لُوقَا 14 - كِتاب العَهد الجَّديد مِن الكِتاب المُقَدَّس

يَسُوع في بيت الفرِّيسي

¹ و لَمّا يَسُوع دَخَل بيت واحِد مِن رؤساء الفَرِّيسِيِّين في يوم السَّبِت عَشان ياكُل، كانو يَعاينو ليهو شَديد.

² و شوف! كان قِدّامو راجِل عَيّان، و جِسمو كُلّو وَرَم.

³ و يَسُوع قال لِمُعَلِّمين القانون و الفَرّيسيّين: ”الشِّفا في يوم السَّبِت بِالقانون ولّا لا؟“

⁴ و سَكَتو. و يَسُوع مَسَكو و شَفاهو و خَلّاهو يَمشي.

⁵ و قال ليهُم: ”مِنو مِنَّكُم إذا كان حُمارو ولّا تورو وَقَع في البير، ما بِطَلِّعو طَوّالي في يوم السَّبِت؟“

⁶ و ما قِدرو يَرُدّو كِلمَه عَن دا.

⁷ و عَلَّم المَعزومين بِمَثَل لَمّا شاف كيف كانو يَختارو المَحَلّات الأوّلانيّن، و قال ليهُم،

⁸ ”إذا كان زول عَزَمَك لِعَزومَة العِرِس، ما تَقعُد في الكُرسي الأوّلاني، عَشان يِمكِن زول أكبَر كان مَعزوم.

⁹ و العَزَمَك بِجي و يَقول ليك: خَلّي مَحَلَّك لِلرّاجِل دا. و بَعدين بِتكون خَجلان لَمّا تَمشي تاخُد المَحَل الأخير.

¹⁰ لَكِن لَمّا إنتَ مَعزوم، أمشي أقعُد في المَحَل الأخير، عَشان لَمّا العَزَمَك بِجي، يَقول ليك: يا صَحبي، إتفَضَّل قِدّام. و عَلى كِدا القاعِدين مَعاك في الطَّرَبيزَه بِحتَرِموك.

¹¹ عَشان كُل البِرفَع نَفسو، بِنَزِّلوهو تِحِت. و البِنّزِّل نَفسو تِحِت، بِرفَعوهو فوق.“

¹² و يَسُوع قال لِسيد البيت: ”إذا كان عَمَلتَ غَدا ولّا عَشا، ما تَنادي أصحابَك، و لا أخوانَك، و لا النّاس القَريبين مِنَّك، و لا جيرانَك الغَنيين، عَشان يِمكِن هُم كَمان بِعزَموك و بِتكون عِندَك أُجرَه مِنَّهُم.

¹³ لَكِن لَمّا تَعمِل عَزومَه، أعزِم المَساكين، و النّاس المَكَسَّرين، و العُرُج، و العَميانين.

¹⁴ و بِتكون مُبارَك، عَشان ما عِندَهُم البِرَجِّعوهو ليك، و إنتَ بِتاخُد أُجرَتَك يوم قيامَة البارين.“

مَثَل العَزومَه الكَبيرَه

¹⁵ واحِد مِن الكان قاعِد مَعاهو في الطَّرَبيزَه، لَمّا سِمِع كِدا، قال ليهو: ”يا مُبارَك الياكُل عيش في مَلَكوت الله.“

¹⁶ و قال ليهو: ”كان في راجِل عَمَل عَشا كَبير و عَزَم ناس كُتار.

¹⁷ و رَسَّل خَدّامو في ساعَة العَشا، عَشان يَقول لِلنّاس المَعزومين: تَعالو، عَشان كُلّو شي جاهِز.

¹⁸ و كُلُّهُم إبتَدو بِفِكر واحِد أن يَوَرّو سَبَب عَشان ما يَمشو. و الأوَّلاني قال: أنا أشتَريت زِراعَه، و لازِم أمشي أشوفا. بَطلُب مِنَّك تَخَلّيني.

¹⁹ و تاني قال: أشتَريت عَشَرَه تيران، و أمشي بَجَرِّبُم. بَطلُب مِنَّك تَخَلّيني

²⁰ و تاني قال: أنا إتزَوَّجتَ مَرَه، و عَشان كِدا ما بَقدَر أجي.

²¹ و الخَدّام جا و خَبَّر سيدو بِالحَصَل. بَعدين سيد البيت زِعِل و قال لِخَدّامو: أمرُق بِسُرعَه في سِكَك المَدينَه، و جيب المَساكين و المَكَسَّرين و العَميانين و العُرُج.

²² و قال الخَدّام: يا سَيِّدي، عَمَلتَ زي ما أمَرتَ، و لِسَّع في مَحَل.

²³ و السيد قال لِلخَدّام: أمرُق في السِّكَك و الدُروب، و أعمِلُم بِلِغاية يدخُلو، لِغايَة بيتي بِكون مَليان.

²⁴ عَشان أقول ليكُم، و لا واحِد مِن النّاس العَزَمتَهُم بِضوق العَشا بِتاعي.“

²⁵ و ناس كُتار مَشو مَعَ يَسُوع. و هو إتلَفَت، و قال ليهُم،

²⁶ ”إذا كان زول جا لَي، و ما يَكرَه أبوهو و أُمّو و مَرَتو و أولادو و أخوانو و أخواتو و لِغايَة نَفسو كَمان، هو ما بِقدَر يَكون تِلميذ.

²⁷ و أي واحِد الما بِشيل صَليبو و يَتبَعني، ما بِقدَر يَكون تِلميذ.

²⁸ إذا واحِد مِنَّكُم عاوِز يَبني بيت عالي، هو ما بِقعُد في الأوَّل و بِحسِب تَمَنو، عَشان يَشوف إذا كان عِندو كِفايَه عَشان يَكَمِّلو؟

²⁹ عَشان إذا ما يَعمِل كِدا، بَعَد ما يَخُت الأساس و ما بِقدَر يَكَمِّلو، كُل البِشوفوهو يَبتَدو يَضحَكو عَليهو،

³⁰ و يَقولو: الرّاجِل دا إبتَدا يَبني بيت عالي و ما قِدِر يَكَمِّلو.

³¹ شِنو إذا مَلِك يَمشي يَحارِب مَلِك تاني؟ هو ما بِقعُد في الأوَّل، و بِشاوِر إذا كان بِقدَر بِعَشَرَة آلاف راجِل يَقابِل البِجي ضِدّو بِعِشرين ألف؟

³² و إذا ما بِقدَر، لَمّا داك لِسَّع بَعيد، بِرَسِّل مُراسَلين عَشان يَعمِلو سَلام.

³³ و عَلى كِدا، أي زول مِنَّكُم الما بِخَلّي كُل العِندو، ما بِقدَر يَكون تِلميذ.

³⁴ عَلى كِدا، المِلِح كوَيس، و لَكِن إذا كان المِلِح يَبقى مَسيخ، كيف تَرَجِّع ليهو ضوقو؟

³⁵ ما في فايدَه مِنّو، ما لِلأرض و لا لِلزِّبالَه. لَكِن بِرموهو بَرَّه. العِندو إضنين خَليهو يَسمَع.“