يُوحَنَّا 18 - كِتاب العَهد الجَّديد مِن الكِتاب المُقَدَّس

يَسُوع مُسَلَّم لِعُدوانو

¹ و لَمّا يَسُوع قال الكَلام دا، مَرَق مَعَ تَلاميذو لِلجَّمب التّاني لِوادي قِدرون. هِناك كانَت في جِنينَه، و يَسُوع و تَلاميذو دَخَلوها.

² و يَهُوذَا، البِسَلِّمني، كان يَعرِف المَكان، عَشان يَسُوع كان بِجتَمِع هِناك مَرّات كَتيرَه مَعَ تَلاميذو.

³ عَلَشان كِدا، يَهُوذَا أخَد جَماعَه مِن العَساكِر، و خَدّامين مِن القُسُس الكُبار و الفَرّيسيّين. و هُم جو لِهِناك شايلين لَمبات و سِلاح.

⁴ بَعدين يَسُوع، و هو عارِف كُل الحاجات البِجو عَليهو، مَرَق ليهُم. و قال: ”إنتو دايرين مِنو؟“

⁵ قالو ليهو: ”يَسُوع النّاصِري.“ يَسُوع قال ليهُم: ”أنا هو.“ و يَهُوذَا البِسَلِّمني كان واقِف مَعاهُم.

⁶ و لَمّا قال: ”أنا هو،“ هُم رَجَعو لِوَرا، و وَقَعو عَلى الأرض.

⁷ و سألُم تاني: ”إنتو دايرين مِنو؟“ قالو: ”يَسُوع النّاصِري.“

⁸ يَسُوع رَدَّ عَليهُم و قال: ”أنا قُلتَ ليكُم أنا هو. كان إنتو دايِرينّي، خَلّو ديل يَمرُقو.“

⁹ دا حَصَل عَشان يَتِم الكَلام القالو: ”الأدّيتُم لَي، ما إتوَدَّر مِنَّهُم و لا واحِد.“

¹⁰ و سِمْعَان بُطْرُس كان عِندو سيف. و شالو و ضَرَب عَبد رَئيس القُسُس، و قَطَع أضانو اليَمين. و إسم العَبد كان مَلخُص.

¹¹ و يَسُوع قال لِبُطْرُس: ”خُت السّيف في مَحَلّو. كُبّايَة الوَجَع الأبو أدّاني، ما بَشرَبا؟“

¹² و بَعدين العَساكِر و الضابِط بِتاعُم و خَدّامين اليَهود، قَبَضو عَلى يَسُوع و رَبَطوهو.

¹³ و جابوهو في الأوَّل لِحَنَّان، عَشان هو كان نَسيب قَيَافَا الكان رَئيس القُسُس في السَّنَه ديك.

¹⁴ و كان قَيَافَا القال لِليَهود: ”أخير زول واحِد يَموت فِشان النّاس.“

بُطْرُس يَنكُر يَسُوع تلاتَه مَرّات

¹⁵ و سِمْعَان بُطْرُس و تِلميذ تاني كانو يَتبَعو يَسُوع. و التِّلميذ داك كان مَعروف عِند رَئيس القُسُس. و كِدا هو دَخَل مَعَ يَسُوع لِحوش رَئيس القُسُس.

¹⁶ لَكِن بُطْرُس كان واقِف عِند الباب بَرَّه. و التِّلميذ التّاني، الكان مَعروف عِند رَئيس القُسُس، طَلَع بَرَّه، و كَلَّم الخَدّامَه البِتَحرَس الباب. و خَلّى بُطْرُس يَدخُل.

¹⁷ و الخَدّامَه البِتَحرَس الباب قالَت لِبُطْرُس: ”إنتَ كَمان مُش واحِد مِن تَلاميذ الإنسان دا؟“ و بُطْرُس قال ليها: ”لا، مُش أنا.“

¹⁸ و الخَدّامين و الضُّبّاط كانو واقفين، و هُم وَلَّعو النّار. و عَشان كان بارِد، كانو بِدَفّو. و بُطْرُس كان واقِف مَعاهُم يَدَفّي نَفسو.

¹⁹ و بَعَد دا، رَئيس القُسُس سأل يَسُوع عَن تَلاميذو و عَن تَعليمو.

²⁰ و يَسُوع قال ليهو: ”أنا إتكَلَّمتَ قِدّام النّاس. و أنا عَلَّمتَ كُلّو وَكِت في بُيوت الرَّب و في الهيكَل، المَكان البِلِمّو فيهو كُل اليَهود. و ما إتكَلَّمتَ أي شي بِالسِّر.

