لُوقَا 2 - كِتاب العَهد الجَّديد مِن الكِتاب المُقَدَّس

وِلادَة يَسُوع

¹ و في الأيام ديلاك، طَلَع أمر مِن أُغُسْطُس قَيصَر عَشان يَسَجِّلو كُلّو سُكّان الأرض.

² و دا أوَّل كِتابَه حَصَلَت لَمّا كِيرِينِيُوس كان حاكِم سُورِيَّه.

³ و كُلّو واحِد مَشى عَشان يَكتِب إسمو في مَدينَتو.

⁴ و يُوسِف كَمان طَلَع مِن الجَّليل مِن مَدينَة النَّاصِرَه لِليَهُودِيَّه لِمَدينَة دَاوُد الإسِما بيت لَحَم، عَشان هو مِن بيت دَاوُد و مِن أهلو.

⁵ هو مَشى عَشان يَكتِب إسمو، و مَعاهو مَرْيَم المَخطوبَه ليهو، و هي حامِل.

⁶ و وَكِت كانو هِناك، تَمَّت أياما عَشان تَلِد.

⁷ و وِلدَت وَلَدا البِكر، و لَفَّتو بِالقُماش و نَوَّمَتو في المِذوَد، عَشان ما كان ليهُم مَكان في اللّوكَندا.

الرُّعاه و المَلائكَه

⁸ و في البَلَد دي، رُعاه كانو يَحرَسو غَنَمُم بِاللّيل في الخَلا.

⁹ و طَوّالي، مَلاك الرَّب وَقَف جَمبُم، و مَجد الرَّب نَوَّر حَواليهُم، و خافو خوف شَديد.

¹⁰ و المَلاك قال ليهُم: ”ما تَخافو! شوفو! أبَشِّركُم بِفَرَح عَظيم يَكون لِكُل النّاس.

¹¹ إتوَلَد ليكُم النَّهار دا في مَدينَة دَاوُد مُخَلِّص، و هو الرَّب المَسيح.

¹² و دي ليكُم العَلامَه. بِتَلقو طِفل مَلفوف بِقُماش، و هو راقِد في مِذوَد.“

¹³ و طَوّالي ظَهَر مَعَ مَلاك الرَّب كُتار مِن جيش السَّما، كانو يَحمَدو الله و يَقولو:

¹⁴ ”المَجد لِلَّه في السَّما، و عَلى الأرض السَّلام بين النّاس الهو مَبسوط مِنَّهُم.“

¹⁵ و لَمّا المَلائكَه رَجَعو مِن عِندَهُم لِلسَّما، الرُّعاه قالو بَعضَهُم لِبَعض: ”خَلّينا نَمشي هَسَّع لِبيت لَحَم و نَشوف الحاجَه الحَصَلَت الخَبَّرنا بيها الرَّب.“

¹⁶ و جو بِسُرعَه و لِقو مَرْيَم و يُوسِف، و الطِّفل راقِد في المِذوَد.

¹⁷ و لَمّا شافوهو، خَبَّرو بِالكَلام القالو ليهُم بِخُصوص الوَلَد دا.

¹⁸ و كُل السِّمِعو، إتعَجَّبو مِن الكَلام القالوهو ليهُم الرُّعاه.

¹⁹ و مَرْيَم كانَت تَحفَظ الكَلام دا كُلّو، و تَفَكِّر فيهو في قَلبَها.

²⁰ و الرُعاه رَجَعو و هُم يَمَجِّدو الله و يَحمَدوهو عَلى الشّافوهو و السِّمِعوهو زي ما قالو ليهُم.

يَقَدِّمو يَسُوع في الهيكَل

²¹ و لَمّا تَمَّت تَمانيَة أيام عَشان يَطَهِّروهو، سَمّوهو يَسُوع، زي ما سَمّاهو المَلاك قُبّال ما حِملَت بيهو أُمّو في بَطنَها.

²² و بَعَد ما تَمَّت أيام نَضافَتُم زي قانون مُوسَى، جابوهو لِأُورُشَلِيم عَشان يَقَدِّموهو لِلرَّب.

²³ (زي ما هو مَكتوب في قانون الرَّب: ”كُلّو بِكر اليَفتَح البَطُن يَسَمّوهو مُقَدَّس لِلرَّب.“)

²⁴ و عَشان يَقَدِّمو ضَبيحَه زي ما مَكتوب في قانون الرَّب: ”جوز قُمريَّه ولّا جوز حَمام.“

²⁵ و كان في أُورُشَلِيم راجِل إسمو سِمْعَان. و الرّاجِل دا كان بار و بِخاف الله، مُنتَظِر راحَة إِسْرَائِيل. و الرّوح القُدُس كان عَليهو.

