لُوقَا 15 - كِتاب العَهد الجَّديد مِن الكِتاب المُقَدَّس

مَثَل الخَروف الضايع

¹ و كُل البِلِمّو الضَّريبَه و الخاطيين كانو يَقَرِّبو مِنّو عَشان يَسمَعوهو.

² و الفَرّيسيّين و مُعَلِّمين القانون إشتَكو و قالو: ”الرّاجِل دا بِقبَل الخاطيين و بياكُل مَعاهُم.“

³ و كَلَّمُم بِالمَثَل دا و قال:

⁴ ”خَلّونا نَقول إنّو زول مِنَّكُم عِندو مِيَّة خَروف، و وَدَّر واحِد مِنَّهُم. هو ما بِخَلّي التِّسعَه و التِّسعين في الخَلا، و يَمشي يَكوس عَلى الخَروف المَوَدَّر لِغايَة ما يَلقاهو؟

⁵ و لَمّا يَلقاهو، يَخُتّو عَلى كَتفو، و هو مَبسوط.

⁶ و وَكِت يَجي لِبيتو، بِنادي أصحابو و جيرانو، و يَقول ليهُم: كونو مَبسوطين مَعاي، عَشان لِقيت خَروف المَوَدَّر مِنّي.

⁷ أقول ليكُم، بِكون فَرَح زي دا في السَّما عَلى خاطي واحِد يَتوب، أكتَر مِن تِسعَه و تِسعين عَديلين ما بِحتاجو لِلتّوبَه.

مَثَل القُروش الضايع

⁸ ولّا خَلّونا نَقول إنّو مَرَه عِندَها عَشَرَه حِتَت فِضَّه. و إذا وَدَّرَت واحدَه مِنَّها، ما تَوَلِّع اللَّمبَه، و تَقُش البيت، و تَفَتِّش لِغايَة ما تَلقاها؟

⁹ و وَكِت تَلقاها، تَنادي أصحابا و جيرانا و تَقول: كونو مَبسوطين مَعاي، عَشان لِقيت الحِتَّه الوَدَّرتا.

¹⁰ و أقول ليكُم، بِكون فَرَح زي دا قِدّام مَلائِكَة الله، بِخاطي واحِد يَتوب.“

مَثَل الوَلَد الضايع

¹¹ و قال: ”كان في راجِل عِندو وَلَدين.

¹² و الأصغَر فيهُم قال لِأبوهو: يا أبوي، أدّيني القِسِم حَقّي مِن المال. و قَسَم ليهُم مالو.

¹³ و بَعَد أيام قَليلَه، الوَلَد الصَّغَير جَمَع كُلّو حاجَه و سافَر لِبَلَد بَعيدَه. و هِناك وَدَّر مالو في حَياة بَطّالَه.

¹⁴ و بَعَد ما وَدَّر كُلّو شي، كان في جوع شَديد في البَلَد دي، و بِقى مُحتاج.

¹⁵ و مَشى و لَزَق نَفسو بِزول مِن أهل البَلَد دي. و هو رَسَّلو لِزِراعتو عَشان يَرعى كَداريك.

¹⁶ و كان عاوِز يَملى بَطنو بِالخَرنوب البياكلو الكَداريك. و ما في زول أدّا ليهو حاجَه.

¹⁷ و لَمّا رَجَع لِنَفسو، قال: كَم مِن النّاس الأبوي بِأجِّرُم عِندَهُم أكِل زِيادَه خالِص، و أنا هِنا بَموت مِن الجوع.

¹⁸ أقوم و أمشي لِأبوي، و أقول ليهو، يا أبوي، أنا عَمَلتَ خَطيَّه ضِد السَّما و قِدَّامَك.

¹⁹ و ما مُستَحِق بَعَد دا يَسَمّوني وَلَدَك. أعمِلني زي واحِد مِن المِتأجِّرين عِندَك.

²⁰ و قام و جا لِأبوهو. و لَكِن لَمّا لِسَّع كان بَعيد، أبوهو شافو و رَحَمو، و جَرى و وَقَع عَلى رَقَبتو و سَلّم عَليهو.

²¹ و الوَلَد قال ليهو: يا أبوي، عَمَلتَ خَطيَّه ضِد السَّما و قِدَّامَك. و ما مُستَحِق بَعَد دا يَسَمّوني وَلَدَك.

²² و قام الأبو و قال لِخَدّامينو: جيبو بِالسُّرعَه أحسَن هِدوم، و لَبِّسوهو، و خُتّو خاتِم في إيدو و جِزَم في كِرعينو.

²³ و جيبو العِجِل السَّمين و أضبَحوهو، و خَلّونا ناكُل و نَفرَح.

²⁴ عَشان وَلَدي دا كان مَيِّت و بِقى حَي تاني. و كان ضايِع و إتلَقى. و بَدو يَفرَحو.

²⁵ و وَلَدو الكَبير كان في الزِّراعَه. و لَمّا جا و قَرَّب مِن البيت، سِمِع الغُنا و الرَقَص.

²⁶ و نادى واحِد مِن الخَدّامين و سَألو، شِنو كُلّو دا؟

²⁷ و الخَدّام قال ليهو: أخوك جا، و أبوك ضَبَح العِجِل السَّمين، عَشان هو رَجَع بِالسَّلامَه.

²⁸ لَكِن هو زِعِل شَديد، و ما كان رَضيان يَدخُل. و أبوهو مَرَق و طَلَب مِنّو يَدخُل.

²⁹ لَكِن هو رَدَّ و قال لِأبوهو: شوف! أنا إشتَغَلتَ ليك السِنين دي كُلَّها، و ما كَسَرتَ أوَامِرَك أبَداً. و إنتَ ما أدّيتني غَنَمايَه صَغَيرَه عَشان أفرَح مَعَ أصحابي.

³⁰ و لَكِن لَمّا جا وَلَدَك دا، الوَدَّر مالَك مَعَ النِّسوان البَطّالات، ضَبَحتَ ليهو العِجِل السَّمين.

³¹ و قال ليهو: يا وَلَدي، إنتَ دايماً مَعاي، و كُلّو حَقّي حَقَّك.

³² لَكِن واجِب عَلينا نَفرَح و نَكون مَبسوطين، عَشان أخوك دا كان مَيِّت و حِيى تاني، و كان ضايِع و إتلَقى.“