لُوقَا 23 - كِتاب العَهد الجَّديد مِن الكِتاب المُقَدَّس

يَسُوع قِدّام بِيلاطُس و هِيرُودُس

¹ و كُل الجَّمَع قامو و جابوهو لِبِيلاطُس.

² و إبتَدو يَشتَكو عَليهو و يَقولو: ”لِقينا الرّاجِل دا يَخَرِّب الأُمَّه بِتاعَتنا، و يَمنَع أن يَدّي الضَّريبَه لِقَيصَر، و يَقول هو المَسيح و مَلِك.“

³ و بِيلاطُس سَألو و قال: ”إنتَ مَلِك اليَهود؟“ و هو رَدَّ عَليهو: ”إنتَ بِتقول.“

⁴ و بِيلاطُس قال لِلقُسُس الكُبار و النّاس: ”أنا ما لِقيت ذَنب في الإنسان دا.“

⁵ و لَكِن هُم كانو يَزيدو و يَقولو: ”دا يَحَرِّك النّاس، و بِعَلِّم في كُل اليَهُودِيَّه. و إبتَدا مِن الجَّليل و جا لِغايَة هِنا.“

⁶ و لَمّا بِيلاطُس سِمِع دا، سأل إذا كان الرّاجِل دا مِن الجَّليل.

⁷ و لَمّا عِرِف إنّو مِن سُلطَة هِيرُودُس، رَسَّلو لِهِيرُودُس الكان في أُورُشَلِيم في الوَكِت دا.

⁸ و هِيرُودُس، لَمّا شاف يَسُوع، كان مَبسوط جِدّاً، عَشان مِن زَمَن طَويل كان عاوِز يَشوفو، عَشان هو سِمِع عَنّو، و كان عِندو رَجاء يَشوفو يَعمِل عَلامَه.

⁹ و سَألو بِكَلام كَتير، لَكِن هو ما رَدَّ عَليهو كِلمَه.

¹⁰ و القُسُس الكُبار و مُعَلِّمين القانون وَقَفو، و إشتَكو عَليهو شَديد.

¹¹ و هِيرُودُس مَعَ العَساكِر بِتاعو ضِحِكو عَليهو، و شَتَموهو. و لَبَّسوهو هِدوم جَميل، و رَجَّعوهو لِبِيلاطُس.

¹² و هِيرُودُس و بِيلاطُس بِقو أصحاب مَعَ بَعض في اليوم داك. عَشان قُبّال دا هُم الإتنين كانو عُدوان.

¹³ و بِيلاطُس نادى القُسُس الكُبار و السَّلاطين و النّاس.

¹⁴ و قال ليهُم: ”جِبتو لَي الرّاجِل دا زي واحِد البِخَرِّب النّاس. شوفو! أنا جَرَّبتو قِدّامكُم، و ما لِقيت في الرّاجِل دا الغَلَط الإنتو بِتِشتَكو بيها عَليهو.

¹⁵ و لا هِيرُودُس كَمان، عَشان هو رَسَّلو لينا. و شوفو، هو ما عَمَل شي يِستَحِق الموت.

¹⁶ و عَلَشان كِدا أنا بَأدِّبو و بَفِكّو.“

¹⁷ و كان زي العادَه يَفِك ليهُم واحِد مَحبوس كُلّو عيد.

¹⁸ و كُلَّهُم كورَكو سَوا بِصوت واحِد و قالو: ”أمسِك الرّاجِل دا، و فِك لينا بَراباس.“

¹⁹ و الزّول دا كان إترَمى في السِّجِن عَشان هو عَمَل فِتنَه في المَدينَه، و كَتَل ناس.

²⁰ و بِيلاطُس كَلَّمُم تاني مَرَّه، عَشان كان عاوِز يَفِك يَسُوع.

²¹ و لَكِن كورَكو و قالو: ”أصلُبو، أصلُبو!“

²² و هو قال ليهُم مَرَّه تالتَه: ”لِشِنو؟ ياتو شَر عَمَلو الزّول دا؟ أنا ما لِقيت فيهو ذَنب يِستَحِق الموت. عَلَشان كِدا، أنا بَأدِّبو و بَفِكّو.“

²³ و لَكِن كانو يِستَمِرّو يَكورِكو بِأصوات عاليَه، و يَطلُبو أن يَصلُبوهو. و صوتُم غَلَب.

²⁴ و بِيلاطُس حَكَم زي ما النّاس طَلَبو.

²⁵ و فَكَّ ليهُم الزّول الكان إترَمى في السِّجِن بِسَبَب فِتنَه و كَتل، الهُم طَلَبو مِنّو يَفِكّو. و لَكِن سَلّم يَسُوع لِإرادَتُم.

يَسُوع عَلى الصَّليب

²⁶ و وَكِت ما ساقوهو، واحِد إسمو سِمْعَان مِن قيرَوان، كان جاي مِن الزِّراعَه. و خَتّو عَليهو الصَّليب عَشان يَشيلو وَرا يَسُوع.

²⁷ و جَمَع كَبير مِن النّاس مَشو وَراهو، و مَعاهُم النِّسوان الكانو يَبكو عَليهو مِن الحُزن.

