يُوحَنَّا 19 - كِتاب العَهد الجَّديد مِن الكِتاب المُقَدَّس

¹ بَعدين بِيلاطُس أخَد يَسُوع و جَلَدو.

² و العَساكِر عَمَلو تاج شوك، و خَتّوهو عَلى رَاسو، و لَبَّسوهو جَلّابيَّه حَمرَه.

³ و كانو يَمشو ليهو و بِقولو: ”السَّلام، يا مَلِك اليَهود!“ و كانو يَضرُبوهو بِإيديهُم.

⁴ و بِيلاطُس مَرَق بَرَّه مَرَّه تانيَه، و قال ليهُم: ”شوفو، أنا بَطَلِّعو ليكُم بَرَّه عَشان تَعرِفو أنا ما لِقيت فيهو ذَنب واحِد.“

⁵ و يَسُوع طَلَع بَرَّه، و هو لابِس تاج الشّوك فوق رَاسو و الجَلّابيَّه الحَمرَه. و بِيلاطُس قال ليهُم: ”أهو دا الإنسان.“

⁶ و لَمّا القُسُس الكُبار و الخَدّامين شافوهو، كورَكو، و قالو: ”أصلُبو، أصلُبو!“ بِيلاطُس قال ليهُم: ”أُخدوهو إنتو، و أصلُبوهو، عَشان أنا ما لِقيت ذَنب فيهو.“

⁷ اليَهود قالو ليهو: ”عِندَنا قانون، و حَسَب قانونّا، هو لازِم يَموت، عَشان هو عَمَل نَفسو إبن الله.“

⁸ و لَمّا بِيلاطُس سِمِع الكَلام دا، خاف شَديد.

⁹ و دَخَل بيت المُدير تاني مَرَّه و قال لِيَسُوع: ”مِن وين إنتَ؟“ لَكِن يَسُوع ما رَدَّ عَليهو.

¹⁰ و بِيلاطُس قال ليهو: ”إنتَ ما داير تَرُد عَلي؟ إنتَ ما عارِف عِندي سُلطَه عَشان أفِكَّك؟ و سُلطَه عَشان أصلُبَك؟“

¹¹ يَسُوع رَدَّ عَليهو و قال: ”إنتَ ما عِندَك سُلطَه عَلي أبَداً إذا ما كان ليك سُلطَه مِن فوق. عَشان كِدا، الواحِد السَّلَّمني ليك، عِندو خَطيَّه أكبَر.“

¹² مِن الوَكِت داك بِيلاطُس، كان عاوِز يَفِكّو، لَكِن اليَهود كانو يَكورِكو، و يَقولو: ”كان إنتَ فَكّيت الزّول دا، ما تَكون صاحِب لِقَيصَر. كُل البِسَوّي نَفسو مَلِك، هو ضِد قَيصَر.“

¹³ و لَمّا بِيلاطُس سِمِع الكَلام دا، هو جاب يَسُوع بَرَّه، و قَعَد عَلى كُرسي الحُكم في مَكان إسمو بِالعِبرانيَّه، جَبَّاثَا، يَعني، البَلاط.

¹⁴ و دا كان يوم الإستِعداد لِعيد الفِصَح. الوَكِت كان السّاعَه إتناشَر تَقريباً. بَعدين بِيلاطُس قال لِليَهود: ”شوفو مَلِكُم.“

¹⁵ لَكِن كورَكو: ”أُخدو! أُخدو و أصلُبو!“ بِيلاطُس قال ليهُم: ”أصلُب المَلِك بِتاعكُم؟“ القُسُس الكُبار رَدّو عَليهو و قالو: ”ما عِندَنا مَلِك إلّا قَيصَر!“

¹⁶ بَعَد كِدا، سَلَّمو ليهُم عَشان يَصلُبوهو.

يَسُوع عَلى الصَّليب

¹⁷ و اَخَدو يَسُوع، و هو شايل صَليبو، لِلمَكان البِقولو عَنّو مَكان الجُّمجُمَه، و إسمو بِالعِبرانيَّه، جُلجُثَه.

¹⁸ و هِناك صَلَبوهو، و صَلَبو إتنين تانيين مَعاهو، واحِد مِن هِنا و واحِد مِن هِناك، و يَسُوع في الوَسِط.

¹⁹ و بِيلاطُس كَتَب كِتابَه و خَتَّ عَلى الصَّليب. و كان مَكتوب: ”يَسُوع النّاصِري، مَلِك اليَهود.“

²⁰ و كَتير مِن اليَهود قَرو الكِتابَه دي، عَشان المَحَل الهو كان إنصَلَب فيهو كان قَريب مِن المَدينَه. و كان مَكتوب بِاللُّغات العِبرانيَّه و الإغريقي و اللّاتينيَّه.

