يُوحَنَّا 3 - كِتاب العَهد الجَّديد مِن الكِتاب المُقَدَّس

يَسُوع يَعَلِّم نِقُدِموس

¹ كان في راجِل مِن الفَرِّيسِيِّين إسمو نِقُدِموس، رَئيس لِليَهود.

² هو جا لِيَسُوع في اللّيل، و قال ليهو: ”نِحنا عارفين إنَّك جيت مُعَلِّم مِن الله. عَشان ما في واحِد يَقدَر يَعمِل العَلامات الأنتَ بِتَعمِلا، إذا الله ما مَعاهو.“

³ يَسُوع رَدَّ و قال ليهو: ”الحَق الحَق أقول ليك، إن كان واحِد ما يِتوَلَد مِن فوق، هو ما بِقدَر يَشوف مَلَكوت الله.“

⁴ نِقُدِموس قال ليهو: ”كيف الإنسان يَقدَر يِتوَلَد و هو راجِل عَجوز؟ هو بِقدَر يَدخُل بَطن أُمّو مَرَّه تانيَه و يِتوَلَد؟“

⁵ يَسُوع قال ليهو: ”الحَق الحَق أقول ليك، إذا كان واحِد ما بِتوَلَد مِن المويَه و الرّوح، هو ما بِقدَر يَدخُل مَلَكوت الله.

⁶ المَولود مِن الجِّسم، هو جِسم. و المَولود مِن الرّوح، هو روح.

⁷ ما تِستَغرَبو عَشان قُلتَ ليك: ’لازِم تِتوَلَد مِن فوق.‘

⁸ الريح تَحِب لِلمَكان العاوِزا، و تَسمَع صوتا. لَكِنَّك ما بِتَعرِف مِن وين بِتَجي، ولّا لِوين بِتَمشي. و البِتوَلَد مِن الرّوح، هو كِدا.“

⁹ نِقُدِموس رَدَّ و قال ليهو: ”كيف دا يَقدَر يَكون كِدا؟“

¹⁰ يَسُوع رَدَّ و قال ليهو: ”إنتَ مُعَلِّم إِسْرَائِيل، و ما بِتَعرِف دا؟

¹¹ الحَق الحَق أقول ليك، نِحنا بِنِتكَلَّم بِالشّي النَعرِفو، و نَشهَد بِالشّي النَشوفو. و إنتو ما بِتَقبَلو شَهادَتنا.

¹² إذا كان قُلتَ ليكُم الحاجات بِتاعَت الأرض و ما بِتآمِنو، كيفِن تَآمِنو إذا أقول ليكُم الحاجات بِتاعَت السَّما؟

¹³ ما في واحِد طَلَع لِلسَّما إلّا هو النَّزَل مِن السَّما، يَعني إبن الإنسان الفي السَّما.

¹⁴ و زي ما مُوسَى رَفَع الدَّبيب في الخَلا، كَمان لازِم يَرفَعو إبن الإنسان.

¹⁵ عَشان كُل البِآمِن بيهو ما يَهلِك، لَكِن تَكون ليهو الحَياة الأبَديَّه.

¹⁶ عَشان الله حَبَّه الدُّنيا، حَتّى أدّا إبنو الوَحَيد، عَشان كُلّو واحِد البِآمِن بيهو ما يَهلِك، لَكِن تَكون ليهو الحَياة الأبَديَّه.

¹⁷ عَشان الله ما رَسَّل إبنو لِلدُّنيا عَشان يَدين الدُّنيا، لَكِن رَسَّلو عَشان يَخَلِّص الدُّنيا بيهو.

¹⁸ الإنسان البِآمِن بيهو، الله ما يَدينو. و الإنسان الما بِآمِنو بيهو، هو مَديون عَليهو مِن قُبّال، عَشان هو ما آمَن بِإسم إبن الله.

¹⁹ و دي هي الدّينونَه: إن النّور جا لِلدُّنيا، و النّاس حَبّو الضُّلُمَّه أكتَر مِن النّور، عَشان أعمالُم كانَت شَرّيرَه.

²⁰ عَشان كُلّو واحِد البيَعمِل الحاجات الشَّرّيرَه، يَكرَه النّور، و ما يَجي لِلنّور، عَشان أعمالو ما يِتوَبَّخو.

²¹ لَكِن البِسَوّي الحَق يَجي لِلنّور، عَشان أعمالو يَظهَرو إنَّها مَعمولَه بِالله.“

شَهادَة يُوحَنَّا عَن يَسُوع

²² و بَعدين يَسُوع و تَلاميذو جو لِأرض اليَهُودِيَّه. و قَعَد مَعاهُم هِناك، و كان بِعَمِّد.

²³ و يُوحَنَّا كَمان كان بِعَمِّد في عينوم قَريب مِن ساليم، عَشان مويَه كَتيرَه كانَت هِناك. و ناس كانو يَجو و يِتعَمَّدو.

²⁴ عَشان لِسَّع ما كانو خَتّو يُوحَنَّا في السِّجِن في الوَكِت دا.

²⁵ و كان في سؤَال بين تَلاميذ يُوحَنَّا و واحِد يَهودي، عَن الغَسيل.

²⁶ و هُم جو لِيُوحَنَّا و قالو ليهو: ”يا مُعَلِّم، الرّاجِل الكان مَعاك في غادي الأُرْدُنّ الأنتَ شِهِدتَ ليهو، هو كَمان بِعَمِّد، و كُل النّاس بِمشو ليهو.“

²⁷ يُوحَنَّا رَدَّ و قال ليهُم: ”ما في إنسان ياخُد حاجَه، إذا الله ما أدّاها ليهو مِن السَّما.

²⁸ إنتو زاتكُم تَشهَدو لَي، إنّي قُلتَ ليكُم: أنا ما المَسيح، لَكِن أنا مَرَسَّل قِدّامو.

²⁹ و العِندو العَروسَه، هو العَريس. لَكِن صاحِب العَريس الواقِف و يَسمَع صوت العَريس، هو بِكون مَبسوط، عَشان بِسمَع صوت العَريس. عَشان كِدا، فَرَحي دا هَسَّع بِقى كامِل.

³⁰ هو لازِم يَكون أكبَر، و أنا لازِم أكون أصغَر.“

³¹ البِجي مِن فوق، هو فوق الكُل. و المِن الأرض، هو بِتاع الأرض، و مِن الأرض بِتكَلَّم. و الجّاي مِن السَّما، هو فوق الكُل.

³² و هو يَشهَد بِالشّافو و السِّمِعو. و ما في زول بِقبَل شَهادَتو.

³³ و اليَقبَل شَهادَتو خَتَّ خِتمو إن الله أمين.

³⁴ و الرَّسَّلو الله، دا هو اليتكَلَّم بِكَلام الله. عَشان الله ما بِدّي الرّوح بالميزان.

³⁵ الأبو بِحِب الإبن. و خَتَّ كُلّو شي تِحِت سُلطتو.

³⁶ هو البِآمِنو بِالإبن، ليهو الحَياة الأبَديَّه. و هو الما بِآمِنو بِالإبن، ما بِشوف الحَياة، لَكِن غَضَب الله يَبقى عَليهو.