لُوقَا 12 - كِتاب العَهد الجَّديد مِن الكِتاب المُقَدَّس

يَسُوع يَحَذِّر و يَشَجِّع

¹ و وَكِت ما آلاف مِن النّاس إتلَمّو لِغايَة ما كانو يَدوسو بَعضَهُم عَلى بَعض، إبتَدا يَكَلِّم تَلاميذو في الأوَّل: ”خَلّو بالكُم مِن خَميرَة الفَرِّيسِيِّين الهو النِفاق.

² عَشان ما في شي مُغَطّى الما بِكون مَفتوح، و لا مَدسوس الما بِكون مَعروف.

³ و عَشان كِدا، كُل الكَلَّمتو في ضُلُمَّه بِسمَعوهو في النّور. و البِتِتكَلَّمو في الأضنين في السِّر بِنادو بيهو مِن فوق البِيوت.

⁴ و أقول ليكُم، يا أصحابي، ما تَخافو مِن البِكتُلو الجِسم، و بَعَد كِدا ما عِندَهُم حاجَه زِيادَه يَقدَرو يَعمِلو.

⁵ لَكِن بَوَرّيكُم مِن مِنو إنتو لازِم تَخافو. خافو مِن هو البَعَد ما يَكتُل، عِندو قُدرَه يَرمي في جَهَنَّم. أيوَه، أقول ليكُم، خافو مِنّو.

⁶ ما بِبيعو خَمسَه عَصافير بِقِرشين؟ و الله ما بِنسى و لا واحِد مِنَّهُم.

⁷ لِغايَة كُلّو شَعر رُسينكُم كَمان مَعدود. ما تَخافو. إنتو أحسَن مِن عَصافير كَتيرَه.

⁸ و أقول ليكُم، البِعتَرِف بي قِدّام النّاس، أنا كَمان بَعتَرِف بيهو قِدّام مَلائِكَة الله.

⁹ و البِنكِرني قِدّام النّاس، أنا كَمان بَنكِرو قِدّام مَلائِكَة الله.

¹⁰ و كُل البقول كِلمَه ضِد إبن الإنسان، بِتكون مَغفورَه ليهو. لَكِن البِجَدِّف عَلى الرّوح القُدُس، ما بِكون مَغفورَه ليهو.

¹¹ و لَمّا يَجيبوكُم لِبِيوت الرَّب و الرّؤساء و السَّلاطين، ما تَفَكِّرو كيف ولّا بِشِنو بِترُدّو عَليهُم ولّا بِشِنو بِتِتكَلَّمو.

¹² عَشان الرّوح القُدُس بِعَلِّمكُم في نَفس السّاعَه الكَلام اللازِم تِتكَلَّمو بيهو.“

مَثَل الزّول الغَني و الغَشيم

¹³ و واحِد مِن الجَّمَع قال ليهو: ”يا مُعَلِّم، كَلَّم أخوّي عَشان يَقَسِّم الميراث بينَنا.“

¹⁴ و قال ليهو: ”يا راجِل، مِنو عَمَلني قاضي عَليكُم عَشان أقَسِّم ليكُم؟“

¹⁵ و قال ليهُم: ”شوفو و أحرِسو نُفوسكُم مِن كُلّو طَمَع. عَشان حَياة الزّول ما بِتَجي مِن كَترَت الحاجات العِندو.“

¹⁶ و كَلَّمُم بِمَثَل و قال: ”كان في زول غَني زِراعتو جابَت دُرَه كَتيرَه.

¹⁷ و فَكَّر في نَفسو و قال: أعمِل شِنو؟ عَشان ما عِندي مَحَل ألِم فيهو الدُّرَه حَقَّتي.

¹⁸ و قال: أنا بَعمِل كِدا. أنا بَخَرِّب مَخازِني و بَبني أكبَر مِنَّها، و هِناك بَلِم دُرَتي و أموالي.

¹⁹ و أقول لِنَفسي، يا نَفسي، عِندِك حاجات كوَيسَه كَتيرَه مَحفوظَه لِسِنين كَتيرَه. إستَريحي، و أُكلي و أشرَبي و كوني مَبسوطَه.

