عِبرانيين 7 - كِتاب العَهد الجَّديد مِن الكِتاب المُقَدَّس

مَلكِصادَق القَسِّيس

¹ و مَلكِصادَق دا كان مَلِك ساليم و قَسّيس الله العالي. هو قابَل إِبْرَاهِيم لَمّا كان يَرجَع مِن كَتَل المُلوك، و بارَكو.

² و إِبْرَاهِيم أدّا ليهو العُشُر مِن كُلّو حاجَه. و مَعنى إسمو في الأوَّل: ”مَلِك البِر،“ و بَعدين كَمان: ”مَلِك ساليم،“ يَعني: ”مَلِك السَّلام.“

³ و هو بِدون أبو ولّا أُم و بِدون حِساب الجّيل و ما عِندو بِدايَة أيام ولّا نِهايَة حَياة. لَكِن هو زي إبن الله و بِستَنّى قَسّيس لِلأبَد.

⁴ و شوفو كيف الرّاجِل دا كان أكبَر، عَشان إِبْرَاهِيم، رَئيس الأبَهات، أدّاهو عُشُر مِن النِّهاب.

⁵ و بِالحَق، مِن أولاد لَاوِي، البِقو قُسُس، هُم عِندَهُم أمر حَسَب القانون أن ياخُدو العُشُر مِن النّاس، يَعني، مِن أخوانُم، مَعَ إنَّهُم إتوَلَدو مِن إِبْرَاهِيم.

⁶ و لَكِن الرّاجِل دا ما مِن أولاد لَاوِي، و هو أخَد العُشُر مِن إِبْرَاهِيم، و بارَك الكان عِندو الوُعود.

⁷ و بِدون شَك الأصغَر ياخُد البَرَكَه مِن الأكبَر.

⁸ و هِنا، رُجال بِموتو ياخُدو العُشُر. و لَكِن هِناك، هو البِشهَدو ليهو إنّو حَي يَاخُدوهو.

⁹ و يِمكِن يَقولو: لَاوِي نَفسو، الأخَد العُشُر، هو أدّا العُشُر في إِبْرَاهِيم.

¹⁰ عَلَشان لَاوِي كان لِسَّع في صُلب أبوهو إِبْرَاهِيم لَمّا مَلكِصادَق قابَل إِبْرَاهِيم.

يَسُوع زي مَلكِصادَق

¹¹ الله أدّا القانون لِلنّاس عَلى أساس تَرتيب قُسُس لَاوِي. و إذا شُغل قُسُس لَاوِي كان كامِل، لِشِنو كان في إحتِياج لِقَسّيس يَقوم مِن تَرتيب مَلكِصادَق، و مُش مِن تَرتيب هارون؟

¹² عَشان إذا يَغَيِّرو تَرتيب القُسُس، لازِم يَغَيِّرو القانون كَمان.

¹³ و هو، الإتكَلَّم كِدا عَنّو، كان مِن قَبيلَه تانيَه. و ما في واحِد مِن القَبيلَه دي العَمَل خِدمَة المَضبَح.

¹⁴ و دا باين إنّو رَبَّنا طَلَع مِن قَبيلَة يَهُوذَا، و مُوسَى ما قال أي حاجَه القَبيلَه دي بِخُصوص القُسُس.

¹⁵ و الحاجَه دي تَبَيِّن أكتَر بِكَتير إذا قَسّيس تاني زي مَلكِصادَق يَقوم.

¹⁶ و هو بِقى قَسّيس، مُش عَلى أساس قانون و أمر جِسمي، عَلى أساس قُوَّة حَياة ما عِندَها نِهايَه.

¹⁷ عَشان الكِتاب شهَد ليهو: ”إنتَ قَسّيس لِلأبَد، زي التَّرتيب بِتاع مَلكِصادَق.“

¹⁸ و كِدا، وَقَّفو الأمر الكان مِن قُبّال، عَشان كان ضَعيف و ما عِندو فايدَه.

¹⁹ عَشان القانون ما عَمَل أي شي كامِل. لَكِن رَجاء أحسَن جا، و بيهو نَقَرِّب لِلَّه.

²⁰ و دا ما كان بِدون حَلَف.

²¹ و التّانيين ديل بِقو قُسُس بِدون حَلَف، لَكِن هو بِقى قَسّيس بِحَلَف لَمّا الله قال ليهو: ”الرَّب حَلَف و ما بِغَيِّر فِكرو، إنتَ قَسّيس لِلأبَد.“

²² و بِقَدُر دا، يَسُوع بِقى مَسؤول عَشان يَكَمِّل إتِّفاق أحسَن.

²³ و بِالحَق، القُسُس ديل كانو كَتيرين، عَشان هُم ماتو و ما قِدِرو يِستَمِرّو في الخِدمَه.

²⁴ لَكِن عَلَشان يَسُوع يَعيش لِلأبَد، هو عِندو تَرتيب قَسّيس الما يَدّيهو لِتاني.

²⁵ عَلَشان كِدا، هو بِقدَر يَخَلِّص بِالتَّمام ديل اليَقَرِّبو بيهو لِلَّه، عَلَشان هو دايماً يَعيش عَشان يِتوَسَّط ليهُم.

²⁶ عَشان رَئيس قُسُس زي دا موافِق لينا. هو قُدّوس و بِدون لوم و نَضيف و مَفَرَّق مِن الخاطيين و مَرفوع أعلى مِن السَّماوات.

²⁷ و مُش زي رؤساء القُسُس ديل، هو ما عِندو إحتِياج أن يَقَدِّم كُلّو يوم ضَبايح عَن خَطاياهو في الأوَّل، و بَعدين عَن خَطايا النّاس. هو عَمَل دا مَرَّه واحدَه لَمّا قَدَّم نَفسو.

²⁸ عَشان القانون يَختار رُجال ضَعيفين يَكونو رؤساء القُسُس. و لَكِن كِلمَة الحَلَف، الجّا بَعَد القانون، إختار إبن، و هو بِقى كامِل لِلأبَد.