يُوحَنَّا 9 - كِتاب العَهد الجَّديد مِن الكِتاب المُقَدَّس

الرّاجِل المَولود عَميان

¹ و لَمّا كان يَمشي، شاف راجِل عَميان مِن وِلادتو.

² و تَلاميذو سألوهو و قالو: ”يا مُعَلِّم، مِنو عَمَل خَطيَّه، الرّاجِل دا؟ ولّا والِديهو؟ عَلَشان هو كان مَولود عَميان.“

³ يَسُوع رَدَّ و قال ليهُم: ”الرّاجِل دا ما عِندو خَطيَّه، ولّا والِديهو، لَكِن عَشان أعمال الله بِظهَرو فيهو.

⁴ لازِم نَعمِل أعمال الرَّسَّلني ما دام النَّهار. عَشان بِجي ليل لَمّا واحِد ما يَقدَر يَشتَغِل.

⁵ و لَمّا أنا في الدُّنيا، أنا نور الدُّنيا.“

⁶ و لَمّا قال كِدا، بَزَق عَلى الأرض، و عَمَل طين مِن البُزاق، و خَتَّ الطّين فوق عُيون العَميان.

⁷ و قال ليهو: ”أمشي غَسِّل في بِركَة سِلوام، المَعناها مَرَسَّل.“ بَعدين مَشى و غَسَّل، و جا، و قِدِر يَشوف.

⁸ و الجّيران و النّاس الكانو بِشوفوهو مِن زَمان لَمّا هو كان عَميان، قالو: ”مُش دا الرّاجِل الكان بِيَقعُد و يَسأل حاجَه مِن النّاس؟“

⁹ و بَعض مِن النّاس قالو: ”دا هو،“ و لَكِن تانيين قالو: ”دا زيهو.“ و هو قال: ”أنا هو.“

¹⁰ و قالو ليهو: ”كيف عُيونَك إنفَتَحَت؟“

¹¹ هو رَدَّ و قال ليهُم: ”إنسان إسمو يَسُوع عَمَل طين و مَسَح عُيوني و قال لَي: أمشي لِبِركَة سِلوام و غَسِّل. و مَشيت و غَسَّلتَ و عُيوني إنفَتَحَت.“

¹² هُم قالو ليهو: ”هو وين؟“ قال ليهُم: ”أنا ما بَعرِف.“

¹³ و جابو لِلفَرّيسيّين الرّاجِل القُبّال كان عَميان.

¹⁴ و كان يوم السَّبِت لَمّا يَسُوع عَمَل الطّين و فَتَح عُيون العَميان.

¹⁵ الفَرِّيسِيِّين سألوهو كَمان: ”كيف عُيونَك إنفَتَحَت؟“ و قال ليهُم: ”هو خَتَّ طين عَلى عُيوني، و أنا غَسَّلتَ، و هَسَّع بَشوف.“

¹⁶ و بَعض الفَرِّيسِيِّين قالو: ”الرّاجِل دا مُش مِن الله، عَشان هو ما بِحفَظ السَّبِت.“ تانيين قالو: ”كيف راجِل خاطي يَقدَر يَعمِل زي العَلامات دي؟“ و بِقو مِنقَسِمين.

¹⁷ قالو لِلعَميان مَرَّه تانيَه: ”و إنتَ تَقول عَنّو شِنو، عَشان فَتَح عُيونَك؟“ و قال: ”هو نَبي.“

¹⁸ و اليَهود ما صَدَّقو هو كان عَميان و عُيونو إنفَتَحَت، لِغايَة ما نادو والِديهو.

¹⁹ و قالو ليهُم: ”دا هو وَلَدكُم القُلتو إنّو إتوَلَد عَميان؟ كيف هو بِشوف هَسَّع؟“

²⁰ والِديهو رَدّو و قالو ليهُم: ”نِحنا عارفين دا وَلَدنا، و هو إتوَلَد عَميان.

