يَعْقُوب 2 - كِتاب العَهد الجَّديد مِن الكِتاب المُقَدَّس

ما تَشوفو الوَش

¹ يا أخواني، ما تَشوفو وشوش النّاس و إنتو ماسكين بِإيمان رَبَّنا يَسُوع المَسيح، رَب المَجد.

² خَلّونا نَقول راجِل يَدخُل إجتِماعكُم عِندو خاتِم مِن دَهَب و في هِدوم جَميل. و يَدخُل كَمان راجِل مِسكين في هِدوم وَسخان.

³ و إنتو تَخَلّو بالكُم لِلعِندو الهِدوم الجَّميل و تَقولو ليهو: ”أقعُد هِنا في كُرسي سَمِح.“ و تَقولو لِلمِسكين: ”قوم هِناك،“ ولّا: ”أقعُد هِنا تِحِت بَمبَر كِرعينّا،“

⁴ إنتو ما عَمَلتو فارِق بين نُفوسكُم، و بِقيتو قُضاة بِأفكار شَرّيرَه؟

⁵ أسمَعو، يا أخواني المَحبوبين، الله ما إختار مَساكين الدُّنيا دي عَشان يَكونو غَنيين في الإيمان و وُرّاث المَلَكوت الوَعَد بيهو لِلبِحِبّوهو؟

⁶ لَكِن إنتو شَتَمتو المِسكين. الغَنيين ما يَظلُموكُم و يَجُروكُم لِلمَحكَمَه؟

⁷ ما هُم البِجَدِّفو عَلى الإسِم المُحتِرَم البِسَمّوكُم بيهو؟

⁸ إذا تَتِمّو القانون المَلوكيَه، بِحَسَب الكِتاب: ”تَحِب قَريبَك زي نَفسَك،“ تَعمِلو طَيب.

⁹ لَكِن إذا تَشوفو الوشوش، إنتو تَخطو، و القانون يَحكُم عَليكُم زي مُخالِفين.

¹⁰ و الزّول البِحفَظ كُل القانون و يَكَسِّر أمر واحِد، هو بِقى مُذنِب في الكُل.

¹¹ عَشان القال: ”ما تَزني،“ قال كَمان: ”ما تَكتُل.“ إذا ما تَزني و لَكِن تَكتُل، إنتَ بِقيت مُخالِف القانون.

¹² إتكَلَّمو و أعمِلو زي الماشين يِتحَكَمو بِقانون الحُرّيَّه.

¹³ عَشان الحُكم بِدون رَحمَه هو عَلى الما يَعمِل رَحمَه. الرَّحمَه تَغلِب عَلى الحُكم.

الإيمان و الأعمال

¹⁴ شِنو الفايدَه، يا أخواني، إذا واحِد يَقول إنّو عِندو إيمان و لَكِن ما عِندو أعمال؟ الإيمان داك يَقدَر يَخَلِّصو؟

¹⁵ خَلّونا نَقول أخو ولّا أُخُت عَريانين و مُحتاجين لِلأكِل اليومي.

¹⁶ و واحِد مِنَّكُم يَقول ليهُم: ”أمشو بِالسَّلام، إدَّفّو و أشبَعو.“ لَكِن هو ما بِدّيهُم البِحتاجو ليهُم لِلجِّسِم، الفايدَه شِنو؟

¹⁷ و كِدا كَمان الإيمان، إذا ما عِندو أعمال، هو مَيِّت في نَفسو.

¹⁸ لَكِن واحِد بِقول: ”إنتَ عِندَك إيمان و أنا عِندي أعمال. وَرّيني إيمانَك بِدون أعمال، و أنا بَوَرّيك إيماني بِأعمالي.“

¹⁹ إنتَ تآمِن أن الله واحِد، إنتَ تَعمِل كوَيس. و الشّياطين يآمِنو كَمان، و يَرجِفو.

²⁰ لَكِن يا الإنسان الغَشيم، إنتَ داير تَعرِف، أن الإيمان بِدون الأعمال ما ليهو فايدَه؟

²¹ إِبْرَاهِيم أبونا ما إتبَرَّر بِالأعمال لَمّا قَدَّم إِسْحَاق إبنو عَلى المَضبَح؟

²² إنتَ تَشوف أن الإيمان كان بِشتَغِل مَعَ أعمالو، و الإيمان بِقى كامِل بِأعمالو.

²³ و تَمَّ الكِتاب البقول: ”إِبْرَاهِيم آمَن بِالله، و دا حَسَب ليهو بِر.“ و سَمّوهو مَحبوب الله.

²⁴ إنتو تَشوفو أن الزّول يِتبَرَّر بِالأعمال، مُش بِالإيمان بَس.

²⁵ و كِدا كَمان، رَاحَاب الزّانيَه ما كانَت إتبَرَّرَت بِالأعمال لَمّا قِبلَت المَراسيل و رَسَّلَتُم بِطَريق تاني؟

²⁶ زي ما الجِّسِم بِدون روح هو ميت، كِدا كَمان الإيمان بِدون أعمال هو مَيِّت.