²¹ و القُسُس الكُبار قالو لِبِيلَاطُس: ”ما تَكتِب: مَلِك اليَهود، لَكِن: هو قال: أنا مَلِك اليَهود.“

²² بِيلاطُس رَدَّ و قال ليهُم: ”الكَتَبتو خَلاص، كَتَبتو.“

²³ بَعدين العَساكِر، لَمّا كانو بِصلُبو يَسُوع، اَخَدو هِدومو. و قَسَموهو أربَعَة أقسام، لِكُلّو عَسكَري قِسِم. و اَخَدو القَميص كَمان. و القَميص كان بِدون خياطَه، مَعمول حِتَّه واحدَه مِن فوق لِتِحِت.

²⁴ و قالو بَعضَهُم لِبَعض: ”ما نَشرُطو، لَكِن نَرمي قُرعَه و نَشوف القُرعَه يَقَع لِمِنو.“ عَلَشان يَتِم المَكتوب في الكِتاب: ”قَسَّمو هِدُومي بِينُم، و عَلى قَميصي رَمو قُرعَه.“ عَشان كِدا العَساكِر عَمَلو دا.

²⁵ و أُم يَسُوع، و أُخُت أُمّو، مَرْيَم مَرَة كُلوبا، و مَرْيَم المَجْدَلِيَّه وَقَفو قَريب لِصَليب يَسُوع.

²⁶ و لَمّا يَسُوع شاف أُمّو، و التِّلميذ الكان بِحِبّو واقِف قَريب، قال لِأُمّو: ”يا سِت، شوفي إبنَك.“

²⁷ و قال لِلتِّلميذ: ”شوف أُمَّك.“ و مِن السّاعَه ديك، التِّلميذ دا أخَد أُمّو لِبيتو.

موت يَسُوع

²⁸ بَعَد كِدا، يَسُوع شاف كُلّو شي كان خَلاص. و عَشان يَتِم المَكتوب في الكِتاب هو قال: ”أنا عَطشان.“

²⁹ و حَلَّه كانَت مَختوتَه مَليانَه بِخَل. و مَلو سِفِنجَه مِن الخَل، و خَتّوها عَلى عَصايَه طَويلَه، و رَفَعوها لِخَشمو.

³⁰ و لَمّا يَسُوع أخَد الخَل، قال: ”بِالحَق كِمِل.“ و دَنقَر رَاسو و سَلّم الرّوح.

³¹ و دا كان يوم الإستِعداد. و عَشان اليوم البَعدو كان سَبِت مَخصوص، اليَهود سَألو بِيلاطُس عَشان يَكسِرو رِجلينُم و يَنَزِّلوهُم. هُم ما كانو عاوِزينُم يَخَلّو الأجسام عَلى الصَّليب في السَّبِت.

³² و العَساكِر جو و كَسَرو رِجلين الأوَّل و التّاني مِن المَصلوبين مَعاهو.

³³ و لَمّا جو لِيَسُوع، ما كَسَرو رِجلينو، عَشان شافوهو مات.

³⁴ لَكِن واحِد مِن العَساكِر طَعَن جَنبو بِحَربَه، و طَوّالي دَم و مويَه طَلَعو مِن جَنبو.

³⁵ و هو الشّاف كِدا، شِهِد، و شَهادَتو حَق. و هو يَعرِف إنّو بِقول الحَق، عَشان إنتو تَآمِنو كَمان.

³⁶ و الحاجات دي حَصَلَت، عَشان يَتِم المَكتوب في الكِتاب: ”و لا واحِد مِن عِضامو بِكون مَكسور.“

³⁷ و كَمان في مَحَل تاني في الكِتاب: ”هُم بِشوفو الطَّعَنوهو.“

دَفن يَسُوع

³⁸ بَعَد دا، يُوسِف المِن الرَّامَه سأل بِيلاطُس عَشان ياخُد جِسم يَسُوع. و هو كان تِلميذ لِيَسُوع، و لَكِن في السِّر عَشان الخوف مِن اليَهود. و بِيلاطُس أدّاهو الإذن. عَشان كِدا، جا و أخَد جِسم يَسُوع.

³⁹ و نِقُدِموس كَمان جا. و أوَّل مَرَّه لَمّا هو مَشى لِيَسُوع، كان في اللّيل. هو جاب مَعاهو بُهارات مَلَخبَتَه، مِيَّة رَطل تَقريباً.

⁴⁰ و أخَد جِسم يَسُوع، و لَفّوهو في قُماش تيل مَعَ البُهارات، زي تَرتيب اليَهود لِلدَفَن.

⁴¹ و كانَت في جِنينَه في المَكان الصَّلَبو فيهو يَسُوع. و في الجِّنينَه دي كان في قَبُر جَديد ما خَتّو فيهو زول قَبل كِدا.

⁴² و خَتّو يَسُوع هِناك، عَلَشان كان يوم الإستِعداد بِتاع اليَهود، و عَشان القَبُر كان قَريب.