يُوحَنَّا 13 - كِتاب العَهد الجَّديد مِن الكِتاب المُقَدَّس

يَسُوع يَغَسِّل رِجلين التَّلاميذ

¹ قُبّال عيد الفِصَح، لَمّا يَسُوع عِرِف ساعتو جات عَشان يَسيب الدُّنيا دي، و يَمشي لِلأبو، هو حَبَّ النّاس بِتاعو الكانو في الدُّنيا، و حَبّاهُم لِلآخِر.

² و كان وَكِت العَشا، و إبْلِيس خَتَّ في قَلِب يَهُوذَا عَشان يَسَلِّمو ليهُم.

³ يَسُوع عِرِف إن الأبو أدّا ليهو كُلّو شي في إيدينو، و إنّو جا مِن عِند الله، و يَرجَع لِلَّه.

⁴ عَلَشان كِدا، هو قام مِن العَشا، و قَلَع هِدومو البَرّاني، و رَبَط وَسطو بِفوطَه.

⁵ و بَعدين خَتَّ مويَه في طَشت، و إبتَدا يَغَسِّل رِجلين التَّلاميذ، و يَمسَحا بِالفوطَه الكانَت مَربوطَه في وَسطو.

⁶ و جا لِسِمْعَان بُطْرُس. و بُطْرُس قال ليهو: ”يا سَيِّد، إنتَ تَغَسِّل رِجليني؟“

⁷ يَسُوع رَدَّ عَليهو و قال: ”إنتَ ما بِتَعرِف هَسَّع أنا بَعمِل شِنو، لَكِن إنتَ ماشي تَفهَم بَعدين.“

⁸ بُطْرُس قال ليهو: ”إنتَ ما تَغَسِّل رِجليني أبَداً.“ يَسُوع قال ليهو: ”إن كُنتَ ما بَغَسِّلَك، ما عِندَك جُزو مَعاي.“

⁹ سِمْعَان بُطْرُس قال ليهو: ”يا سَيِّد، مُش رِجليني بَس، لَكِن إيديني و رَاسي كَمان.“

¹⁰ يَسُوع قال ليهو: ”الإتغَسَّل ما عاوِز إلّا غَسل رِجلينو بَس، عَشان جِسمو كُلّو نَضيف. و إنتو نُضاف، لَكِن مُش كُلُّكُم.“

¹¹ و هو عِرِف مِنو داير يَسَلِّمو. عَشان كِدا قال: ”ما كُلُّكُم نُضاف.“

¹² و بَعَد ما غَسَّل رِجلينُم، و أخَد هِدومو و قَعَد في مَحَلّو تاني مَرَّه، قال ليهُم: ”إنتو بِتَعرِفو أنا عَمَلتَ ليكُم شِنو؟

¹³ إنتو بِتنادوني يا مُعَلِّم و يا سَيِّد، و إنتو قُلتو الحَق، عَشان أنا كِدا.

¹⁴ و أنا السَّيد و المُعَلِّم. أنا غَسَّلتَ رِجلينكُم. و إنتو كَمان لازِم تَغَسِّلو رِجلين بَعضَكُم بَعض.

¹⁵ أنا أدّيتكُم مَثَل، عَشان إنتو كَمان تَعمِلو زي ما أنا عَمَلتَ ليكُم.

¹⁶ الحَق الحَق أقول ليكُم، إنّو ما في عَبد أكبَر مِن سَيِدو، و لا رَسول أكبَر مِن الرَّسَّلو.

¹⁷ إذا عِرِفتو الحاجات دي، بِتكونو مُبارَكين إذا تَعمِلوهُم.

¹⁸ أنا ما بَتكَلَّم عَن كُلَّكُم. أنا عارِف النّاس الإختَرتُم. لَكِن دا عَشان يَتِم المَكتوب في الكِتاب: البياكُل مَعاي العيش، رَفَع عَلي كُراعو.

¹⁹ أقول ليكُم هَسَّع قُبّال ما يَحصَل، عَشان لَمّا يَحصَل، تَآمِنو أنا هو.