²¹ عَشان شِنو بِتَسألني أنا؟ أسأل النّاس السِّمِعو كَلامي. شوفو! ديل يَعرِفو أنا قُلتَ شِنو.“

²² و لَمّا يَسُوع قال كِدا، واحِد مِن الخَدّامين كان واقِف قَريب، و هو ضَرَب يَسُوع بِإيدو. و قال ليهو: ”كِدا تَرُد عَلى رَئيس القُسُس؟“

²³ يَسُوع رَدَّ عَليهو و قال: ”إذا إتكَلَّمتَ بِغَلَط، وَرّيني الغَلَط. و إذا إتكَلَّمتَ كوَيس، عَشان شِنو بِتَضرُبني؟“

²⁴ بَعدين حَنَّان رَسَّلو مَربوط لِقَيَافَا رَئيس القُسُس.

²⁵ و سِمْعَان بُطْرُس كان واقِف يَدَفّي نَفسو. و قالو ليهو: ”إنتَ ما واحِد مِن تَلاميذو كَمان؟“ و هو نَكَر و قال: ”مُش أنا.“

²⁶ واحِد مِن عَبيد رَئيس القُسُس، كان في. و هو نَسيب الرّاجِل البُطْرُس قَطَع أضانو. الرّاجِل دا قال ليهو: ”أنا ما شُفتَك مَعاهو في الجِّنينَه؟“

²⁷ و بُطْرُس نَكَر مَرَّه تانيَه. و طَوّالي الدّيك كورَك.

يَسُوع قِدّام بِيلاطُس

²⁸ و بَعدين جابو يَسُوع مِن قَيَافَا لِبيت المُدير. و كان الصَّباح. و هُم ما دَخَلو لِبيت المُدير، عَشان ما يَنَجِّسو نُفوسُم و لَكِن يَقدَرو ياكلو الفِصَح.

²⁹ و بِيلاطُس طَلَع ليهُم بَرَّه و قال: ”إنتو تَشتَكو بِشِنو عَلى الرّاجِل دا؟“

³⁰ هُم رَدّو و قالو ليهو: ”إذا ما كان عامِل حاجات بَطّالَه، ما كُنّا سَلَّمناهو ليك.“

³¹ بِيلاطُس قال ليهُم: ”شيلوهو إنتو، و أحكُمو عَليهو بِحَسَب القانون بِتاعكُم.“ و اليَهود قالو ليهو: ”ما عِندَنا سُلطَه نَكتُل زول.“

³² عَشان يَتِم كَلام يَسُوع، القالو عَشان يَوَرّي بيهو ياتو موت كان ماشي يَموت.

³³ و بَعدين بِيلاطُس دَخَل بيت المُدير، و نادى يَسُوع، و قال ليهو: ”إنتَ مَلِك اليَهود؟“

³⁴ يَسُوع رَدَّ عَليهو و قال: ”إنتَ بِتقول الكَلام دا مِن نَفسَك؟ ولّا ناس تانيين قالو ليك كِدا عَنّي؟“

³⁵ بِيلاطُس رَدَّ عَليهو و قال: ”أنا يَهودي؟ شَعبَك و القُسُس الكُبار سَلَّموك لَي. إنتَ عَمَلتَ شِنو؟“

³⁶ يَسُوع قال ليهو: ”مَلَكوتي ما مِن الدُّنيا دي. إذا مَلَكوتي مِن الدُّنيا دي، خَدّاميني بِحارِبو، عَشان ما بَتسَلَّم لِليَهود. لَكِن هَسَّع مَلَكوتي ما مِن الدُّنيا.“

³⁷ و بِيلاطُس قال ليهو: ”عَلى كِدا إنتَ مَلِك؟“ يَسُوع قال ليهو: ”إنتَ بِتقول أنا مَلِك. عَشان كِدا أنا إتوَلَدتَ، و عَشان كِدا أنا جيت لِلدُّنيا، عَشان أشهَد لِلحَق. كُلّو واحِد اليَحِب الحَق يَسمَع صوتي.“

³⁸ بِيلاطُس قال ليهو: ”الحَق شِنو؟“ و لَمّا قال كِدا، مَرَق تاني لِليَهود، و قال ليهُم: ”أنا ما لِقيت ذَنب فيهو.

³⁹ و عِندَكُم عادَه أفِك ليكُم واحِد في الفِصَح. إنتو دايِرينّي أفِك ليكُم مَلِك اليَهود؟“

⁴⁰ و كورَكو تاني مَرَّه و قالو: ”لا، ما الرّاجِل دا، لَكِن بَراباس.“ و بَراباس كان حَرامي.