لُوقَا 21 - كِتاب العَهد الجَّديد مِن الكِتاب المُقَدَّس

هَديَّة الأرمَلَه

¹ و يَسُوع رَفَع عُيونو، و شاف الغَنيين يَخُتّو الهَدايا في الخَزنَه.

² و شاف كَمان أرمَلَه مِسكينَه خَتَّت هِناك مِلّيمين.

³ و قال: ”بِالحَق أقول ليكُم، الأرمَلَه المِسكينَه دي خَتَّت أكتَر مِن الكُل.

⁴ عَشان كُل النّاس ديل أدّو مِن غِناهُم، لَكِن هي أدَّت كُل العِندَها البِتعيش بيهو.“

عَلامات آخِر الزَّمَن

⁵ و بَعَض مِنَّهُم كانو يِتكَلَّمو عَن الهيكَل كيف كان جَميل، و مَبني بِحُجار غاليَه و مِن الهَدايا. لَكِن يَسُوع قال:

⁶ ”بِخُصوص الحاجات دي الإنتو تَشوفوها، الوَكِت بِجي لَمّا ما بِخَلّو حَجَر فوق حَجَر الما بِرموهو تِحِت.“

⁷ و سألوهو و قالو: ”يا مُعَلِّم، الحاجات دي بِتكون مِتين؟ و شِنو العَلامَه لَمّا الحاجات دي قَرَّبَت تَحصَل؟“

⁸ و هو قال ليهو: ”خَلّو بالكُم عَشان واحِد ما بِغِشّكُم. عَشان ناس كُتار بِجو بِإسمي و بِقولو: أنا هو، و: الوَكِت قَرَّب. ما تَمشو وَراهُم.

⁹ و لَمّا تَسمَعو بِحُروب و دَوشَه، ما تَخافو. الحاجات دي لازِم بِتَجي في الأوَّل، لَكِن آخِر الدُّنيا لِسَّع ما قَريب.“

¹⁰ و بَعدين هو قال ليهُم: ”أُمَّه بِتقوم عَلى أُمَّه، و مَملَكَه عَلى مَملَكَه.

¹¹ و بِتكون زَلازِل كَبيرَه، و مِن مَحَل لِمَحَل بِكون جوع و أمراض بَطّالَه. و بِتكون حاجات البِتخَلّي النّاس يَخافو، و عَلامات عَظيمَه مِن السَّما.

¹² لَكِن قُبّال دا كُلّو، بِمسِكوكُم و يَطرُدوكُم، و بِسَلِّموكُم لِبِيوت الرَّب و السُّجون. و بِسوقوكُم قِدّام المُلوك و المُديرين فِشان إسمي.

¹³ و دا بِكون فُرصَه ليكُم عَشان تَشهَدو لَي.

¹⁴ خُتّو في قُلوبكُم، ما تَفَكِّرو كَتير قُبّال دا كيف تَرُدّو لَمّا يَشتَكوكُم.

¹⁵ عَشان أنا بَدّيكُم كَلام و حِكمَه، و عُدوانكُم ما بِقدَرو يَغلِبو كَلامكُم ولّا يَعاكِسوهو.

¹⁶ و الوالِدين و الأخوان و القَريبين و الأصحاب بِسَلِّموكُم. و بِكتُلو بَعض مِنَّكُم.

¹⁷ و كُل النّاس بِكرَهوكُم فِشان إسمي.

¹⁸ لَكِن و لا شَعرَه واحدَه مِن رؤسكُم تَخسَر.

¹⁹ إذا تَكونو ثابِتين، تَخَلِّصو حَياتكُم.

²⁰ و وَكِت ما تَشوفو الجُّيوش بِلِفّو حَول أُورُشَلِيم، بِتَعرِفو خَرابا قَرَّبَت.

²¹ في الوَكِت دا، خَلّو الفي اليَهُودِيَّه يَهرُبو لِلجِّبال. و ديل، الفي جُوَّه المَدينَه، يَمرُقو. و الفي بَرَّه مِن المَدينَه ما يدخُلوها.

²² دا وَكِت الإنتِقام، عَشان كُل المَكتوب يَتِم.

²³ بِكون صَعب جِدّاً لِلحامِلين و البِرَضِّعو في الأيام ديل، عَشان بِكون تَعب شَديد عَلى الأرض، و غَضَب عَلى الأُمَّه دي.

²⁴ و يَقَعو بِالسّيف، و يَكونو مَسجونين لِكُل الأُمَم. و الأُمَم يَدوسو أُورُشَلِيم تِحِت كِرعينُم، لِغايَة ما وَكِت الأُمَم بِتِم.

²⁵ و عَلامات بِكونو في الشَّمِس و القَمَر و النُّجوم. و عَلى الأرض، الأُمَم بِتعَبو، و بِتحَيَّرو مِن دَوشَت البَحَر و الأمواج.

²⁶ و النّاس بِقَعو مِن الخوف لَمّا يَنتَظِرو الحاجات البِجو عَلى الدُّنيا. عَشان قُوّات السَّمَوات بِتهِزّو.

²⁷ و في الوَكِت دا، بِشوفو إبن الإنسان جاي في السَّحابَه بِقُدرَه و بِمَجد عَظيم.

²⁸ و لَمّا الحاجات ديل يَبتَدو يَحصَلو، خَلّو بالكُم، و أرفَعو رُسينكُم. خَلاصكُم قَرَّب.“

²⁹ و كَلَّمُم بِمَثَل: ”عاينو لِشَجَرَة التّين و كُل الشَّجَر.

³⁰ لَمّا تَطَلِّع الوَرَق، تَشوفو و تَفهَمو مِن نُفوسكُم إنّو السّيف قَرَّب.

³¹ و كِدا كَمان، لَمّا تَشوفو الحاجات ديل يَحصَلو، تَعرِفو مَلَكوت الله قَرَّب.

³² بِالحَق أقول ليكُم، الجّيل دا ما بِفوت لِغايَة ما كُلّو دا يَتِم.

³³ السَّما و الأرض بِفوتو، لَكِن كَلامي ما بِفوت أبَداً.

³⁴ لَكِن خَلّو بالكُم لِنُفوسكُم، عَشان ما بِتكونو حَزنانين في قُلوبكُم بِحاجات فاضيَه و سَكَر و هُموم الحَياة دي، و اليوم داك بِجي ليكُم زي الفَخ.

³⁵ عَشان بِجي عَلى كُل السّاكنين عَلى كُل الأرض.

³⁶ لَكِن أحرِسو و صَلّو في كُلّو وَكِت، عَشان تَقدَرو تَهرَبو مِن كُل الحاجات دي البِتَحصُل، و تَقيفو قِدّام إبن الإنسان.“

³⁷ و يَسُوع كان بِعَلِّم في النَّهار في الهيكَل. و في اللّيل كان بِطلَع و بِنوم في جَبَل إسمو جَبَل الزّيتون.

³⁸ و بَدري في الصَّباح كُل النّاس جو ليهو في الهيكَل عَشان يَسمَعوهو.