يَعْقُوب 5 - كِتاب العَهد الجَّديد مِن الكِتاب المُقَدَّس

حَذر لِلغَنيين

¹ هَسَّع أسمَعو، يا غَنيين، أبكو و كورِكو عَلى مُصيباتكُم الجّايَه.

² غِناكُم خَربان و هِدومكُم أكَلَتا العِتَّه.

³ دَهَبكُم و فِضَّتكُم صَدّو، و صَداهُم بِشهَد عَليكُم و بياكُل لَحَمكُم زي نار. حَفَظتو كَنز في الأيام الأخيرَه.

⁴ شوفو! ماهيَة الشّغّالين الإشتَغَلو في زِراعاتكُم، الإنتو ما دَفَعتو ليهُم، تَكورِك! و كوراك البِلِمّو الدُّرَه دَخَل إضنين رَب الجُّيوش.

⁵ حَياتكُم في الأرض كانَت مَليانَه حاجات طَيبَه و سُرور. شَبَعتو قُلوبكُم في يوم الضَّبيحَه.

⁶ حَكَمتو عَلى البار و كَتَلتوهو. و هو ما يَعاكِسكُم.

الصَّبر و الصَّلاه

⁷ عَلَشان كِدا، أصبُرو، يا أخوان، لِغايَة ما الرَّب بِجي. شوفو كيف المُزارِع بِستَنّى ثِمار الأرض الغالي، و يَصبُر عَليهو حَتّى هو ياخُد المَطَر البِجي بَدري و البِتأخَّر.

⁸ إنتو كَمان أصبُرو. كونو ثابتين في قُلوبكُم، فِشان الرَّب بِجي قَريب.

⁹ ما تَشتَكو بَعضَكُم عَلى بَعض، يا أخوان، عَلَشان ما يَحكُمو عَليكُم. أهو دا القاضي واقِف قِدّام الباب!

¹⁰ يا أخوان، أُخدو الأنبياء الإتكَلَّمو بِإسم الرَّب زي مَثَل لِإحتِمال الضّيق و الصَّبر.

¹¹ شوفو! نَفتَكِر العِندَهُم صَبر مُبارَكين. سِمِعتو بِصَبر أيوب، و شُفتو العَمَل ليهو الرَّب في الآخِر. الرَّب عِندو رَحمَه و مَحَنَّه كَتيرَه.

¹² فوق كُلّو شي، يا أخوان، ما تَحلِفو، ما بِالسَّما و لا بِالأرض و لا بِحَلَف تاني. لَكِن خَلّي أيوَه حَقَتكُم يَكون أيوَه، و لا حَقَتكُم يَكون لا، عَشان ما تَقَعو تِحِت الحُكم.

¹³ أي واحِد بينكُم مَظلوم؟ خَليهو يَصَلّي. أي واحِد مَبسوط؟ خَليهو يَرَتِّل مَزامير الحَمد.

¹⁴ أي واحِد بينكُم عَيّان؟ خَليهو يَنادي شُيوخ الكَنيسَه عَشان يَصَلّو ليهو، و يَمسَحوهو بِزيت بِإسم الرَّب.

¹⁵ و صَلاة الإيمان بِتَشفي الزّول العَيّان، و الرَّب بِرفَعو، و إذا عَمَل خَطيَّه، الله بِغفِر ليهو.

¹⁶ فِشان كِدا، إعتَرِفو بَعضَكُم لِبَعض بِغَلطاتكُم، و صَلّو بَعضَكُم عَشان خاطِر بَعض، عَشان الله يَشفيكُم. طَلَب البار عِندو قُوَّه كَتيرَه في عَمَلو.

¹⁷ إِيلِيَّا كان زول تِحِت الضّيق زيَنا، و صَلّى بِشِدَّه عَشان المَطَر ما يَنزِل. و ما نَزَل عَلى الأرض مُدَّة تلاتَه سِنين و سِتَّه شُهور.

¹⁸ بَعدين صَلّى مَرَّه تانيَه و المَطَر نَزَل مِن السَّما، و الأرض جابَت ثَمَرا.

¹⁹ يا أخواني، إذا واحِد مِنَّكُم يَضِل عَن الحَق، و آخَر يَرَجِّعو،

²⁰ خَليهو يَعرِف الرَّجَّع خاطي مِن غَلطَة سِكّتو، بِخَلِّص نَفسو مِن الموت و يَغَطّي خَطايا كَتيرَه.