لُوقَا 10 - كِتاب العَهد الجَّديد مِن الكِتاب المُقَدَّس

يَسُوع يَرَسِّل السَّبعين

¹ و بَعَد كِدا، الرَّب إختار سَبعين تانيين و رَسَّلُم إتنين إتنين قِدّامو لِكُلّو بَلَد و مَحَل هو عاوِز يَمشي ليهو.

² و قال ليهُم: ”دُرَه كَتيرَه جاهزَه، لَكِن الشَغّالين قَليلين. عَلَشان كِدا، أطلُب مِن رَب الحَصاد عَشان يَرَسِّل شَغّالين لِزِراعتو.

³ أمشو! شوفو! أنا أرَسِّلكُم زي خِرفان في وَسط مَرفَعين.

⁴ ما تَشيلو كيس و لا جُزلان و لا جِزَم. و ما تَسَلِّمو عَلى زول في السِّكَّه.

⁵ و أي بيت تَدخُلوهو، قولو في الأوَّل: سَلام لِلبيت دا.

⁶ و إذا كان هِناك إنسان السَّلام، سَلامكُم بِكون عَليهو. و إذا ما في، سَلامكُم بِرجَع ليكُم.

⁷ و أقعُدو في زات البيت، و أُكلو و أشرَبو اليَدّوهو ليكُم، عَشان الشَّغال مُستَحِق أُجرَتو. و ما تَمشو مِن بيت لِبيت.

⁸ و أي مَدينَه تَدخُلوها و هُم يَقبَلوكُم، أُكلو مِن اليَقَدِّموهو ليكُم.

⁹ و أشفو المَرضانين الفي البيت، و قولو ليهُم: مَلَكوت الله قَرَّب مِنَّكُم.

¹⁰ و أي مَدينَه تَدخُلوها و هُم ما يَقبَلوكُم، أطلَعو في شَوارِعا و قولو:

¹¹ حَتّى تُراب بَلَدكُم اللِّصِق في رِجلينّا نَهِزّو عَليكُم. و لَكِن أعرِفو إنّو مَلَكوت الله قَرَّب.

¹² أقول ليكُم، حالَة سَدوم بِتكون أحسَن في اليوم داك مِن الحالَه البِتكون لِلبَلَد ديك.

¹³ مُصيبَه ليكي، يا كُورَزِين! مُصيبَه ليكي، يا بيت صَيدا! إذا كان القُوّات العَمَلوها في صُور و صَيدا عَمَلوها فيكُم، كانو تابو زَمان لابسين الشَوال و يَخُتّو الرَّماد فوق راسُم.

¹⁴ لَكِن في يوم الحُكم، حالَة صُور و صَيدا بِتكون أحسَن مِن الحالَه البِتكون ليكُم.

¹⁵ و إنتي، يا كَفْرَنَاحُوم، بِتكوني مَرفوع لِلسَّما؟ بِتَنزِلي إنتي لِلهاويَه.

¹⁶ اليَسمَعكُم يَسمَعني، و اليَرفُضكُم يَرفُضني، و اليَرفُضني يَرفُض الرَّسَّلني.“

¹⁷ و السَّبعين رَجَعو بِفَرَح و قالو: ”حَتّى الشّياطين يَطيعونا بِإسمَك.“

¹⁸ و قال ليهُم: ”أنا كُنتَ أشوف الشّيطان يَقَع مِثِل البَرق مِن السَّما.

¹⁹ شوف! أنا أدّيتكُم السُّلطَه تَدوسو الدَّبايب و العَقارِب، و عَلى كُلّو قُدرَة العَدو. و ما في شي يَجرَحكُم.

²⁰ و لَكِن ما تَفرَحو عَشان الأرواح يَسمَعو ليكُم، لَكِن أفرَحو عَشان أساميكُم مَكتوبَه في السَّما.“

²¹ و في السّاعَه دي، هو فِرِح كَتير بِالرّوح القُدُس و قال: ”أحمَدَك، يا أبوي، يا رَب السَّما و الأرض، عَشان دَسيت الحاجات دي مِن المِتعَلِّمين و الفاهمين، و وَرّيتا لِلأولاد الصُّغار. أيوَه، يا أبوي، عَشان كان مِن إرادَتَك أن يَكون كِدا.