²⁰ الحَق الحَق أقول ليكُم، البِقبَل الزّول البَرَسِّلو، بِقبَلني. و البِقبَلني، بِقبَل الرَّسَّلني.“

يَسُوع يَخَبِّر بِخايِنو

²¹ لَمّا يَسُوع قال كِدا، إضطَرَب بِالرّوح، و شِهِد و قال: ”الحَق أقول ليكُم، واحِد مِنَّكُم ماشي يِسِلِّمني.“

²² و التَّلاميذ كانو يَعاينو لِبَعض، عَشان ما عِرِفو هو بِكَلِّم عَن مِنو.

²³ و واحِد مِن تَلاميذو كان يِنتَكِل عَلى صَدر يَسُوع، و يَسُوع كان بِحِبّو.

²⁴ سِمْعَان بُطْرُس أشَّر ليهو و قال: ”وَرّينا هو بِكَلِّم عَن مِنو.“

²⁵ و التِّلميذ داك إنتَكَل عَلى صَدر يَسُوع و قال ليهو: ”يا سَيِّد، هو مِنو؟“

²⁶ يَسُوع رَدَّ عَليهو و قال: ”الزّول البَدّيهو حِتَّت العيش لَمّا دَخَّلتو في المُلاح، دا هو.“ بَعدين يَسُوع دَخَّل العيش في المُلاح و أدّاهو لِيَهُوذَا إبن سِمْعَان الإِسْخَرْيُوطِي.

²⁷ و بَعَد ما أخَد العيش، الشّيطان دَخَل فيهو. و يَسُوع قال ليهو: ”الدّايِر تَعمِلو، أعمِلو قَوام.“

²⁸ و ما في واحِد مِن القاعدين في الطَّرَبيزَه فِهِم عَشان شِنو هو قال كِدا.

²⁹ عَلَشان يَهُوذَا كان عِندو الصَّندوق، بَعض مِنَّهُم فَكَّرو إنّو يَسُوع قال ليهو يَشتَري الحاجات الهُم عاوزين لِلعيد، ولّا يَدّي شي لِلمَساكين.

³⁰ عَشان كِدا، لَمّا يَهُوذَا أخَد العيش، مَرَق طَوّالي. و الدُّنيا كانَت ليل.

³¹ و لَمّا يَهُوذَا مَرَق بَرَّه، يَسُوع قال: ”هَسَّع دي، إبن الإنسان إتمَجَّد، و الله إتمَجَّد فيهو.

³² إن كان الله إتمَجَّد فيهو، الله بِمَجِّد الإبن في نَفسو، و يَمَجِّدو بِسُرعَه.

³³ يا أولادي، أنا مَعاكُم مُدَّه قِصَيرَه بَعَد دا. إنتو بِتفَتِّشو عَلي. و زي ما أنا قُلتَ لِليَهود، بَقول ليكُم: المَحَل الأنا ماشي ليهو، إنتو ما بِتَقدَرو تَجو.

³⁴ أنا بَدّيكُم أمر جَديد، عَشان تَحِبّو بَعضَكُم بَعض. زي ما أنا حَبّيتكُم، إنتو كَمان تَحِبّو بَعضَكُم بَعض.

³⁵ بِكِدا، النّاس بِيَعرِفو إنتو تَلاميذي، إذا كان عِندَكُم مَحَبَّه بَعضَكُم بَعض.“

³⁶ سِمْعَان بُطْرُس قال ليهو: ”يا سَيِّد، إنتَ ماشي وين؟“ يَسُوع رَدَّ عَليهو و قال: ”المَحَل الأنا ماشي ليهو، إنتَ ما تَقدَر تَمشي ليهو هَسَّع، و لَكِن إنتَ بِتَتبَعني في الآخِر.“

³⁷ بُطْرُس قال ليهو: ”يا سَيِّد، عَشان شِنو ما بَقدَر أتبَعَك هَسَّع؟ أنا بَدّي حَياتي فِشانَك.“

³⁸ يَسُوع رَدَّ و قال ليهو: ”إنتَ تَدّي حَياتَك فِشانّي؟ الحَق الحَق أقول ليك، قُبّال ما الدّيك يَكورِك، إنتَ ماشي تَنكِرني تلاتَه مَرّات.