لُوقَا 4 - كِتاب العَهد الجَّديد مِن الكِتاب المُقَدَّس

تَجَارِب يَسُوع

¹ و رَجَع يَسُوع مِن الأُرْدُنّ مَليان بِالرّوح القُدُس. و كان الرّوح يَقودو في الخَلا أربَعين يوم.

² و إبْلِيس كان يَجَرِّبو. و ما أكَل حاجَه في الأيام ديك. و لَمّا تَمَّت المُدَّه، جَاع.

³ و إبْلِيس قال ليهو: ”إذا إنتَ إبن الله، قول لِلحَجَر دا عَشان يَبقى عيش.“

⁴ و يَسُوع رَدَّ عَليهو: ”مَكتوب إنّو الإنسان ما يَعيش بِالعيش بَس.“

⁵ و بَعدين إبْلِيس طَلَعو لِمَحَل عالي، و وَرّاهو مَمالِك الدُّنيا كُلَّها في دَقيقَه واحدَه.

⁶ و قال ليهو: ”بَدّيك السُّلطَه دي كُلَّها و مَجد المَمالِك، عَشان كان مُسَلَّم لَي، و أدِيها لِلأنا عاوِز.

⁷ و عَلى كِدا إن كُنتَ تَعبُدني، كُلّو شي يَكون بِتاعَك.“

⁸ و يَسُوع رَدَّ و قال ليهو: ”مَكتوب: لازِم تَعبُد الرَّب إلَهَك، و تَخدِمو واحدو.“

⁹ و جابو لِأُورُشَلِيم و وَقَّفو فوق طَرف الهيكَل و قال ليهو: ”إذا إنتَ إبن الله، أرمي نَفسَك مِن هِنا لِتِحِت.

¹⁰ عَشان مَكتوب: بِيأمُر مَلائكَتو بيك عَشان يَحفَظُوك.

¹¹ و، بِشيلوك عَلى إيدينُم عَشان رِجلَك ما تَدُق حَجَر.“

¹² و يَسُوع رَدَّ و قال ليهو: ”مَكتوب: ما تَجَرِّب الرَّب إلَهَك.“

¹³ و لَمّا تَمَّ إبْلِيس كُلّو تَجرِبَه، خَلّاهو لِمُدَّه.

¹⁴ و رَجَع يَسُوع بِقُدرَة الرّوح لِلجَّليل، و الخَبَر عَنّو مَشى في كُل المَحَلّات الجَّمبو.

¹⁵ و كان يَعَلِّم في بِيوت الرَّب. و كُل النّاس كانو يَمَجِّدوهو.

¹⁶ و جا لِلنّاصِرَه الإترَبى فيها. و زي عادَتو دَخَل بيت الرَّب يوم السَّبِت. و قام عَشان يَقرا.

¹⁷ و قَدَّمو ليهو كِتاب إِشَعْيَاء النَّبي. و فَتَح الكِتاب، و لِقى المَحَل الكان مَكتوب فيهو:

¹⁸ ”روح الله عَلي، عَلَشانو مَسَحني فِشان أبَشِّر المَساكين. و رَسَّلني عَشان أنادي لِلمَحبوسين بِالحُرّيَّه، و لِلعَميانين عَشان يَشوفو، و بِالحُرّيَّه لِلقُلوبُم مَكسورَه

¹⁹ و عَشان بَبَشِّر بِسَنَة الرَّب المَقبولَه.“

²⁰ و قَفَل الكِتاب، و أدّاهو لِلخَدّام، و قَعَد. و كُل النّاس الكانو في بيت الرَّب كانو يَعاينو ليهو.

²¹ و إبتَدا يَقول ليهُم: ”النَّهار دا، تَمَّ المَكتوب زي ما سِمِعتو بِإضنينكُم.“

²² و كُلُّهُم كانو يَشهَدو ليهو، و يِتعَجَّبو مِن كَلام النِّعمَه الطَّلَع مِن خَشمو. و قالو: ”ما هو وَلَد يُوسِف؟“

²³ و قال ليهُم: ”عَلى كُلّو حال تَقولو لَي المَثَل دا: يا حَكيم، أشفي نَفسَك. سِمِعنا كَتير عَن الحَصَل في كَفْرَنَاحُوم. أعمِلا هِنا كَمان في بَلَدَك.“

²⁴ و قال: ”الحَق أقول ليكُم، ما في نَبي مَقبول في بَلَدو.

