يُوحَنَّا 5 - كِتاب العَهد الجَّديد مِن الكِتاب المُقَدَّس

الشِّفا في بيت حَسدا

¹ و بَعَد كِدا، كان في عيد اليَهود، و يَسُوع طَلَع لِأُورُشَلِيم.

² و كانَت في أُورُشَلِيم جَمب باب الخِرفان، بِركَة مويَه إسِما بِلُغَة اليَهود، بيت حَسدا، ليها خَمسَه بَراندات.

³ و عَيّانين كُتار كانو راقِدين فيها، مِنَّهُم عَميانين و عُرج و مَفلوجين،

⁴ كُلَّهُم مُنتَظِرين المويَه تِتحَرَّك.

⁵ و كان في هِناك راجِل عَيّان مُدَّة تَمانيَه و تَلاتين سَنَه.

⁶ و لَمّا يَسُوع شافو، و عِرِف إنّو راقِد هِناك مُدَّه طَويلَه، قال ليهو: ”إنتَ عاوِز الشِّفا؟“

⁷ الرّاجِل العَيّان رَدَّ و قال ليهو: ”يا سَيِّد، ما عِندي زول يَنَزِّلني في البِركَه لَمّا المويَه تِتحَرَّك. و لَمّا أجَرِّب أدخُل، واحِد تاني يَنزِل قُبّالي.“

⁸ يَسُوع قال ليهو: ”قوم، شيل بِرشَك، و أمشي.“

⁹ و طَوّالي، الرّاجِل بِقى طَيب، و شال بِرشو، و مَشى. و كان اليوم داك يوم السَّبِت.

¹⁰ عَشان كِدا، اليَهود قالو لِلزّول البِقي طَيب: ”اليوم هو السَّبِت، و ما بِالقانون ليك تَشيل بِرشَك.“

¹¹ و قال ليهُم: ”الرّاجِل الشَّفاني، هو قال لَي: شيل بِرشَك و أمشي.“

¹² و سألوهو: ”مِنو هو القال ليك: شيل بِرشَك و أمشي؟“

¹³ لَكِن الرّاجِل البِقي طَيب ما كان بِيَعرِف هو مِنو، عَشان يَسُوع دَسَّ نَفسو عَشان كان في جَمَع في المَحَل دا.

¹⁴ و بَعَد كِدا، يَسُوع لِقاهو في الهيكَل. و قال ليهو: ”شوف، إنتَ بِقيت طَيب. ما تَعمِل خَطيَّه تاني مَرَّه، عَشان شي أكعَب ما يَحصَل ليك.“

¹⁵ و الرّاجِل مَرَق و قال لِليَهود إنّو يَسُوع هو الشَّفاهو.

¹⁶ عَشان كِدا، اليَهود كانو بِطرُدو يَسُوع، و عاوِزين يَكتُلوهو، عَشان هو عَمَل كِدا في السَّبِت.

¹⁷ لَكِن يَسُوع رَدَّ و قال ليهُم: ”أبوي دايماً بيَعمِل، و أنا بَعمِل كَمان.“

¹⁸ عَلَشان كِدا، اليَهود كانو دايرين يَكتُلوهو بِأي طَرِيقَه، مُش بَس عَشان هو خالَف السَّبِت، و لَكِن عَشان هو قال كَمان إن الله أبوهو. و كِدا عَمَل نَفسو واحِد مَعَ الله.

حَياة بِواسطَة الإبن

¹⁹ و يَسُوع قال ليهُم: ”الحَق الحَق أقول ليكُم، الإبن ما بِقدَر يَعمِل حاجَه مِن نَفسو، لَكِن بَس الهو بِشوف الأبو بيَعمِل. عَشان أي شي الأبو بيَعمِل، الإبن بيَعمِلو كَمان.

²⁰ عَشان الأبو بِحِب الإبن، و يَوَرّيهو كُلّو شي الهو يَعمِلو. و ماشي يَوَرّيهو عَجايِب أكبَر مِن دي، عَشان إنتو تِستَغرَبو.

²¹ زي ما الأبو يَقَوِّم المَيِّتين و يَدّيهو الحَياة، كَمان الإبن يَدّي ليهُم الحَياة زي ما هو عاوِز.

²² عَشان الأبو ما بِحكُم أي واحِد لَكِن أدّا كُل الحُكم لِلإبن،

²³ عَشان كُل النّاس يَحتَرِمو الإبن، زي ما هُم يَحتَرِمو الأبو. الما يَحتَرِم الإبن، ما يَحتَرِم الأبو الرَّسَّلو.