²⁶ و كان جا ليهو رؤيا مِن الرّوح القُدُس إنّو ما يَشوف الموت قُبّال ما يَشوف مَسيح الرَّب.

²⁷ و دَخَل الهيكَل، و هو في الرّوح. و وَكِت ما والِدين يَسُوع دَخَلو مَعَ الطِّفل عَشان يَسَوّو ليهو زي عادَة القانون،

²⁸ سِمْعَان رَفَعو بِإيدينو و بارَك الرَّب و قال:

²⁹ ”هَسَّع، يا رَب، خَلّي خَدّامَك يَروح بِالسَّلام، زي كَلامَك.

³⁰ عَشان عُيوني شافو خَلاصَك

³¹ الحَضَّرتو قِدّام كُل النّاس.

³² النّور اليَنَوِّر لِلأُمَم، و هو مَجد شَعب إِسْرَائِيل.“

³³ و أبوهو و أُمّو إتعَجَّبو مِن الحاجات سِمْعَان قال عَنّو.

³⁴ و سِمْعَان بارَكُم و قال لِمَرْيَم أُمّو: ”شوفي! الطِّفل دا مَعَيَّن لِوقوع و قيام ناس كُتار في إِسْرَائِيل، و العَلامَه يتكَلَّم ضَدّا.

³⁵ و إنتي كَمان يَطعَنِك سيف في نَفسِك، عَشان يَوَرّي أفكار قُلوب ناس كُتار.“

³⁶ و كانَت نَبيَّه إسِما حَنَّه، بِت فَنُوئِيل مِن قَبيلَة أَشِير. و هي كَبيرَه في السِّن. و سَكَنَت مَعَ زوجَها سَبعَه سِنين بَعَد ما إتزَوَّجَت.

³⁷ و هي أرمَلَه عُمُرا أربَعَه و تَمانين سَنَه. و ما كانَت بِتخَلّي الهيكَل، بِتَخدِم بِصوم و صَلاه ليل و نَهار.

³⁸ و جات في السّاعَه ديك و شَكَرَت الرَّب، و إتكَلَّمَت عَنّو لِكُل المُنتَظِرين فِداء أُورُشَلِيم.

³⁹ و لَمّا تَمَّمو كُلّو شي، زي قانون الرَّب، رَجَعو لِمَدينَتُم النَّاصِرَه في الجَّليل.

⁴⁰ و الوَلَد كِبِر و إتقَوّى، و إتمَلا بِحِكمَه. و نِعمَة الله كانَت عَليهو.

الوَلَد يَسُوع في الهيكَل

⁴¹ و كانو وَالِدينو بِمشو كُلّو سَنَه لِأُورُشَلِيم في عيد الفِصَح.

⁴² و لَمّا عُمرو بِقى إتناشَر سَنَه، طَلَعو لِأُورُشَلِيم زي عادَة العيد.

⁴³ و بَعَد العيد و هُم راجِعين، الوَلَد يَسُوع فِضِل في أُورُشَلِيم بِدون ما عِرفو الوالِدين.

⁴⁴ و فِكرَهُم إنّو مَعَ الجَّماعَه. و مَشو مَسافَة يوم، و فَتَّشو عَليهو بين أقارِبو و النّاس البيَعرِفوهو.

⁴⁵ و لَمّا ما لِقوهو، رَجَعو لِأُورُشَلِيم يَفَتِّشو عَليهو.

⁴⁶ و بَعَد تَلاتَة أيام لِقوهو في الهيكَل قاعِد في وَسط المُعَلِّمين يَسمَعُم و يَسأَلُم.

⁴⁷ و كُل السِمِعوهو إتعَجَّبو مِن فَهمو و رَدّو.

⁴⁸ و لَمّا شافوهو الوالِدين، إتعَجَّبو. و أُمّو قالَت ليهو: ”يا وَلَدي، لِشِنو عَمَلتَ لينا كِدا؟ شوف! أبوك و أنا كُنّا بِنفَتِّش عَليك بِالتَّعب.“

⁴⁹ و قال ليهُم: ”كُنتو بِتفَتِّشو عَلي لِشِنو؟ ما كُنتو بِتَعرِفو أنا لازِم أكون في بيت أبوي؟“

⁵⁰ و هُم ما فِهمو كَلامو القالو ليهُم.

⁵¹ و بَعدين نَزَل مَعاهُم و جا لِلنّاصِرَه، و كان يَطيعُم. و أُمّو كانَت تَحفَظ كُل الكَلام دا في قَلبا.

⁵² و يَسُوع زاد في الحِكمَه و في طولو، و في النِّعمَه عِند الله و النّاس.