يُوحَنَّا 15 - كِتاب العَهد الجَّديد مِن الكِتاب المُقَدَّس

شَجَرَة العِنَب و الفُروع

¹ أنا هو شَجَرَة العِنَب الحَقيقي، و أبوي هو الجِّنايني بِتاع العِنَب.

² كُلّو فَرَع فِيني الما بِجيب ثِمار، هو بِقطَعو، و الفَرَع البِجيب ثِمار، هو بِنَضِّفو عَشان بِجيب ثِمار أكتَر.

³ إنتو هَسَّع نُضاف بِسَبَب الكَلام الكَلَّمتَكُم بيهو.

⁴ أسكُنو فِيني و أنا فيكُم. الفَرَع ما يَقدَر يَجيب ثِمار بِنَفسو إلّا يَسكُن في شَجَرَة العِنَب. و إنتو كَمان ما تَقدَرو تَجِيبو ثِمار إلّا تَسكُنو فِيني.

⁵ أنا شَجَرَة العِنَب و إنتو الفُروع. البِسكُن فِيني، و أنا فيهو، هو البِجيب ثِمار كَتير. عَشان إنتو بِدوني ما تَقدَرو تَعمِلو حاجَه.

⁶ إذا واحِد ما يَسكُن فِيني، يَرموهو بَرَّه زي الفَرَع اليَنشَف. و يَلِمّو الفُروع و يَرموهو في النّار و يَحرِقوها.

⁷ إذا تَسكُن فِيني و كَلامي يَسكُن فيكُم، إنتو بِتَطلُبو الدّايِرينو، و يَكون ليكُم.

⁸ بِدا، أبوي يِتمَجَّد إذا تَجِيبو ثِمار كَتير، و كِدا بِتكونو تَلاميذي.

⁹ زي ما الأبو حَبّاني، أنا كَمان حَبّيتكُم. أسكُنو في مَحَبَّتي.

¹⁰ إذا حَفَظتو أوامِري، بِتَسكُنو في مَحَبَّتي، زي ما أنا حَفَظتَ أوامِر أبوي، و أسكُن في مَحَبَّتو.

¹¹ أنا كَلَّمتَكُم بِدا، عَشان فَرَحي يَسكُن فيكُم، و فَرَحكُم يَتِم.

¹² دا أمري، تَحِبّو بَعضَكُم بَعض زي أنا حَبّيتكُم.

¹³ ما في إنسان عِندو مَحَبَّه أعظَم مِن كِدا، أن واحِد بِدّي نَفسو فِشان المَحبوبين.

¹⁴ إنتو مَحبوبين لَي إذا تَعمِلو زي ما بأمُركُم.

¹⁵ بَعَد دا ما بَسَمّيكُم خَدّامين، عَشان الخَدّام ما بِيَعرِف البيَعمِل سَيِدو. لَكِن أنا سَمّيتكُم مَحبوبين، عَشان أنا كَلَّمتَكُم بِكُل السِّمِعتو مِن أبوي.

¹⁶ إنتو ما إختِرتوني، لَكِن أنا إختِرتَكُم و عَيَّنتَكُم عَشان تَمشو و تَجِيبو ثِمار، و ثَمَركُم بِستَمِر. عَشان الأبو بِدّيكُم كُل البِتَطلُبوهو بِإسمي.

¹⁷ دا أمري، أن تَحِبّو بَعضَكُم بَعض.

الدُّنيا بِتَكرَه التَّلاميذ

¹⁸ إذا ناس الدُّنيا بِكرَهوكُم، أعرِفو هُم كِرِهوني قُبّالكُم.

¹⁹ إذا كُنتو مِن الدُّنيا، ناس الدُّنيا كانو بِحِبّوكُم. و إنتو مُش مِن الدُّنيا، لَكِن أنا إختِرتَكُم مِن الدُّنيا. عَلَشان كِدا، ناس الدُّنيا بِكرَهوكُم.

²⁰ إتزَكَّرو الكَلام القُلتو ليكُم: الخَدّام ما أكبَر مِن سيدو. إذا طَرَدوني، هُم ماشين بِطرُدوكُم. و إذا كانو حَفَظو كَلامي، هُم بِحفَظو كَلامكُم.

²¹ لَكِن هُم بيَعمِلو كُلّو دا ليكُم فِشان إسمي، عَشان هُم ما عارفين الرَّسَّلني.

²² إذا أنا ما جيت و كَلَّمتَهُم، ما كانَت عِندَهُم خَطيَّه. لَكِن هَسَّع ما عِندَهُم أي عُذر في خَطِيَّتُم.

²³ البِكرَهني بِكرَه أبوي كَمان.

²⁴ أنا عَمَلتَ بِينُم أعمال زول تاني ما عَمَلا. عَلَشان كِدا عِندَهُم خَطيَّه. لَكِن هَسَّع هُم شافو و كِرهوني أنا و أبوي.

²⁵ لَكِن عَشان تَتِم الكِلمَه المَكتوبَه في قانونُم: هُم كِرهوني بِدون سَبَب.

²⁶ و لَمّا المُساعِد يَجي، الأنا بَرَسِّلو ليكُم مِن الأبو، يَعني روح الحَق البِجي مِن الأبو، هو بِشهَد لَي.

²⁷ و إنتو كَمان تَشهَدو لَي، عَشان إنتو مَعاي مِن البِدايَه.