²⁴ الحَق الحَق أقول ليكُم، البِسمَع كَلامي و بِآمِن بِالرَّسَّلني، تَكون ليهو الحَياة الأبَديَّه، و ما بِجي لِلحُكم، عَشان هو مَرَق مِن الموت لِلحَياة.

²⁵ الحَق الحَق أقول ليكُم، السّاعَه بِتَجي، و هي هَسَّع، لَمّا المَيِّتين بِسمَعو صوت إبن الله، و البِسمَعو يَعِيشو.

²⁶ عَشان زي ما الأبو عِندو حَياة في نَفسو، هو كَمان أدّا لِلإبن عَشان تَكون ليهو الحَياة في نَفسو.

²⁷ و أدّاهو سُلطَه أن يَحكُم كَمان، عَشان هو إبن الإنسان.

²⁸ ما تِستَغرَبو مِن دا، عَشان ساعَه بِتَجي لَمّا كُل النّاس الفي القُبور بِيَسمَعو صوتو،

²⁹ و يَطلَعو، العَمَلو حاجات كوَيسَه لِقيامَة الحَياة، و العَمَلو حاجات بَطّالَه لِقيامَة الدّينونَه.

شَهادات عَن يَسُوع

³⁰ أنا ما بَقدَر أعمِل شي مِن نَفسي. زي ما أسمَع، أنا أحكُم. و حُكمي عَديل، عَشان أنا ما بَطلُب إرادَتي، لَكِن إرادَة الرَّسَّلني.

³¹ إذا بَشهَد لِنَفسي، شَهادَتي مُش الحَق.

³² في واحِد تاني يَشهَد لَي. و أنا عارِف شَهادَتو الهو بِشهَدا لَي هي حَق.

³³ إنتو رَسَّلتو لِيُوحَنَّا، و هو شِهِد لِلحَق.

³⁴ و أنا ما بَقبَل شَهادَه مِن إنسان، و لَكِن أقول كِدا عَشان إنتو تَخلَصو.

³⁵ يُوحَنَّا كان اللَّمبَه المِوَلِّعَه البِتَدّي نور. و إنتو كُنتو رَضيانين تَفرَحو بِنورو لِوَكِت قَليل.

³⁶ لَكِن أنا عِندي شَهادَه أكبَر مِن شَهادَة يُوحَنَّا. عَشان الأعمال الأبو أدّاها لَي عَشان أتِمّا، الأعمال دي زاتا الأنا بَعمِل، هي تَوَرّي إنّو الأبو رَسَّلني.

³⁷ و الأبو نَفسو الرَّسَّلني يَشهَد لَي، و إنتو ما سِمِعتو صوتو أبَداً، و ما شُفتو شَكلو.

³⁸ و كلمَتو ما ساكنَه فيكُم، عَشان إنتو ما بِتآمِنو بيهو الرَّسَّلو.

³⁹ إنتو تَفَتِّشو الكُتُب، عَشان إنتو تَفتَكِرو عِندَكُم فيهُم الحَياة الأبَديَّه. و هُم البِشهَدو لَي.

⁴⁰ و إنتو ما عاوِزين تَجو لَي عَشان تَكون ليكُم الحَياة.

⁴¹ أنا ما بَقبَل مَجد مِن النّاس.

⁴² لَكِن أنا عِرِفتَ إنتو ما عِندَكُم مَحَبَّة الله في قُلوبكُم.

⁴³ أنا جيت بِإسم أبوي، و إنتو ما بِتَقبَلوني. إذا واحِد تاني يَجيكُم بِإسم نَفسو، بِتَقبَلوهو.

⁴⁴ كيف تَقدَرو تَآمِنو و إنتو تَقبَلو مَجد، واحِد مِن التّاني، و لَكِن ما بِتفَتِّشو عَلى المَجد المِن الله الوَحيد.

⁴⁵ ما تَفتَكِرو أنا بَشتَكي عَليكُم للأبو. في واحِد البِشتَكي عَليكُم، و هو مُوسَى، الفيهو رَجاكُم.

⁴⁶ عَشان إذا كُنتو بِتصَدِّقو مُوسَى، كُنتو تَصَدِّقوني، عَشان هو كَتَب عَنّي.

⁴⁷ لَكِن إذا كُنتو ما بِتصَدِّقو كُتُب مُوسَى، كيف تَصَدِّقو كَلامي؟“