو، و يِتغَفَر ليكُم.

³⁸ أدّو، و بِدّوكُم. كيله كوَيسَه، مَوَزَّنَه تَمام، مَحظوظَه، مَليانَه، يَدُّوكُم في إيدينكُم. عَشان الكيلَه الإنتو تَدّوها، بِتكون الكيلَه الهُم بِدّوكُم.“

³⁹ و عَلَّمُم بِمَثَل. ”العَميان يَقدَر يَقود عَميان زيهو؟ هُم الإتنين ما بِيَقَعو في حُفرَه؟

⁴⁰ التِّلميذ ما أحسَن مِن مُعَلِّمو. و لَكِن كُل اليَبقى كامِل يَكون زي مُعَلِّمو.

⁴¹ لِشِنو بِتعاين لِلحاجَه الصَّغَيرَه الفي عين أخوك، و ما بِتشوف الحاجَه الكَبيرَه الفي عينَك؟

⁴² و كيف تَقدَر تَقول لِأخوك: يا أخي، خَلّيني أطَلِّع الشّي الصَّغَير الفي عينَك، و إنتَ ما بِتشوف الشّي الكَبير الفي عينَك؟ يا مُنافَق! في الأوَّل طَلِّع الشّي الكَبير مِن عينَك، و بَعدين تَقدَر تَشوف كوَيس عَشان تَطَلِّع الشّي الصَّغَير مِن عين أخوك.

⁴³ عَشان ما في شَجَرَه سَمحَه بِتَلِد ثِمار بَطّال، و لا في شَجَرَه بَطّالَه بِتَلِد ثِمار سَمِح.

⁴⁴ عَشان كُلّو شَجَرَه مَعروفَه بِالثَّمار بِتِاعا. و النّاس ما يَلِمّو تين مِن شَجَر الشّوك، ولّا يَلِمّو عِنَب مِن شَجَر الغابَه.

⁴⁵ الزّول الصّالِح مِن كَنز قَلبو الصّالِح يَطَلِّع حاجات صالحَه. و الزّول الشَّرّير مِن كَنز قَلبو الشَرِّير يَطَلِّع حاجات شَرّيرَه. عَشان مِن الكِترَت الفي قَلبو، خَشمو بِتكَلَّم.

البَنّايين الشّاطرين و البَليدين

⁴⁶ و لِشِنو بِتسَمّوني: ’يا رَب، يا رَب‘ و ما بِتَعمِلو البَقولو.

⁴⁷ كُل البِجيني و بِسمَع كَلامي و بيَعمِل بيهو، أوَرِّيكُم هو زي مِنو.

⁴⁸ هو مِثِل زول بِبني بيت، و بِحفِر تِحِت و بِخُت الأساس عَلى الحَجَر. و لَمّا المويَه مَلَت الأرض، و المويَه ضَرَبَت عَلى البيت داك، ما قِدِر تَهِزّو، عَشان كان أساسو عَلى الحَجَر.

⁴⁹ و لَكِن البِسمَع و ما بيَعمِل، هو زي زول بَنى بيتو عَلى الأرض بِدون أساس. و المويَه ضَرَبَت عَلى البيت، و طَوّالي البيت وَقَع. و كان خَراب البيت داك كَبير.“