يُوحَنَّا 17 - كِتاب العَهد الجَّديد مِن الكِتاب المُقَدَّس

صَلاة يَسُوع قُبّال موتو

¹ و لَمّا يَسُوع إتكَلَّم الكَلام دا، رَفَع عُيونو لِلسَّما و قال: ”يا أبوي، السّاعَه جات. مَجِّد إبنَك عَشان إبنَك يَمَجِّدَك كَمان.

² عَشان إنتَ أدّيت ليهو سُلطَه عَلى كُلّو زول، عَشان يَدّي الحَياة الأبَديَّه لِكُل الأدّيتُم ليهو.

³ و دي هي الحَياة الأبَديَّه، أن يَعرِفوك إنتَ الإلَه الحَقيقي وَحدَك، و يَسُوع المَسيح الرَسَّلتو.

⁴ أنا مَجَّدتَك عَلى الأرض، و أنا تَميت العَمَل الأدّيتو لَي عَشان أعمِلو.

⁵ و هَسَّع دي، يا أبوي، مَجِّدني بِنَفسَك، بِالمَجد الكان عِندي مَعاك قُبّال بِدايَة الدُّنيا.

⁶ أنا وَرّيت إسمَك لِلنّاس الأدّيتُم لَي مِن الدُّنيا. هُم كانو ليك، و إنتَ أدّيتُم لَي، و هُم حَفَظو كَلامَك.

⁷ و هَسَّع، هُم عِرِفو إن كُل الأدّيتو لَي، هو جاي مِنَّك.

⁸ عَشان الكَلام الأنتَ أدّيتو لَي، أنا أدّيتو ليهُم. و هُم قِبِلو و عِرِفو تَمام أنا جيت مِنَّك، و آمَنو إنتَ رَسَّلتَني.

⁹ أنا بَصَلّي فِشانُم. و أنا ما بَصَلّي فِشان خاطِر الدُّنيا. لَكِن بَصَلّي فِشان ديل الأدّيتُم لَي مِن الدُّنيا، عَشان هُم ليك.

¹⁰ و كُل العِندي، هو ليك. و كُل العِندَك، هو لَي. و أنا عِندي مَجد فِشانُم.

¹¹ أنا ما بَكون في الدُّنيا بَعَد دا، لَكِن هُم في الدُّنيا. و أنا جاي ليك. يا أبوي القُدّوس، أحفَظُم في إسمَك، الأدّيتُم لَي، عَشان يَكونو واحِد زي ما نِحنا واحِد.

¹² لَمّا كُنتَ مَعاهُم في الدُّنيا، كُنتَ أحفَظُم في إسمَك. الأدّيتُم لَي حَفَظتُم. و ما إتوَدَّر مِنَّهُم و لا واحِد، إلّا إبن الخَراب، عَشان يَتِم الكِتاب.

¹³ لَكِن هَسَّع أنا جاي ليك. و أنا بَتكَلَّم بِالحاجات دي في الدُّنيا، عَشان يَكون عِندَهُم في نُفوسُم فَرَح كامِل مِنّي.

¹⁴ أنا أدّيتُم كَلامَك. و ناس الدُّنيا كِرهوهُم، عَشان هُم ما مِن الدُّنيا، زي ما أنا ما مِن الدُّنيا.

¹⁵ أنا ما بَسأل عَشان تاخُدُم مِن الدُّنيا، لَكِن عَشان تَحفَظُم مِن الشَّر.

¹⁶ هُم مُش مِن الدُّنيا، زي ما أنا مُش مِن الدُّنيا.

¹⁷ قَدِّسُم في حَقَّك. كَلامَك هو الحَق.

¹⁸ زي ما رَسَّلتَني لِلدُّنيا، أنا رَسَّلتَهُم لِلدُّنيا كَمان.

¹⁹ و أنا بَقَدِّس نَفسي عَشانُم، فِشان هُم يَكونو مُقَدَّسين في الحَق كَمان.

²⁰ أنا ما بَصَلّي عَشان ديل بَس، لَكِن كَمان عَشان البِآمِنو بي بِكَلامُم.

²¹ أنا بَصَلّي عَشان كُلُّهُم بِكونو واحِد، زي ما إنتَ فِيني يا أبوي، و أنا فيك. و بَصَلّي كَمان عَشان هُم بِكونو فينا، فِشان ناس الدُّنيا بِآمِنو إنتَ رَسَّلتَني.

²² و أنا أدّيتُم المَجد الأنتَ أدّيتو لَي، عَشان يَكونو واحِد زي ما نِحنا واحِد.

²³ أنا فيهُم و إنتَ فِيني، عَشان يَكونو مَكَمَّلين لِواحِد. بِدا، خَلّي ناس الدُّنيا يَعرِفو إنتَ رَسَّلتَني، و حَبّيتُم زي ما حَبّيتني.

²⁴ يا أبوي، أنا عاوِز ديل الأدّيتُم لَي يَكونو مَعاي في المَحَل الأنا بَكون فيهو. أنا عاوِزُم يَشوفو المَجد بِتاعي الأنتَ أدّيتو لَي، عَشان إنتَ حَبّيتني قُبّال خَليقَة الدُّنيا.

²⁵ يا الأبو البار، ناس الدُّنيا ما عِرفوك، لَكِن أنا عِرِفتَك. و ديل عِرفو إنتَ رَسَّلتَني.

²⁶ و أنا وَرّيت ليهُم إسمَك، و أنا بَوَرّيهُم. و أنا بَسَوّي دا عَشان المَحَبَّه الأنتَ حَبّيتني بيهو بِكون فيهُم، و أنا أكون فيهُم.“