²² أبوي أدّاني كُلّو شي. و ما في زول يَعرِف الإبن هو مِنو، إلّا الأبو، و الأبو هو مِنو إلّا الإبن، و كُل الإبن عاوِز يَوَرّي نَفسو ليهو.“

²³ و إتلَفَت لِتَلاميذو و قال ليهُم بَراهُم: ”مُبارَكين العُيون البِشوفو الإنتو بِتشوفو.

²⁴ عَشان أقول ليكُم، أنبياء كُتار و مُلوك دارو يَشوفو الحاجات الإنتو بِتشوفوها، و ما شافوها. و دارو يَسمَعو الإنتو بِتَسمَعوهو، و ما سِمِعوهو.“

مَثَل السّامِري الطَّيب

²⁵ و شوف! راجِل عِرِف القانون قام يَجَرِّبو و قال: ”يا مُعَلِّم، أعمِل شِنو عَشان ألقى الحَياة الأبَديَّه؟“

²⁶ و قال ليهو: ”شِنو المَكتوب في القانون؟ بِتَقراهو كيف؟“

²⁷ و رَدَّ و قال: ”تَحِب الرَّب إلَهَك مِن كُلّو قَلبَك و مِن كُلّو نَفسَك و مِن كُلّو قُدرَتَك و مِن كُلّو عَقلَك، و كَمان جارَك زي نَفسَك.“

²⁸ و قال ليهو: ”جاوَبتَ بِالحَق. أعمِل كِدا و تَحيى.“

²⁹ لَكِن هو كان عاوِز يَبَرِّر نَفسو، و قال لِيَسُوع: ”و مِنو هو جاري؟“

³⁰ و يَسُوع رَدَّ و قال: ”كان في راجِل نازِل مِن أُورُشَلِيم لِأَرِيحَا، و وَقَع في وَسِط الحَراميَّه. و قَلَعو مِنّو هِدومو، و جَرَحوهو، و مَشو. و خَلّوهو بين حَي و مَيِّت.

³¹ و بِالصُّدفَه، قَسّيس نَزَل بِالطَّرِيق داك. و لَمّا شافو، فات مِن الجَّمب التّاني.

³² و واحِد لَاوِي كَمان زيهو، لَمّا وِصِل المَحَل و شافو، فات مِن الجَّمب التّاني.

³³ و لَكِن واحِد سامِري مِسافِر جا ليهو. و لَمّا شافو، رَحَمو.

³⁴ و قَرَّب مِنّو و رَبَط جُروحو، و كَبَّ عَليها زيت و خَمَر، و رَكَّبو عَلى حُمارو، و جابو لِلوكَندا، و شافو كوَيس.

³⁵ و اليوم البَعدو، طَلَّع دينارين و أدّاهُم لِسيد اللّوكَندا و قال ليهو: شوفو كوَيس، و كُل التَّصرُفو زِيادَه، لَمّا أرجَع، بَدفَعو ليك.

³⁶ فِكرَك شِنو، ياتو مِن التّلاتَه ديل بِقى جار لِلوَقَع في وَسِط الحَراميَّه؟“

³⁷ و قال: ”هو العَمَل ليهو الرَّحمَه.“ و يَسُوع قال ليهو: ”أمشي إنتَ كَمان و أعمِل كِدا.“

في بيت مَرْيَم و مَرْثَا

³⁸ و وَكِت هُم ماشين، هو دَخَل حِلَّه. و مَرَه إسِما مَرْثَا قِبلَتو في بيتا.

³⁹ و كانَت ليها أُخُت إسِما مَرْيَم، الكَمان قَعَدت عِند قَدَمين يَسُوع و كانَت تَسمَع كَلامو.

⁴⁰ و لَكِن مَرْثَا كانَت مَشغولَه في خِدمَه كَتيرَه. و جات ليهو و قالَت: ”يا رَب، ما بِهِمَّك إنّو أُختي خَلَّتني أشتَغِل بَراي؟ قول ليها أن تَساعِدني.“

⁴¹ و الرَّب رَدَّ و قال ليها: ”يا مَرْثَا، يا مَرْثَا، إنتي مَشغولَه و بِتفَكِري في حاجات كَتيرَه.

⁴² لَكِن الضَّروري، حاجَه واحدَه. و مَرْيَم إختارَت الجُّزو السَّمِح الما يَاخُدوهو مِنَّها.“