يُوحَنَّا 2 - كِتاب العَهد الجَّديد مِن الكِتاب المُقَدَّس

العِرس في قانا

¹ و في اليوم التّالِت، كان في عِرس في قانا الجَّليل. و أُم يَسُوع كانَت هِناك.

² و يَسُوع و تَلاميذو كانو مَعزومين كَمان لِلعِرس.

³ و لَمّا الخَمر كان خَلاص، أُم يَسُوع قالَت ليهو: ”ما عِندَهُم خَمر.“

⁴ يَسُوع قال ليها: ”مالِك و مالي، يا سِت؟ ساعتي لِسَّع ما جات.“

⁵ و أُمّو قالَت لِلخَدّامين: ”البِقولو ليكُم، أعمِلوهو.“

⁶ و كان في سِتَّه زيار مِن حُجار مَوجودَه هِناك عَشان عادَة الغَسيل، زي ما اليَهود يَسَوّو دايماً. كُلّو واحِد مِنَّها يَشيل خَمسَه سِتَّه صَفايح.

⁷ يَسُوع قال ليهُم: ”أملو الزّيار مويَه.“ و مَلوها تَمام.

⁸ و بَعدين قال ليهُم: ”كُبّو مِنّو شوَيَه، و قَدِّموهو لِرَئيس العَزومَه.“ و قَدَّمو ليهو.

⁹ و لَمّا رَئيس العَزومَه شِرِب المويَه اليَسُوع غَيَّرا لِخَمر، هو ما عِرِف مِن وين جابوها، لَكِن الخَدّامين الكَبّو المويَه عِرِفو. و بَعَد دا، رَئيس العَزومَه نادى العَريس.

¹⁰ و قال ليهو: ”كُلّو زول بِقَدِّم الخَمر الكوَيسَه في الأوَّل، و لَمّا النّاس شِرِبو كَتير، بَعدين يَقَدِّم الما كوَيسَه. لَكِن إنتَ عَمَلتَ بِالعَكس. خَلّيت الخَمر الكوَيسَه لِغايَة هَسَّع.“

¹¹ و دي كانَت أوَّل العَلامات العَمَلا يَسُوع في قانا الجَّليل. و بِيَّن مَجدو. و تَلاميذو آمَنو بيهو.

يَسُوع يَنَضِّف الهيكَل

¹² و بَعَد كِدا، نَزَل لِكَفْرَنَاحُوم، هو، و أُمّو، و أخوانو، و تَلاميذو. و قَعَدو هِناك أيام قَليلَه.

¹³ و عيد الفِصَح بِتاع اليَهود كان قَريب. و يَسُوع طَلَع لِأُورُشَلِيم.

¹⁴ و لِقى في الهيكَل، ناس قاعِدين، هُم الكانو بِبيعو بَقَر و غَنَم و حَمام، و البِغَيِّرو القُروش.

¹⁵ و عَمَل صوت مِن حَبل، و طَرَد الكُل، يَعني الغَنَم و البَقَر مِن الهيكَل. و كَبَّ القُروش بِتاعَت البِغَيِّرو القُروش. و قَلَب الطَّرَبيزات بِتاعَتُم.

¹⁶ و قال لِلنّاس البِبيعو الحَمام: ”شيلو ديل مِن هِنا. ما تَخَلّو بيت أبوي يَبقى بيت تِجارَه.“

¹⁷ و تَلاميذو إتزَكَّرو إنّو مَكتوب: ”مَحَبَّه حارَّه لِبيتَك أكَلَتني.“

¹⁸ و اليَهود قالو ليهو: ”العَلامَه شِنو التَّوَرّينا إنتَ عِندَك سُلطَه عَشان تَسَوّي كِدا؟“

¹⁹ يَسُوع رَدَّ و قال ليهُم: ”كَسِّرو الهيكَل دا، و أنا أبنيهو في تَلاتَة أيام.“

²⁰ و اليَهود قالو: ”الهيكَل دا كان مَبني في سِتَّه و أربَعين سَنَه، و إنتَ بِتَبنيهو في تَلاتَة أيام؟“

²¹ لَكِن هو كان بِتكَلَّم عَن هيكَل جِسمو.

²² و عَشان كِدا، لَمّا يَسُوع قام مِن بين المَيِّتين، تَلاميذو إتزَكَّرو إنّو قال ليهُم كِدا. و آمَنو بِالكِتاب و بِالكَلام القالو ليهُم يَسُوع.

²³ و لَمّا كان في أُورُشَلِيم في عيد الفِصَح، ناس كُتار آمَنو بيهو لَمّا شافو العَلامات العَمَلا.

²⁴ لَكِن يَسُوع ما سَلّم نَفسو ليهُم، عَشان هو كان بِيَعرِف كُل النّاس،

²⁵ و عَشان هو ما كان مُحتاج لِأي زول يَشهَد عَنّو. عَشان هو نَفسو عِرِف الجّوَّه الإنسان.