²⁸ و يَسُوع إتلَفَت ليهُم و قال: ”يا بَنات أُورُشَلِيم، ما تَبكو فِشانّي، لَكِن أبكو فِشان نُفوسكُم و أولادكُم.

²⁹ عَشان شوفو، أيام جايَه بِتقولو فيها: مُبارَك العَواقِر، و البُطون الما وِلدَت، و الشُّطور الما رَضَّعَت.

³⁰ في الوَكِت دا، بِبتَدو يَقولو لِلجِّبال: أقَعو عَلينا، و لِلحُجار: غَطّينا.

³¹ و إذا عَمَلو كِدا لِلشَّجَرَه الخَضرَه، شِنو بِيَحصُل لِلشَّجَرَه اليابسَه؟“

³² و ساقو كَمان إتنين مُذنِبين تانيين عَشان يَكتُلوهُم مَعاهو.

³³ و لَمّا جو لِلمَحَل الإسمو جُمجُمَه، صَلَبوهو هِناك و الأتنين مُذنِبين، واحِد عَلى يَمينو و التّاني عَلى شِمالو.

³⁴ و يَسُوع قال: ”يا أبوي، أغفِر ليهُم، عَشان هُم ما عارِفين شِنو العَمَلوهو.“ و وَكِت هُم قَسَمو هِدومو، رَمو عَليهو القُرعَه.

³⁵ و النّاس كانو واقفين و يَعاينو فيهو. و الرّؤساء كَمان كانو بِضحَكو عَليهو و قالو: ”هو خَلَّص تانيين، خَليهو يَخَلِّص نَفسو إذا هو المَسيح، مُختار الله.“

³⁶ و العَساكِر كَمان ضِحِكو عَليهو، و جو و قَدَّمو ليهو خَل.

³⁷ و قالو: ”إذا إنتَ مَلِك اليَهود، خَلِّص نَفسَك.“

³⁸ و كان مَكتوب فوق رَاسو: ”دا هو مَلِك اليَهود.“

³⁹ و واحِد مِن المُذنِبين المَعَلَّقين، شَتَمو و قال: ”إنتَ مُش المَسيح؟ خَلِّص نَفسَك و خَلِّصنا كَمان.“

⁴⁰ لَكِن التّاني رَدَّ عَليهو و وَبَّخو و قال: ”إنتَ ما تَخاف الله؟ و إنتَ نَفسَك تِحِت زات الحُكم؟

⁴¹ و حَكَمو عَلينا بِالحَق، عَشان دي أُجرَة أعمالنا. لَكِن الرّاجِل دا ما عِندو غَلَط.“

⁴² و هو قال: ”يا يَسُوع، إتزَكَّرني لَمّا تَجي لِمَلَكوتَك.“

⁴³ و قال ليهو: ”بِالحَق أقول ليك، النَّهار دا بِتكون مَعاي في جَنَّه.“

موت يَسُوع

⁴⁴ و الوَكِت كان السّاعَه إتناشَر تَقريباً. و كانَت في ضُلُمَّه عَلى كُل الأرض لِغايَة السّاعَه تلاتَه.

⁴⁵ و الشَّمِس ضَلَّمَت، و سِتارَة الهيكَل إتشَرَّطَت في نُص.

⁴⁶ و يَسُوع كورَك بِصوت عالي و قال: ”يا أبوي، في إيدينَك أدّيت روحي.“ و لَمّا قال كِدا سَلّم روحو.

⁴⁷ و رَئيس الجّيش لَمّا شاف الحَصَل، مَجَّد الله و قال: ”بِالحَق الإنسان دا كان بار.“

⁴⁸ و كُل النّاس، الكانو إتلَمو عَشان يَشوفو دا، لَمّا شافو الكان حَصَل، رَجَعو و كانو يَضرُبو صُدورُم.

⁴⁹ و كُل الكانو بيَعرِفوهو و النِّسوان المَشو مَعاهو مِن الجَّليل، كانو واقفين مِن بَعيد يَشوفو دا كُلّو.

دَفن يَسُوع

⁵⁰ و شوف، كان في راجِل إسمو يُوسِف. و هو كان واحِد مِن المَجلِس، و راجِل طَيب و بار.

⁵¹ و هو ما كان يَتَّفِق مَعَ نِظامُم و لا عَمَلُم. و هو كان مِن الرَّامَه، و هي مَدينَة اليَهود. و كان يِستَنّى مَلَكوت الله.

⁵² و هو مَشى لِبِيلاطُس، و طَلَب مِنّو جِسم يَسُوع.

⁵³ و نَزَّلو و لَفّاهو بِقُماش تيل، و خَتّو في قَبر مَقطوع مِن حَجَر، و ما كانو خَتّو زول فيهو أبَداً.

⁵⁴ و اليوم دا كان يوم الإستِعداد، و السَّبِت قَرَّب.

⁵⁵ و النِّسوان الجّو مَعاهو مِن الجَّليل تِبِعوهو، و شافو القَبر و كيف خَتّو جِسمو.

⁵⁶ و هُم رَجَعو و جَهَّزو بُهارات و ريحَه. و في يوم السَّبِت إستَراحو زي الأمر.