يُوحَنَّا 10 - كِتاب العَهد الجَّديد مِن الكِتاب المُقَدَّس

الرّاعي و خِرفانو

¹ الحَق الحَق أقول ليكُم، هو الما بِدخُل مِن الباب لِزَريبَة الخِرفان، لَكِن يَطلَع بِطَريق تاني، الإنسان دا حَرامي و سَرّاق.

² لَكِن الإنسان البِدخُل بِالباب، هو راعي الخِرفان.

³ الغَفير يَفتَح ليهو الباب. و الخِرفان يَسمَعو صوتو، و هو يَنادي الخِرفان بِتوعو بِالأسامي، و يَقودُم بَرَّه.

⁴ و لَمّا يَمَرِّق الخِرفان لِبَرَّه، يَمشي قِدّامُم، و الخِرفان يَتبَعوهو، عَشان هُم بِيَعرِفو صوتو.

⁵ لَكِن هُم ما يَتبَعو الغَريب أبَداً، لَكِن يَهرُبو مِنّو، عَشان هُم ما بِيَعرِفو صوت الغَريبين.“

⁶ و يَسُوع قال ليهُم المَثَل دا، لَكِن هُم ما فِهمو الشّي الكان بِقولو ليهُم.

⁷ عَلَشان دا، يَسُوع قال ليهُم كَمان: ”الحَق الحَق أقول ليكُم، أنا هو باب الخِرفان.

⁸ كُل الجّو قُبّالي، هُم حَراميَّه و سَرّاقين. لَكِن الخِرفان ما سِمِعو ليهُم.

⁹ أنا هو الباب. إن كان واحِد يَدخُل بي، هو بِكون مُخَلَّص، و بِدخُل و بِطلَع و يَلقا أكل.

¹⁰ الحَرامي ما بِجي إلّا عَشان يَسرِق و يَكتُل و يَخرَب. لَكِن أنا جيت عَشان هُم يَلقو الحَياة، و يَلقوها بِالكامِل.

¹¹ أنا هو الرّاعي الصّالِح. و الرّاعي الصّالِح يَدّي حَياتو فِشان الخِرفان.

¹² و لَكِن المِأجِّر، الهو مُش الرّاعي، و الخِرفان مُش بِتوعو، لَمّا يَشوف المَرفَعين جاي، هو يَسيب الخِرفان و يَهرَب. و المَرفَعين يَمسِك الخِرفان و يَفَرتِكُم.

¹³ و المِأجِّر يَهرَب، عَشان هو مِأجِّر، و ما بِخَلّي بالو للخِرفان.

¹⁴ أنا هو الرّاعي الصّالِح. أنا بَعرِف خِرفاني، و خِرفاني بِيِعرِفوني.

¹⁵ زي ما الأبو بِيَعرِفني، أنا بَعرِف الأبو. و أنا بَدّي حَياتي عَشان الخِرفان.

¹⁶ و أنا عِندي خِرفان تانيين، و هُم ما مِن الزَّريبَه دي. ديل كَمان لازِم أجيبُم. و هُم بِسمَعو صوتي. و بَعدين يَكون مُراح واحِد و راعي واحِد.

¹⁷ و عَلَشان كِدا الأبو بِحِبّني، عَشان أنا بَدّي حَياتي، و باخُدا مَرَّه تانيَه.

¹⁸ ما في واحِد ياخُدا مِنّي، لَكِن أنا بَدّيها مِن نَفسي. عِندي سُلطَه لِأدِيها، و عِندي سُلطَه باخُدا كَمان. أنا قِبِلتَ الأمر دا مِن أبوي.“

¹⁹ و اليَهود إنقَسَمو تاني مَرَّه، بِسَبَب الكَلام دا.