²⁵ و الحَق أقول ليكُم، كانو في أرامِل كُتار في إِسْرَائِيل في أيام إِيلِيَّا لَمّا ما كان في مَطَر مُدَّة تلاتَه سِنين و سِتَّه شُهور. و كان حَصَل جوع شَديد في الأرض كُلَّها.

²⁶ لَكِن الله ما رَسَّل إِيلِيَّا لِواحدَه مِنَّهُم إلّا لِمَرَه كانَت أرمَلَه في صَرفَه في بَلَد صَيدا.

²⁷ و كانو مُجَزَّمين كُتار في إِسْرَائِيل في زَمَن أَلِيشَع النَّبي. و لا واحِد بِقى نَضيف إلّا نِعْمَان السّوري.“

²⁸ و كُل الكانو في بيت الرَّب لَمّا سِمِعو دا إتمَلو بِالزَّعل.

²⁹ و قامو و طَرَدوهو مِن المَدينَه، و أخَدوهو لِطَرف الجَّبَل، الكانَت مَدينَتُم مَبنيَه عَليهو، عَشان يَرموهو لِتِحِت.

³⁰ لَكِن هو مَرَّ في وَسِطُم و فات.

³¹ و نَزَل في كَفْرَنَاحُوم، مَدينَه في الجَّليل. و كان يَعَلِّمُم كُلّو يوم السَّبِت.

³² و إتعَجَّبو مِن تَعليمو، عَشان كَلامو كان بِسُلطَه.

³³ و كان في بيت الرَّب راجِل فيهو روح نَجِس. و كورَك بِصوت عالي،

³⁴ ”آه! مالنا و مالَك، يا يَسُوع النّاصِري؟ إنتَ جيت عَشان تَخرِبنا؟ أنا عارفَك مِنو إنتَ. إنتَ قُدّوس الله.“

³⁵ و يَسُوع وَبَّخو و قال: ”أسكُت، و أمرُق مِنّو!“ و بَعَد ما الشّيطان رَماهو في الوَسِط، طَلَع مِنّو بِدون ما يَجرَحو.

³⁶ و كُلَّهُم إتعَجَّبو، و إتكَلَّمو بَعضَهُم لِبَعض و قالو: ”الكَلام دا شِنو؟ عَشان بِسُلطَه و قُدرَه يأمُر الأرواح النَّجسَه، و هُم يَمرُقو.“

³⁷ و الخَبَر عَنّو مَشى في كُلّو مَكان قَريب.

يَسُوع يَشفي ناس كُتار

³⁸ و قام مِن بيت الرَّب، و دَخَل بيت سِمْعَان. و كانَت أُم مَرَة سِمْعَان عِندَها حُمَّه شَديدَه. و سألوهو فِشانّا.

³⁹ و وَقَف قِدّاما و وَبَّخ الحُمَّه، و الحُمَّه فاتَت مِنَّها. و طَوّالي هي قامَت و إشتَغَلَت.

⁴⁰ و في وَكِت المَغرِب، كُل الكانو مَرضانين بِأمراض مُختَلِفَه جابوهُم ليهو. و خَتَّ إيدينو عَلى كُلّو واحِد مِنَّهُم و شَفاهُم.

⁴¹ و كَمان شياطين مَرَقو مِن كُتار مِنَّهُم و كورَكو و قالو: ”إنتَ إبن الله.“ و وَبَّخُم و ما خَلّاهُم يِتكَلَمو، عَشان عِرفوهو هو المَسيح.

⁴² و لَمّا جا النَّهار، مَرَق و مَشى لِلخَلا. و النّاس كانو يَفَتِّشو عَليهو. و جو ليهو، و مَسَكوهو عَشان ما يَفوت مِنَّهُم.

⁴³ و قال ليهُم: ”أنا لازِم أبَشِّر بِمَلَكوت الله لِلمُدُن التّانيَه كَمان، عَشان كِدا الله رَسَّلني.“

⁴⁴ و كان بِبَشِّر في بِيوت الرَّب في اليَهُودِيَّه.