لُوقَا 5 - كِتاب العَهد الجَّديد مِن الكِتاب المُقَدَّس

إختِيار التَّلاميذ في الأوَّل

¹ و وَكِت ما النّاس إتلَمّو ليهو و سِمِعو كِلمَة الله، هو كان واقِف عِند بَحَر جَنِّيسَارَت.

² و شاف مُركَبين واقفين عِند البَحَر، و لَكِن الصَّيادين كانو طَلَعو مِنَّها و كانو يَغَسِّلو شَبَكاتُم.

³ و دَخَل في واحدَه مِن المُركَبين الكانَت لِسِمْعَان. و قال ليهو: ”خَلّينا نَطلَع شوَيَه مِن الطَّرف.“ و قَعَد و إبتَدا يَعَلِّم النّاس مِن المُركَب.

⁴ و لَمّا كَمَّل الكَلام، قال لِسِمْعَان: ”أمشو لِمَحَل غَريق، و نَزِّلو شَبَكاتكُم لِلصّيد!“

⁵ و سِمْعَان رَدَّ و قال: ”يا مُعَلِّم، تِعِبنا طول اللّيل و ما لِقينا حاجَه. لَكِن عَلى كَلامَك، بَنَزِّل الشَّبَكات.“

⁶ و لَمّا عَمَلو كِدا، مَسَكو سَمَك كَتير خالِص، و شَبَكاتُم بَدو تِتقَطَّعو.

⁷ و نادو بِإيدينُم لِشُرَكاهُم الفي المُركَب التّانيَه عَشان يَجو و يَساعِدوهُم. و جو و مَلو المُركَبين لِغايَة ما إبتَدو يدخُلو تِحِت في المويَه.

⁸ و سِمْعَان بُطْرُس لَمّا شاف كِدا، رَكَع عِند رُكبَتين يَسُوع و قال: ”أمشي، يا رَب، عَشان أنا راجِل خاطي.“

⁹ عَشان هو إستَغرَب، و كُل الكانو مَعاهو، بِسَبَب السَّمَك الأخَدوهو.

¹⁰ و كَمان حَصَل كِدا لِيَعْقُوب و يُوحَنَّا، أولاد زَبَدي، الكانو شُرَكاء سِمْعَان. و يَسُوع قال لِسِمْعَان: ”ما تَخاف! مِن هَسَّع بَتَبقى صَياد النّاس.“

¹¹ و لَمّا جو بِالمُركَبين لِلطَّرف، خَلّو كُلّو شي و تِبِعوهو.

الرّاجِل العِندو جِزام

¹² و في الوَكِت لَمّا هو كان في بَلَد مِن البِلاد، راجِل جِسمو مَليان بِالجِّزام جا. و لَمّا شاف يَسُوع، وَقَع عَلى وَشّو و طَلَب مِنّو و قال: ”يا سَيِّد، إذا إنتَ داير، تَقدَر تَنَضِّفني.“

¹³ و مَدَّ إيدو و لِمِسو و قال: ”أنا داير. كون نَضيف!“ و طَوّالي الجِّزام مَرَق مِنّو.

¹⁴ و أمَرو: ”ما تَقول لِزول. لَكِن أمشي و وَرّي نَفسَك لِلقَسّيس، و قَدِّم عَشان نَضافتَك زي ما أمَر مُوسَى شَهادَه ليهُم.“

¹⁵ و لَكِن الخَبَر عَنّو طَلَع أكتَر. و جُموع كَتيرَه أجتَمَعو ليهو عَشان يَسمَعو، و عَشانو يَشفيهُم مِن أمراضُم.

¹⁶ و لَكِن هو كان يَمشي بَراهو في الخَلا و يَصَلّي.

يَسُوع يَشفي المَفلوج

¹⁷ و في يوم مِن الأيام كان يَعَلِّم. و كانو فَرّيسيِّين و مُعَلِّمين القانون قاعِدين، و هُم جو مِن كُلّو حِلَّه مِن الجَّليل و اليَهُودِيَّه و أُورُشَلِيم. و قُدرَة الرَّب كانَت مَعاهو عَشان يَشفيهُم.

¹⁸ و شوف! جو رُجال شايلين عَلى فَرشَتو زول كان مَفلوج. و جَرَّبو يَدَخِّلوهو و يَخُتّوهو قِدّامو.

