عِبرانيين 9 - كِتاب العَهد الجَّديد مِن الكِتاب المُقَدَّس

العِبادَه في المَحَل المُقَدَّس بِتاع الدُّنيا

¹ و الإتِّفاق الأوَّل كان عِندو قَوانين العِبادَه و المَحَل المُقَدَّس بِتاع الدُّنيا.

² و هُم جَهَّزو الخيمَه، الغُرفَه البَرَّه إسِما، المَحَل القُدّوس. و كان فيهو طَرَبيزَة اللَّمبَه و طَرَبيزَه فوقا عيش التَّقدِمَه.

³ و بِوَرا السِّتارَه في غُرفَه تانيَه إسِما، قُدُس الأقداس،

⁴ و فيهو مَضبَح البَخور مِن دَهَب و تابوت الإتِّفاق، المُغَطّى مِن كُلّو جَمب بِالدَّهَب. و فيهو حَلَّه مِن الدَّهَب، فيها المَنّا، و عَصايَه هارون الجّابَت أوراق، و لوح الإتِّفاق.

⁵ و مِن فوق التّابوت، كَروبيم المَجد يَضَلِّلو كُرسي الرَّحمَه. و هَسَّع ما نَقدَر نِتكَلَّم عَن الحاجات دي مِن اوَّلا لِآخِرا.

⁶ و لَمّا جَهَّزو كُلّو حاجَه زي دا، القُسُس كانو بِدخُلو لِلخيمَه الفي بَرَّه دايماً عَشان يَعمِلو الخِدمَه.

⁷ لَكِن رَئيس القُسُس بَس كان بِدخُل المَحَل التّاني، مَرَّه واحدَه في السَّنَه. و هو ما دَخَل بِدون دَم، الهو قَدَّمو عَن نَفسو و عَن خَطايا النّاس العَمَلوها بِدون مَعرِفَه.

⁸ و كِدا، الرّوح القُدُس كان بِوَرّي إنّو الطَّرِيق لِقُدُس الأقداس ما كان مَفتوح، ما دام الخيمَه الفي بَرَّه لِسَّع واقِفَه.

⁹ و دا مَثَل لِلوَكِت الحاضِر، البِوَرّي إنّو الهَدايا و الضَّبايح الهُم قَدَّموها ما قِدِرو يَعمِلو ضَمير الزّول اليَخدِم كامِل.

¹⁰ و هُم قَوانين جِسميَّه بَس عَن أكِل و شُرُب و غَسيل مُختَلِف، و يَشتَغِلو بيهُم لِغايَة وَكِت التَّرتيب الجَّديد.

دَم المَسيح

¹¹ لَكِن المَسيح جا رَئيس قُسُس لِلحاجات الكوَيسَه الفي هَسَّع، بِالخيمَه الأكبَر و الأكمَل. و الخيمَه دي ما مَعمولَه بِإيد زول، يَعني مُش مِن الخَليقَه دي.

¹² هو ما دَخَل بِدَم غَنَم و عُجول، لَكِن بِدَم نَفسو مَرَّه واحدَه لِقُدُس الأقداس، و جاب لينا فِداء أبَدي.

¹³ و يَرُشّو دَم غَنَم و تيران و رَماد عِجلَه عَلى البِقو وَسخانين عَلَشان يَقَدِّسُم لِنَضافَة الجِّسِم.

¹⁴ و عَلَشان دا الحَق، كَم بِالأكتَر دَم المَسيح عَمَل لينا! هو قَدَّم نَفسو لِلَّه بِالرّوح الأبَدي بِدون عيب. و دَمّو بِنَضِّف ضَمايرنا مِن الأعمال المَيِّتَه عَشان نَخدِم الله الحَي.

¹⁵ و عَلَشان كِدا، المَسيح وَسيط إتِّفاق جَديد، عَشان هُم، المُختارين بِقبَلو الميراث الأبَدي المَوعود. و دا بِكون كِدا عَلَشان هو مات لِفِداء الخَطايا العَمَلوها تِحِت الإتِّفاق الأوَّل.

¹⁶ و لَمّا تَكون في وَصيَه، لازِم يَثَبِّتوها بِموت الواحِد العَمَلا.

¹⁷ عَشان الوَصيَه عِندَها قُوَّه بَس إذا واحِد يَموت، و ما بِكون عِندَها قُوَّه أبَداً وَكِت ما الواحِد العَمَلا بِعِيش.

¹⁸ عَلَشان كِدا، الإتِّفاق الأوَّل ما بِقى ثابِت بِدون دَم.

¹⁹ في الأوَّل مُوسَى كَلَّم كُل النّاس بِكُلّو أمر في القانون. و بَعَد دا هو أخَد دَم العُجول و الغَنَم، مَعَ مويَه و صوف أحمَر و زوفا. و رَشّاها عَلى الكِتاب زاتو و عَلى كُل النّاس.

²⁰ و هو قال: ”دا هو دَم الإتِّفاق الأمَركُم بيهو الله.“

²¹ و زي دا، هو رَشَّ الدَّم عَلى الخيمَه و عَلى كُلّو حاجات الخِدمَه.

²² و بِحَسَب القانون يَنَضِّفو كُل الحاجات تَقريباً بِالدَّم. و إذا ما يَكُبّو الدَّم، ما بِكون في غُفران.

²³ عَلَشان كِدا، كان لازِم يَنَضِّفو صُوَر الحاجات الفي السَّما بِالضَّبايح ديل. و لَكِن يَنَضِّفو الحاجات الفي السَّما زاتا بِضَبايح أحسَن مِن ديل.

²⁴ عَشان المَسيح ما دَخَل لِقُدُس الأقداس المَعمول بِالنّاس، و دا صورَة الحاجات الحَقيقيَه. لَكِن هو دَخَل لِلسَّما عَشان يَظهَر قِدّام وَش الله فِشانّا.

²⁵ و ما عَشان هو يَقَدِّم نَفسو مَرّات كَتيرَه زي ما رَئيس القُسُس بِدخُل قُدُس الأقداس كُلّو سَنَه بِدَم مُش حَقّو.

²⁶ عَشان إذا كِدا، المَسيح كان لازِم يَتعَب مَرّات كَتيرَه مِن خَليقَة الدُّنيا. لَكِن هَسَّع هو ظَهَر مَرَّه واحدَه في نِهايَة الزَّمَن عَشان يَوَقِّف الخَطيَّه بِضَبيحَة نَفسو.

²⁷ و مُعَيَّن لِلنّاس أن يَموتو مَرَّه واحدَه. و بَعَد دا يَكون الحُكم.

²⁸ و زي دا كَمان، المَسيح كان مَقَدَّم مَرَّه واحدَه عَشان يَشيل خَطايا ناس كُتار. و هو بِظهَر مَرَّه تانيَه، مُش عَلَشان يَشيل الخَطيَّه، لَكِن عَشان يَخَلِّصُم البِستَنّوهو.