لُوقَا 17 - كِتاب العَهد الجَّديد مِن الكِتاب المُقَدَّس

الخَطيَّه، الإيمان، و الواجِب

¹ و قال لِتَلاميذو: ”الحاجات البِتكون سَبَب الخَطيَّه لِلنّاس لازِم تَجي، و لَكِن مُصيبَه لِلزّول البِجيب الحاجات دي.

² أحسَن ليهو إذا كان رَبَطو مُرحاكَه كَبيرَه في رَقَبتو و بِرموهو في البَحَر، مِن أن يَكون سَبَب الخَطيَّه لِواحِد مِن الصُّغار ديل.

³ خَلّو بالكُم لِنُفوسكُم. و إذا كان أخوك يَعمِل خَطيَّه ليك، كَلِّمو غَلَطو. و إذا تاب، أغفِر ليهو.

⁴ و إذا يَعمِل خَطيَّه ليك سَبعَه مَرّات في اليوم و يَقول: أنا بَتوب، أغفِر ليهو.“

⁵ و الرُّسُل قالو لِلرَّب: ”زيد أيمانّا.“

⁶ و الرَّب قال: ”إذا عِندَكُم إيمان زي تيراب خَردَل، كُنتو بِتقولو لِلشَّجَرَه دي: أمرُقي مِن الأرض، و كوني مَزروعَه في البَحَر. و بِكون كِدا.

⁷ خَلّونا نَقول واحِد مِنَّكُم عِندو خَدّام بِشتَغِل في الزِّراعَه، ولّا بِحرَس الخِرفان. هو بِقول ليهو وَكِت ما جا مِن الزِّراعَه: تَعال طَوّالي و أقعُد و أُكُل؟

⁸ لا! لَكِن يَقول ليهو: جَهِّز لَي العَشا، و أخدِمني لِغايَة ما باكُل و بَشرَب. و بَعَد دا، إنتَ بِتاكُل و بِتَشرَب.

⁹ هو بِشكُر الخَدّام دا عَشان عَمَل زي ما أمَرو؟

¹⁰ و كِدا إنتو كَمان بَعَد ما عَمَلتو كُلّو شي الله أمَركُم بيهو، قولو: نِحنا خَدّامين ما عِندَنا فايدَه. عَمَلنا بَس اللازِم نَعمِلو.“

شِفا العَشَرَه العِندَهُم جِزام

¹¹ و في سَفَرو لِأُورُشَلِيم، يَسُوع مَشى بين السَّامِرَه و الجَّليل.

¹² و لَمّا كان يَدخُل الحِلَّه، قابَلوهو عَشَرَه رُجال عِندَهُم جِزام. و وَقَفو مِن بَعيد،

¹³ و كورَكو و قالو: ”يا يَسُوع، يا سَيِّد، أرحَمنا!“

¹⁴ و لَمّا شافُم، قال ليهُم: ”أمشو و وَرّو نُفوسكُم لِلقُسُس.“ و لَمّا كانو ماشين، بِقو نُضاف.

¹⁵ و واحِد مِنَّهُم لَمّا شاف إنّو بِقى طَيب، رَجَع يَحمِد الله بِصوت عالي.

¹⁶ و وَقَع عَلى وَشّو قِدّام يَسُوع يَشكُرو. و هو كان سامِري.

¹⁷ و يَسُوع رَدَّ و قال: ”ما كانو عَشَرَه البِقو طَيبين؟ وين التِّسعَه؟

¹⁸ ما في زول رَجَع يَحمِد الله إلّا الغَريب دا؟“

¹⁹ و قال ليهو: ”قوم و أمشي. إيمانَك شَفاك.“

مَلَكوت الله جاي

²⁰ و فَرّيسيِّين سألوهو و قالو: ”مَلَكوت الله بِجي مِتين؟“ و هو رَدَّ عَليهُم و قال: ”مَلَكوت الله ما بِجي بِالطَّرِيق البِشوفوهو بِالعُيون.

²¹ و ما بِقولو، أهو هِنا، ولّا، أهو هِناك. عَشان مَلَكوت الله في وَسِطكُم.“

²² و قال لِتَلاميذو: ”أيام بِتَجي لَمّا تَحِبّو تَشوفو يوم واحِد مِن أيام إبن الإنسان، و ما بِتشوفو.

²³ و بِقولو ليكُم: هو هِنا! هو هِناك! ما تَمشو و تَتبَعوهو.

²⁴ عَشان زي البَرق يَنَوِّر السَّما مِن جِهَه واحدَه لِلتّانيَه، في يوم إبن الإنسان بِكون كِدا كَمان.

²⁵ و لَكِن في الأوَّل، هو لازِم يِتعَذَب كَتير، و ناس الزَّمَن دا بِرفُضوهو.

²⁶ و زي ما كان في أيام نُوح، بِكون كِدا كَمان في أيام إبن الإنسان.

²⁷ كانو ياكُلو و يَشرَبو و يَزَوِّجو و يِتزَوَّجو لِغايَة اليوم لَمّا نُوح دَخَل المُركَب. و المويَه جات و غَطَّت كُلّو حاجَه و خَرَبُم كُلُّهُم.

²⁸ و كان زي دا في أيام لوط، كانو ياكلو و يَشرَبو و يَشتَرو و يَبيعو و يَزرَعو و يَبنو.

²⁹ لَكِن في اليوم لَمّا لوط طَلَع مِن سَدوم، نار و كِبريت نَزَلو مِن السَّما، و كُلُّهُم ماتو.

³⁰ و بِكون كِدا كَمان في اليوم الفيهو إبن الإنسان يَظهَر.

³¹ و الزّول البِكون بَرَّه مِن البيت، ما يَدخُل عَشان يَشيل عَفَشو. و الفي زِراعتو، ما يَرجَع لِبيتو.

³² إتزَكَّرو مَرَة لوط.

³³ كُل الدّايِر يَحفَظ نَفسو، يَوَدِّرو. و كُل اليَوَدِّر نَفسو، يَحفَظو.

³⁴ بَقول ليكُم: في اللّيلَه ديك، إتنين بِكونو فوق عَنقَرِيب واحِد، بياخُدو واحِد مِنَّهُم و بِخَلّو التّاني.

³⁵ و إتنين نِسوان يَطحَنو سَوا. بياخُدو الواحدَه، و بِخَلّو التّانيَه.

³⁶ و إتنين بِكونو في الزِّراعَه، بياخُدو الواحِد، و بِخَلّو التّاني.“

³⁷ و رَدّو و قالو ليهو: ”وين، يا رَب؟“ و قال ليهُم: ”المَحَل البِكون فيهو الجِّسم المَيِّت، هِناك الصُّقور بِلِمّو.“