²⁰ و لَكِن الله قال ليهو: يا غَشيم، اللّيلَه دي بِطلُب مِنَّك نَفسَك، و الجَهَّزتو دا يَكون لِمِنو؟

²¹ و بِكون كِدا ليهو البِلِم كَنز لِنَفسو، و ما عِندو غِنى لِلَّه.“

²² و هو قال لِتَلاميذو: ”عَشان كِدا أنا بَقول ليكُم: ما تَفَكِّرو كَتير لِحَياتكُم بِتاكلو شِنو، و لا في جِسِمكُم بِتَلبَسو شِنو.

²³ عَشان الحَياة أحسَن مِن الأكِل، و الجِّسِم أحسَن مِن الهِدوم.

²⁴ فَكِّرو في الطُّيور، الما بِزرَعو و لا بِجمَعو الدُّرَه، و ما عِندَهُم بيت و لا مَخزَن، و الله بِدّيهُم أكِل. و إنتو أحسَن مِن الطُيور بِكَتير!

²⁵ و مِنو مِنَّكُم إذا كان بِفَكِّر كَتير يَقدَر يَزيد عَلى طولو ضُراع واحِد؟

²⁶ و عَلى كِدا، إذا ما بِتَقدَرو عَلى الشّي الأصغَر، لِشِنو تَفَكِّرو في الحاجات التّانيَه؟

²⁷ فَكِّرو في الزُهور، كيف بِيَكبِرو. و ما يَتعَبو و ما يَخَيِّطو. و لَكِن أقول ليكُم، و لا سُلَيْمَان في كُلّو مَجدو كان بِلبَس زي واحدَه مِنَّها.

²⁸ و إذا كان الله يَلَبِّس كِدا القَش الفي الزِّراعَه النَّهار دا، و بُكرَه بِرموهو في الفُرن، كَم بِالأكتَر يَلَبِّسكُم، يا قَليلين الإيمان.

²⁹ و ما تَطلُبو بِتاكلو شِنو و بِتَشرَبو شِنو. و ما تِتحَيَّرو.

³⁰ عَشان الحاجات دي، كُلّو أُمَم الدُّنيا يَطلُبوها، و لَكِن أبوكُم بِيَعرِف إنتو تَحتاجو ليها.

³¹ لَكِن أطلُبو مَلَكوت الله، و الحاجات دي كُلُّها بِزيدو ليكُم.

³² ما تَخافو، يا المُراح الصَّغير، عَشان أبوكُم رَضيان يَدّيكُم المَلَكوت.

³³ بيعو الحاجات العِندَكُم، و أدّو لِلمَساكين. و أعمِلو ليكُم أكياس الما بِتشَرَّطو، و كَنز في السَّما الما بِتَخلَص، و الحَرامي ما يَقدَر يَقَرِّبو ليهو، و السوس ما ياكلو.

³⁴ عَشان المَكان الفيهو كَنزَكُم، هِناك كَمان قَلبَكُم بِكون في.

الخَدّام الأمين و المُش أمين

³⁵ أربُطو حِزامكُم و خَلّو لَمباتكُم بِتكون مَوَلَّعَه.

³⁶ و كونو زي ناس مُنتَظِرين سيدُم لَمّا يَرجَع مِن العِرِس، عَلَشان لَمّا يَجي و يَدُق الباب، يَفتَحو ليهو طَوّالي.

³⁷ مُبارَكين الخَدّامين ديل إذا سيدُم يَجي و يَلقاهُم حارِسين. بِالحَق أقول ليكُم، هو بِربُط حِزامو، و يَقَعِدُم في الطَّرَبيزَه و يَقَدِّم ليهُم أكِل.

³⁸ و إن كان هو جا في نُص اللّيل ولّا بَعدو بِشوَيَه و لِقاهُم حارِسين، بَرَكَه لِلخَدّامين ديل.

³⁹ و لَكِن أفهَمو، إذا سيد البيت عِرِف السّاعَه اليَجي فيها الحَرامي، ما كان خَلّى الحَرامي يَسرِق بيتو.