²⁰ و كُتار مِنَّهُم قالو: ”هو عِندو شيطان، و هو مَجنون. عَشان شِنو بِتَسمَعو ليهو؟“

²¹ تانيين قالو: ”دا ما كَلام إنسان عِندو شيطان. الشّيطان يَقدَر يَفتَح عُيون العَميان؟“

شَك اليَهود

²² و كان عيد التَجديد في أُورُشَلِيم. و كان الوَكِت شِتا.

²³ و يَسُوع كان بِمشي في الهيكَل في بَراندات سُلَيْمَان.

²⁴ و بَعدين، اليَهود إتلَمّو حَوَليهو و قالو ليهو: ”تَخَلّينا نِستَنّا لِمِتين؟ إذا إنتَ المَسيح، قول لينا بِكَلام مَفهوم.“

²⁵ يَسُوع رَدَّ و قال ليهُم: ”أنا قُلتَ ليكُم و إنتو ما بِتآمِنو. الأعمال الأنا بَعمِلا بِإسم أبوي هُم يَشهَدو لَي.

²⁶ لَكِن إنتو ما بِتآمِنو، عَشان إنتو ما مِن خِرفاني، زي ما قُلتَ ليكُم.

²⁷ خِرفاني بِسمَعو صوتي، و أنا بَعرِفُم. و هُم يَتبَعوني.

²⁸ و أنا بَدّيهُم حَياة أبَديَّه، و هُم ما بِموتو أبَداً، و ما في واحِد يَقدَر يَشيلُم مِن إيدي.

²⁹ أبوي الأدّاهُم لَي، هو أكبَر مِن كُلَّهُم. و ما في واحِد يَقدَر يَشيلُم مِن إيد أبوي.

³⁰ أنا و الأبو واحِد.“

³¹ اليَهود رَفَعو حُجار كَمان عَشان يَكتُلوهو بيها.

³² يَسُوع رَدَّ عَليهُم و قال: ”أنا وَرّيتكُم أعمال طَيبَه كَتيرَه مِن الأبو. عَشان ياتو مِن الأعمال ديل تَضرُبوني بِالحُجار؟“

³³ اليَهود رَدّو و قالو ليهو: ”نِحنا ما بِنَضرُبَك بِحُجار عَشان عَمَل طَيب، لَكِن عَشان التَجديف، عَشان إنتَ إنسان بِتَعمِل نَفسَك تَكون الله.“

³⁴ يَسُوع رَدَّ عَليهُم و قال: ”ما مَكتوب في قانونكُم: أنا قُلتَ إنتو آلِهَه؟

³⁵ كِلمَة الله جات ليهُم و الله سَمّاهُم آلِهَه. و ما مُمكِن يَكسِر المَكتوب في الكِتاب.

³⁶ عَلَشان دا، إنتو تَقولو عَلى القَدَّسو الأبو، و رَسَّلو لِلدُّنيا: إنتَ تَجَدِّف؟ عَشان أنا قُلتَ أنا إبن الله؟

³⁷ إذا أنا ما بَعمِل أعمال أبوي، ما تَآمِنو بي.

³⁸ لَكِن إن كُنتَ أنا بَعمِلا، و إنتو ما بِتآمِنو بي، آمِنو بِالأعمال، عَشان تَعرِفو و تَفهَمو الأبو فِيني و أنا في الأبو.“

³⁹ عَشان كِدا، جَرَّبو تاني مَرَّه أن يَقبُضو عَليهو، لَكِن هو فات مِن بين إيدينُم.

⁴⁰ و رَجَع كَمان لِلطَّرف التّاني لِلأُرْدُنّ، لِلمَكان اليُوحَنَّا كان بِعَمِّد فيهو في الأوَّل، و قَعَد هِناك.

⁴¹ و ناس كُتار جو ليهو و قالو: ”يُوحَنَّا ما عَمَل و لا عَلامَه واحدَه. و لَكِن كُل الكَلام القالو يُوحَنَّا عَن الرّاجِل دا كان الحَق.“

⁴² و ناس كُتار آمَنو بيهو هِناك.