لُوقَا 16 - كِتاب العَهد الجَّديد مِن الكِتاب المُقَدَّس

مَثَل الوَكيل الشّاطِر

¹ و يَسُوع قال لِتَلاميذو كَمان: ”كان في راجِل غَني عِندو وَكيل. و واحِد إشتَكاهو إنّو بِوَدِّر أموال سيدو.

² و ناداهو و قال ليهو: دا شِنو البَسمَع عَنَّك؟ قَدِّم حِساب شُغلَك، عَشان إنتَ ما تَقدَر تَكون وَكيل بَعَد كِدا.

³ و الوَكيل قال لِنَفسو: أنا بَعمِل شِنو؟ عَشان سيدي بياخُد مِنّي شُغلي. ما بَقدَر عَلى شُغل الزِّراعَه، و أنا خَجلان أسأل حاجات مِن النّاس.

⁴ أنا عارِف الأنا بَسَوّي، عَلَشان لَمّا يَطرُدني مِن الشُّغل، بِقبَلوني في بِيوتُم.

⁵ و هو نادى كُلّو واحِد العِندو دين لِسيدو، و قال لِلأوَّل: دينَك لِسيدي كَم؟

⁶ قال: مِيَّة بَرميل زيت. و قال ليهو: أُخُد حِسابَك و أقعُد بِسُرعَه و أكتِب خَمسين.

⁷ و بَعدين قال لِلتاني: و إنتَ كَم عَليك؟ و قال ليهو: مِيَّة أردَب دُرَه. و قال ليهو: أُخُد حِسابَك و أكتِب تَمانين.

⁸ و السَّيد حَمَد الوَكيل الظّالِم عَشان عَمَل بِالعَقل. عَشان أولاد الدُّنيا في وَكتُم، شاطرين مِن أولاد النّور.

⁹ و أقول ليكُم، سَوّو ليكُم أصحاب بِمال الظُّلم، عَلَشان إذا ما نَجَحتو، يَقبَلوكُم في الخيام الأبَديَّه.

¹⁰ الأمين في القَليل، هو أمين في الكَتير كَمان. و الما أمين في القَليل، هو ما أمين في الكَتير كَمان.

¹¹ إذا ما كُنتو صادقين بِمال الظُّلم، مِنو بِيَعمِلكُم مَسؤلين في الغِنى الحَقيقي؟

¹² إذا إنتو ما كُنتو صادقين في مال ناس تانيين، مِنو بِدّيكُم حَقّكُم؟

¹³ ما في خَدّام يَقدَر يَخدِم سَيِّدين، عَشان بِكرَه الواحِد و بِحِب التّاني، ولّا بِمسِك الواحِد و بيابا التّاني. ما تَقدَرو تَخدِمو الله و المال.“

¹⁴ و الفَرّيسيّين سِمِعو دا كُلّو، و هُم كانو بِحِبّو المال، و ضِحِكو عَليهو.

¹⁵ و قال ليهُم: ”إنتو تَبَرِّرو نُفوسكُم قِدّام النّاس. لَكِن الله عارِف قُلوبكُم. عَشان البِكون مَرفوع قِدّام النّاس، الله بِيَكرَهو.

¹⁶ القانون و الأنبياء كانو لِغايَة وَكِت يُوحَنَّا. و مِن الوَكِت داك بِبَشِّرو بِمَلَكوت الله. و كُلّو واحِد البِدخُل فيهو، بِدخُل بِقُوَّه.

¹⁷ و أسهَل لِلسَّما و الأرض أن يَفوتو، مِن أن تَقَع نُقطَه واحدَه مِن القانون.

¹⁸ كُلّو واحِد البِطَلِّق مَرَتو و يِتزَوَّج تانيَه يَزني، و كُلّو واحِد البِتزَوَّج بِواحدَه مُطَلَّقَه مِن راجِلا، هو يَزني.

الرّاجِل الغَني و لَعَازَر

¹⁹ كان في راجِل غَني، و كان بِلبَس حَرير و تيل. و كان بياكُل أكِل كوَيس جِدّاً كُلّو يوم.

²⁰ و كان في راجِل مِسكين إسمو لَعَازَر، مَختوت عِند بَابو. و جِسمو مَليان دَبَر.

²¹ و هو عاوِز يَكون شَبعان مِن الفَتافيت الوَقَعو مِن طَرَبيزَة الغَني. و مَعَ كُلّو دا، الكِلاب جو و لَحَسو دَبَرو.

²² و بَعدين المِسكين مات، و المَلائكَه شالوهو، و خَتّوهو قَريب لِإِبْرَاهِيم. و الغَني كَمان مات، و دَفَنوهو.

²³ و في الهاويَه و هو في العَذاب، رَفَع عُيونو و شاف إِبْرَاهِيم مِن بَعيد، و لَعَازَر قَريب ليهو.

²⁴ و كورَك و قال: يا أبوي إِبْرَاهِيم، أرحَمني، و رَسِّل لَعَازَر عَشان يَخُت أصبَعو في مويَه و يَبَرِّد لِساني، عَشان أنا تَعبان جِدّاً في النّار دي.

²⁵ لَكِن إِبْرَاهِيم قال: يا وَلَدي، إتزَكَّر إنتَ في حَياتَك أخَدتَ حاجات كوَيسَه، و كِدا كَمان لَعَازَر حاجات بَطّالَه. و لَكِن هَسَّع هو هِنا مُرتاح، و إنتَ مِعَذَب.

²⁶ و مَعَ كُلّو دا، في حُفرَه كَبيرَه مَثَبَّتَه بينَنا و بينكُم. عَلَشان كِدا، العاوزين يَمشو مِن هِنا ليكُم ما بِقدَرو، و ما في واحِد يَقدَر يَمشي مِن هِناك لينا.

²⁷ و هو قال: عَشان كِدا بَطلُب مِنَّك، يا أبوي، تَرَسِّل لَعَازَر لِبيت أبوي.

²⁸ عَشان عِندي خَمسَة أخوان. خَليهو يَشهَد ليهُم، عَلَشانُم ما بِجو كَمان لِمَحَل العَذاب دا.

²⁹ لَكِن إِبْرَاهِيم قال ليهو: عِندَهُم مُوسَى و الأنبياء. خَليهُم يَسمَعو ليهُم.

³⁰ و هو قال ليهو: لا، يا أبوي إِبْرَاهِيم، إذا كان واحِد مِن المَيِّتين مَشى ليهُم، هُم بِتوبو.

³¹ و هو قال ليهو: إذا ما يَسمَعو مِن مُوسَى و الأنبياء، ما بِصَدِّقو إذا واحِد قام مِن بين المَيِّتين.“