¹⁹ و لَمّا ما لِقو طَريق يدخُلو بيهو بِسَبَب النّاس، طَلَعو فوق البيت و نَزَّلوهو بِفَرشَتو مِن بين الطوب لِلوَسط قِدّام يَسُوع.

²⁰ و لَمّا شاف إيمانُم، قال لِلرّاجِل: ”يا زول، خَطاياك مَغفورَه ليك.“

²¹ و مُعَلِّمين القانون و الفَرّيسيّين بِقو يَفَكِّرو و يَقولو: ”مِنو دا البِتكَلَّم بِشَتيمَه؟ مِنو يَقدَر يَغفِر الخَطايا إلّا الله واحدو؟“

²² و يَسُوع، لَمّا عِرِف أفكارُم، رَدَّ و قال ليهُم: ”لِشِنو بِتفَكَّرو بِدا في قُلوبكُم؟

²³ ياتو أسهَل، بَقول ليهو: خَطاياك مَغفورَه ليك؟ ولّا بَقول ليهو: قوم و أمشي؟

²⁴ و لَكِن عَشان تَعرِفو إبن الإنسان عِندو قُدرَه عَلى الأرض أن يَغفِر الخَطايا،“ قال لِلمَفلوج: ”أقول ليك، قوم، و شيل فَرشَتَك، و أمشي لِبيتَك!“

²⁵ و طَوّالي، قام قِدّامو، و شال الشّي الكان راقِد عَليهو. و مَشى لِبيتو و هو يَحمِد الله.

²⁶ و كُلَّهُم إتعَجَّبو و حَمَدو الله، و كانو خايفين جِدّاً و قالو: ”شُفنا حاجات عَجيبَه النَّهار دا.“

إختِيار لَاوِي

²⁷ و بَعَد دا، مَرَق و شاف واحِد بِلِم الضَّريبَه، إسمو لَاوِي، قاعِد في مَكانو. و قال ليهو: ”أتبَعني.“

²⁸ و هو خَلّى كُلّو شي، و قام و تِبعو.

²⁹ و لَاوِي سَوّا ليهو عَزومَه كَبيرَه في بيتو. و جَماعَه كَتيرَه مِن البِلِمّو الضَّريبَه و غيرُم كانو قاعِدين مَعاهو.

³⁰ و الفَرّيسيّين و مُعَلِّمين القانون نَقنَقو عَلى تَلاميذو و قالو: ”لِشِنو بِتاكلو و بِتَشرَبو مَعَ البِلِمّو الضَّريبَه و الخاطيين؟“

³¹ و رَدَّ يَسُوع و قال ليهُم: ”الشُّداد ما يَحتاجو الحَكيم، لَكِن العَيّانين.

³² أنا ما جيت عَشان أنادي الطَّيبين لِلتّوبَه، لَكِن الخاطيين.“

عَن الصّوم

³³ و قالو ليهو: ”تَلاميذ يُوحَنَّا بِصومو كَتير و بِصَلّو. و كِدا كَمان تَلاميذ الفَرِّيسِيِّين. و لَكِن تَلاميذَك بياكلو و بِشرَبو.“

³⁴ و يَسُوع قال ليهُم: ”تَقدَرو تَعمِلو ناس العِرِس يَصومو ما دام العَريس مَعاهُم؟

³⁵ و لَكِن الأيام بِتَجي لَمّا ياخُدو العَريس مِنَّهُم. في الأيام ديك بِصومو.“

³⁶ و كَمان عَلَّمُم مَثَل. ”ما في زول بِخُت حِتَّه مِن توب جَديد عَلى توب قَديم. و إلّا الجَديد يِتشَرَّط و الحِتَّه القَديمَه و الجَديدَه ما بِمشو سَوا.

³⁷ و ما في زول بِخُت خَمرَه جَديدَه في بُرمَه قَديمَه، عَشان الخَمرَه الجَديدَه تَكسِر البُرمَه و تِتدَفَّق، و البُرمَه تَخسَر.

³⁸ لَكِن الخَمرَه الجَديدَه لازِم يَخُتّوها في البُرمَه الجَديدَه.

³⁹ و ما في زول إذا شِرِب القَديمَه بِدور الجَديدَه، عَشان هو يَقول: القَديمَه أحسَن.“