يَعْقُوب 1 - كِتاب العَهد الجَّديد مِن الكِتاب المُقَدَّس

¹ مِن يَعْقُوب خَدّام الله و الرَّب يَسُوع المَسيح، لِلإتناشَر قَبيلَه الإتَشَتَّتو بين الأُمَم. السَّلام.

الأتعاب و التَّجَارِب

² أحسِبوهو كُلّو فَرَح، يا أخواني، وَكِت ما تَلقو تَجَارِب مُختَلِفَه.

³ عارِفين إمتِحان إيمانكُم يَجيب الصَّبر.

⁴ خَلّي يَكون لِلصَّبر عَمَل كامِل، عَلَشان تَكونو كاملين و تامين، ما ناقصين في حاجَه.

⁵ و إن كان واحِد يَحتاج لِحِكمَه، خَليهو يَسأل الله البِدّي لِكُل النّاس بِالكَرامَه. و الله ما يَلوم، و هو بِدّيهو.

⁶ لَكِن لازِم يَسأل بِإيمان، و ما بِشِك كُلّو كُلّو. أي واحِد البِشِك، هو زي موج البَحَر الريح تَهِبّو لِهِنا و لِهِناك و تَرميهو.

⁷ ما تَخَلّي الزّول داك يَفتِكِر هو بِقبَل حاجَه مِن الرَّب.

⁸ الرّاجِل العِندو فِكرَتين، هو ما ثابِت في كُلّو طُرُقو.

⁹ خَلّي الأخو المِسكين يَفرَح بِمَحَلّو العالي.

¹⁰ لَكِن خَلّي الغَني يَفرَح بِمَحَلّو الواطي، عَشان زي زَهرَة القَش هو بِفوت.

¹¹ عَشان الشَّمِش تَطلَع بِحَرّا، و القَش يبَس، و زَهرَتو تَقَع، و جَمال مَنظَرا يَخسَر. و زي دا كَمان الغَني يَخسَر في وَسِط شُغلو.

¹² مُبارَك الرّاجِل البِتحَمَّل التَجرِبَه. عَشان إذا مَرَّه بِالإمتِحان، هو بِقبَل تاج الحَياة الوَعَد بيهو الرَّب لِلنّاس البِحِبّوهو.

¹³ المُجَرَّب ما لازِم يَقول: ”الله يَجَرِّبني.“ عَشان الله ما يَقدَر يَكون مُجَرَّب بِالشَّر، و هو ما يَجَرِّب أي واحِد.

¹⁴ لَكِن كُلّو واحِد يِتجَرَّب إذا شَهوَتو تَجُرّو و تَغِشّو.

¹⁵ بَعدين الشَّهوَه إذا حِملَت تَجيب خَطيَّه. و الخَطيَّه لَمّا تَكبَر تَجيب الموت.

¹⁶ ما تَكونو مَغشوشين، يا أخواني المَحبوبين.

¹⁷ كُلّو هَدِيَّه طَيبَه، و كُلّو هَدِيَّه كاملَه، هي مِن فوق، و نازلَه مِن أبو الأنوار الما فيهو فَرَق ولّا ضُل مِن تَغيير.

¹⁸ مِن إرادَة نَفسو هو وَلَدنا بِكِلمَة الحَق عَشان نَكون أوَّل ثِمار مِن كُل الخَلَقو.

سامعين و عاملين

¹⁹ أعرِفو دا، يا أخواني المَحبوبين. خَلّي كُلّو زول يَكون قَوّام في السَمَع، بِشيش في الكَلام، بِشيش في الزَّعَل.

²⁰ عَشان زَعَل الإنسان ما بيَعمِل بِر الله.

²¹ عَشان كِدا، أرمو مِنَّكُم كُلّو نَجاسَه و كَترَت شَر، و أقبَلو بِوَداعَه الكِلمَه المَزروعَه البِتَقدَر تَخَلِّص نُفوسكُم.

²² و لَكِن كونو عامِلين بِالكِلمَه، ما سامعين ليها بَس، و كِدا تَغِشّو نُفوسكُم.

²³ إن كان واحِد بِسمَع لِلكِلمَه و ما بيَعمِل بيها، هو زي راجِل يَشوف وَشّو الطَّبيعي في مِرايا.

²⁴ و هو يَشوف نَفسو و يَمشي، و بِسُرعَه يَنسى كيف هو كان.

²⁵ لَكِن البِشوف في القانون الكامِل، قانون الحُرّيَّه، و بيَعمِلو و يِستَمِر فيهو، هو بِكون مُبارَك في عَمَلو، مُش هو البِسمَع و بَعدين بِنسى.

²⁶ إذا واحِد يَفتَكِر نَفسو ديني، و هو ما عِندو سُلطَه عَلى لِسانو، هو يَغِش نَفسو. دين الزّول دا بِدون فايدَه.

²⁷ الدّين النَّضيف و البِدون عيب قِدّام الله الأبو، هو زيارَة اليَتامى و الأرامِل في تَعبُم، و حِفظ الإنسان نَفسو بِدون نَجاسَه مِن الدُّنيا.