يَعْقُوب 3 - كِتاب العَهد الجَّديد مِن الكِتاب المُقَدَّس

عَن اللِّسان

¹ يا أخواني، ما تَكونو مُعَلِّمين كَتيرين، عَشان تَعرِفو نِحنا البِعَلِّمو ناخُد حُكم أعظَم.

² عَشان كُلُّنا نَقَع في حاجات كَتيرَه. و إذا كان واحِد ما ليهو غَلطَه في الكَلام، هو راجِل كامِل، و يَقدَر يَغلِب عَلى كُل الجِّسِم كَمان.

³ لَمّا نَخُت حَديد اللِّجام في خُشوم الحَصين عَشان يَطيعونا، بِدا نَقدَر نَدَوِّر كُل أجسامُم.

⁴ شوفو! الهَبوب تَسوق المَراكِب الكَبيرَه جِدّاً. لَكِن دَفَّه صَغَيرَه جِدّاً تَحَوِّلا لِلمَحَل الرَئيس داير يَمشي ليهو.

⁵ كِدا كَمان اللِّسان، هو عُضو صَغَيِر، لَكِن يتكَلَّم بِكِبِر عَن حاجات عَظيمَه. شوفو كيف شوَيَة نار تَوَلِّع غابَه كَبيرَه.

⁶ و اللِّسان كَمان نار. هو دُنيا شَرّيرَه مَختوتَه بين أعضانا. اللِّسان يَنَجِّس الجِّسِم كُلّو، و يَوَلِّع طَريق حَياتنا كُلّو بِالنّار البِتَجي ليهو مِن جَهَنَّم.

⁷ عَشان كُلّو أنواع الوحوش، و الطُّيور، و الزَّحافات، و حَيوانات البَحَر، النّاس بِوالِفوهُم و كانو بِوالِفوهُم.

⁸ لَكِن واحِد ما بِقدَر يَوالِف اللِّسان. هو شَر، ما ليهو راحَه، مَليان بِالسِّم اليَكتُل.

⁹ بِاللِّسان نَبارِك الله الأبو، و بيهو نَلعَن النّاس الإتسَوّو عَلى شَبَه الله.

¹⁰ مِن الخَشُم الواحِد، تَمرُق البَرَكَه و اللَّعنَه. يا أخواني، دا ما لازِم يَكون كِدا.

¹¹ مُمكِن مويَه حِلوَه و مُرَّه تَجري مِن بير واحدَه؟

¹² يا أخواني، شَجَرَة تين تَقدَر تَجيب زيتون، ولّا كَرمَة عِنَب تَجيب تين؟ و كِدا كَمان البير المالحَه ما تَجيب مويَه حِلوَه.

الحِكمَه المِن السَّما

¹³ مِنو حَكيم و فاهِم بينكُم؟ خَليهو يَوَرّي مِن حَياتو الطَّيبَه، أعمالو في الوَداعَه بِتاعَت الحِكمَه.

¹⁴ و لَكِن إذا عِندَكُم حَسَد مُر وَ حُب الرّياسَه في قُلوبكُم، ما تَفَكِّرو و ما تَكَضِّبو عَلى الحَق.

¹⁵ الحِكمَه دي ما بِتَنزِل مِن فوق، لَكِن هي أرضيَه، جِسميَّه، شيطانيَه.

¹⁶ عَشان المَحَل الفيهو حَسَد و حُب الرّياسَه، هِناك في لَخبَطَه و كُلّو نوع الشَّر.

¹⁷ لَكِن الحِكمَه المِن فوق، هي في الأوَّل نَضيفَه، بَعدين مُحِب السَّلام، عِندَها صَبر. الحِكمَه دي مُطيعَه، مَليانَه رَحمَه و ثِمار كوَيس، ما فيها فارِق، و مُخلِصَه.

¹⁸ البيَعمِلو السَّلام بِزرَعو تيراب السَّلام، و هُم بِلِمّو ثِمار البِر.