⁴⁰ عَلى كِدا خَلّيكُم جاهِزين، عَشان في السّاعَه الما مُنتَظِرينو، فيها إبن الإنسان يَجي.“

⁴¹ و بُطْرُس قال: ”يا رَب، بِتقول لينا المَثَل دا ولّا لِكُل النّاس كَمان؟“

⁴² و يَسُوع قال ليهو: ”مِنو هو الوَكيل الأمين و العاقِل، السيدو بيَعمِلو مَسؤول عَن خَدّامينو؟ و هو المَسؤول عَشان يَدّيهو الأكل في وَكتو.

⁴³ مُبارَك الخَدّام دا، إذا سيدو يَجي، يِلقاهو يَعمِل كِدا.

⁴⁴ بِالحَق أقول ليكُم، سيدو يَعمِلو مَسؤول عَن كُلّو أموالو.

⁴⁵ لَكِن إذا الخَدّام دا قال في قَلبو: سيدي ما بِجي قَريب، و بَعدين إبتَدا يَضرُب الخَدّامين و الخَدّامات، و ياكُل و يَشرَب و يَكون سَكران،

⁴⁶ بَعدين سيد الخَدّام دا بِجي في يوم ما يَنتَظِرو، و في ساعَه ما يَعرِفا. و يَجلِدو شَديد و يَخُتّو مَعَ الما مِصَدِّقين.

⁴⁷ و الخَدّام العِرف إرادَة سيدو، و ما جَهَّز نَفسو، و ما عَمَل إرادَة سيدو، بِجلِدو كَتير.

⁴⁸ و الما عِرِف و عَمَل حاجات تِستَحِق الجَلدَه، بِجلِدوهو شوَيَه. و كُل الأدّوهو كَتير يَطلُبو مِنّو كَتير، و العِندو سُلطَه كَتير يَطلُبو مِنّو أكتَر.

⁴⁹ أنا جيت عَشان أرمي نار عَلى الأرض. و هَسَّع أنا عاوِز النّار بِتكون مَوَلَّعَه.

⁵⁰ عِندي مَعموديَّه أتعَمَّد بيها. الدُّنيا ضَيقَه قِدامي لِغايَة ما تَتِم.

⁵¹ فِكرَكُم أنا جيت عَشان أَدِّي سَلام عَلى الأرض؟ أقول ليكُم، لا. لَكِن جيت عَشان أقَسِّم.

⁵² عَشان مِن هَسَّع بِكونو خَمسَه في بيت واحِد، مِنقَسمين تلاتَه عَلى إتنين ولّا إتنين عَلى تلاتَه.

⁵³ يِنقَسِم الأبو عَلى الوَلَد، و الوَلَد عَلى الأبو، و الأم عَلى البِت، و البِت عَلى الأم، و النَسيبَه عَلى مَرَة وَلَدا، و مَرَة وَلَدا عَلى نَسيبَتا.“

⁵⁴ و قال لِلجَّمَع كَمان: ”وَكِت شُفتو سَحاب طالِع مِن الغَرب، طَوّالي تَقولو: المَطَر بِجي. و بِكون كِدا.

⁵⁵ و إذا شُفتو هَبوب تَجي مِن الجَّنوب، تَقولو: الواطَه بِتكون حارَّه. و بِتكون كِدا.

⁵⁶ يا مُنافِقين، إنتو تَقدَرو تَعرِفو كُلّو عَن الأرض و السَّما، و تَقولو شِنو البِحصَل، و كيف ما تَعرِفو مَعنى الزَّمَن دا؟

⁵⁷ و لِشِنو إنتو نُفوسكُم ما بِتَقدَرو تَحكُمو بِالحَق؟

⁵⁸ وَكِت إنتَ ماشي مَعَ عَدوَّك لِلقاضي، جَرِّب كَتير تَعمِل السَّلام مَعاهو لَمّا إنتو في السِّكَّه، عَشان ما يَجُرَّك لِلقاضي، و القاضي يَسَلِّمَك لِلضابِط، و الضابِط يَرميك في السِّجِن.

⁵⁹ أقول ليك، ما بِتَطلَع لِغايَة ما تَدفَع آخِر مِليم.“