عِبرانيين 8 - كِتاب العَهد الجَّديد مِن الكِتاب المُقَدَّس

يَسُوع رَئيس القُسُس بِتاعنا

¹ و راس الكَلام، دا هو: نِحنا عِندَنا رَئيس قُسُس زي دا، و هو قَنَّب عَن يَمين كُرسي الله العَظيم في السَّما.

² و هو بِخدِم في الحاجات المُقَدَّسَه و الخيمَه الحَقيقيَه القَوَّمو الرَّب، مُش زول.

³ عَشان كُلّو رَئيس قُسُس مُختار عَشان يَقَدِّم تَقدِمات و ضَبايح. و عَلَشان كِدا، كان ضَروري ليهو كَمان يَكون عِندو حاجَه عَشان يَقَدِّما.

⁴ و إذا هو كان عَلى الأرض، هو ما كان بِكون قَسّيس، عَشان في رُجال البِقَدِّمو التَّقدِمات حَسَب القانون.

⁵ و هُم بِخدِمو صورَه و ضُل الحاجات الفي السَّما. و زي دا، هو حَزَّر مُوسَى لَمّا هو قَرَّب يَعمِل الخيمَه و قال: ”شوف عَشان تَسَوّي كُلّو حاجَه زي الصّورَه الوَرّيتا ليك في الجَّبَل.“

⁶ و لَكِن هَسَّع المَسيح حَصَّل عَلى خِدمَه أحسَن بِكَتير عَشان بِالحَق، هو وَسيط لِإتِّفاق أحسَن و أساسو عَلى وُعود أحسَن.

⁷ عَشان إذا الإتِّفاق الأوَّل كان بِدون غَلَط، ما كانو فَتَّشو عَلى تاني.

⁸ لَكِن الله لِقى غَلَط فيهُم و قال: ”شوف! الأيام جايَه، يَقول الرَّب، لَمّا أنا بَعمِل إتِّفاق جَديد مَعَ أهل بيت إِسْرَائِيل و مَعَ أهل بيت يَهُوذَا.

⁹ مُش زي الإتِّفاق العَمَلتَ مَعَ أبَهاتُم لَمّا مَسَكتُم بِإيدُم عَشان أمَرِّقُم مِن أرض مَصر. عَلَشان هُم ما إستَمَرّو في إتِفاقي، و أنا ما خَلّيت بالي ليهُم، يَقول الرَّب.

¹⁰ أهو دا الإتِّفاق الأنا بَتَّفِق مَعَ أهل بيت إِسْرَائِيل بَعَد الأيام ديلاك، يَقول الرَّب. أنا بَخُت قَوانيني في عُقولُم، و بَكتِبا عَلى قُلوبُم. و بَكون ليهُم الله، و هُم بِكونو لَي شَعب.

¹¹ و هُم ما بِعَلِّمو كُلّو واحِد جارو ولّا كُلّو واحِد أخوهو، و بِقولو: أعرِف الرَّب، عَشان كُلُّهُم بِيِعرِفوني، مِن الصُّغار لِلكُبار.

¹² أنا بَكون رَحيم عَلى ذُنوبُم و أنا أبَداً ما بَتزَكَّر خَطاياهم بَعَد دا.“

¹³ و لَمّا يَقول: إتِّفاق جَديد، هو عَمَل الأوَّل قَديم. و الحاجَه البِقَت قَديمَه و عِندَها مُدَّه طَويلَه، بَعَد شوَيَه بِتفوت.