²¹ لَكِن كيف هو بِشوف هَسَّع، نِحنا ما بِنَعرِف، ولّا مِنو فَتَح عُيونو نِحنا ما بِنَعرِف. هو بِقى راجِل. أسألوهو، و هو يتكَلَّم عَن نَفسو.“

²² و والِديهو قالو كِدا عَشان هُم كانو خايفين مِن اليَهود، عَشان اليَهود إتَّفَقو، إنّو إذا واحِد إعتَرَف هو المَسيح، يَطرُدوهو مِن بيت الرَّب.

²³ عَشان كِدا، والِديهو قالو: ”هو بِقى راجِل. أسألوهو.“

²⁴ و مَرَّه تانيَه نادو الرّاجِل الكان عَميان، و قالو ليهو: ”أَدِّي المَجد لِلَّه. نِحنا بِنَعرِف الرّاجِل دا خاطي.“

²⁵ هو رَدَّ و قال ليهُم: ”إذا هو خاطي أنا ما بَعرِف، لَكِن أنا أعرِف شي واحِد. أنا كُنتَ عَميان، و هَسَّع أنا بَشوف.“

²⁶ و عَلَشان كِدا قالو ليهو: ”هو عَمَل ليك شِنو؟ كيف فَتَح عُيونَك؟“

²⁷ رَدَّ عَليهُم و قال: ”أنا قُلتَ ليكُم و إنتو ما سِمِعتو. لِشِنو عاوزين تَسمَعو تاني؟ إنتو دايرين تَكونو تَلاميذ ليهو؟“

²⁸ و شَتَموهو و قالو: ”إنتَ تِلميذ الرّاجِل داك، لَكِن نِحنا تَلاميذ مُوسَى.

²⁹ نِحنا بِنَعرِف الله كَلَّم مُوسَى، لَكِن الزّول دا، نِحنا ما عارفين هو مِن وين.“

³⁰ الرّاجِل رَدَّ عَليهُم و قال: ”دا عَجيب! إنتو ما عارفين هو مِن وين، و هو فَتَح عُيوني!

³¹ نِحنا بِنَعرِف الله ما بِسمَع لِلخاطيين، لَكِن كان واحِد يَخاف الله و يَعمِل إرَادَتو، الله يَسمَع ليهو.

³² مِن ما الله خَلَق الأرض، ما سِمِعنا واحِد فَتَح عُيون زول مَولود عَميان.

³³ إذا الرّاجِل دا ما كان مِن الله، ما كان قِدِر يَعمِل شي.“

³⁴ رَدّو و قالو ليهو: ”إنتَ كُنتَ مَولود في الخَطايا تَمام، و إنتَ تَعَلِّمنا؟“ و طَرَدوهو بَرَّه.

³⁵ و يَسُوع سِمِع هُم طَرَدوهو بَرَّه. و لِقاهو و قال ليهو: ”إنتَ بِتآمِن بِإبن الله؟“

³⁶ رَدَّ و قال ليهو: ”مِنو هو، يا سَيِّد، عَشان أآمِن بيهو؟“

³⁷ يَسُوع قال ليهو: ”إنتَ شُفتو، و البِتكَلَّم مَعاك دا هو.“

³⁸ و قال: ”بآمِن، يا سَيِّد.“ و عَبَدو.

³⁹ و يَسُوع قال ليهو: ”أنا جيت لِلدُّنيا دي عَشان أحكُم، حَتّى النّاس الما بِشوفو بِشوفو، و البِشوفو بِكونو عَميانين.“

⁴⁰ و بَعض مِن الفَرِّيسِيِّين الكانو مَعاهو، سِمِعو و قالو ليهو: ”نِحنا كَمان عَميانين؟“

⁴¹ يَسُوع قال ليهُم: ”إذا كُنتو عَميانين، ما كانَت عِندَكُم خَطيَّه. لَكِن هَسَّع بِتقولو: نِحنا بِنشوف. خَطِيَّتكُم قاعدَه.