عِبرانيين 6 - كِتاب العَهد الجَّديد مِن الكِتاب المُقَدَّس

¹ عَلَشان كِدا، خَلّونا نَسيب التَّعاليم الفي البِدايَه عَن المَسيح، و نِتقَدَّم لِلكَمال. و ما نَخُت مَرَّه تانيَه أساس التّوبَه مِن الأعمال المَيِّتَه و الإيمان بِالله،

² و التَعليم عَن المَعموديات، و خَتَّ الإيدين، و قيامَة المَيِّتين، و الدّينونَه الأبَديَه.

³ و بِنَعمِل دا، بِإذِن الله.

⁴ و في ناس الكانو عِندَهُم النّور مِن قُبّال، و ضاقو الهَدِيَّه المِن السَّما، و بِقو شُرَكا في الرّوح القُدُس.

⁵ و هُم ضاقو كِلمَة الله الطَّيبَه، و قُوّات الزَّمَن الجّاي.

⁶ و بَعَد دا وَقَعو! ما مُمكِن نَجيبُم مَرَّه تانيَه لِلتّوبَه، عَشانُم نُفوسُم يَصلُبو إبن الله تاني مَرَّه، و يَعمِلوهو خَجلان قِدّام النّاس.

⁷ عَشان الأرض البِتَشرَب المَطَر البِيَنزِل عَليها مَرّات كَتيرَه، و تَجيب نَباتات كوَيسَه ليهُم الزَّرَعوها، الأرض دي بِتَقبَل البَرَكَه مِن الله.

⁸ لَكِن الأرض البِتجيب شوك و شَجَر الخَلا، هي ما عِندَها فايدَه، و قَريبَه مِن اللَّعنَه. و في الآخِر، بِحرُقوها.

⁹ و لَو نِحنا نِتكَلَّم كِدا، يا مَحبوبين، نِحنا عِندَنا تأكيد فيكُم لِحاجات أحسَن و حاجات البِتَمشي مَعَ الخَلاص.

¹⁰ عَشان الله ما ظالِم، و هو ما بيَنسى عَمَلكُم و المَحَبَّه الإنتو وَرّيتوها فِشان إسمو لَمّا خَدَمتو القِدِّسين، و لِسَّع بِتَخدِموهُم.

¹¹ و نِحنا عاوِزين كُلّو واحِد مِنَّكُم يَوَرّي نَفس النَّشاط لِلنِّهايَه عَشان يَعرِف كَمال الرَّجاء.

¹² و نِحنا ما عاوِزينكُم تَكونو كَسلانين، لَكِن تَعمِلو زي ديل البِالإيمان و الصَّبر الطَّويل يورَثو الوُعود.

تأكيد وَعد الله

¹³ لَمّا الله وَعَد إِبْرَاهِيم، هو حَلَف بِنَفسو، عَلَشان ما في واحِد أكبَر مِنّو عَشان يَحلِف بيهو.

¹⁴ و هو قال: ”أنا بِالحَق بَدّيك بَرَكَه، و أكَتِّر أولادَك كَتير.“

¹⁵ و كِدا، بَعَد ما إستَنّى بِالصَّبر، إِبْرَاهِيم قِبِل الوَعَد ليهو.

¹⁶ عَشان النّاس يَحلفو بِواحِد أكبَر مِنَّهُم، و الحَلَف يَثَبِّت الكَلام و يَوَقِّف كُلّو شَكلَه بِينُم.

¹⁷ و لَمّا الله كان داير يَبَيِّن كوَيس لِلنّاس الماشين يَقبَلو الوَعد إنّو ما بِغَيِّر فِكرو أبَداً، هو ثَبَّت دا بِحَلَف.

¹⁸ و الله عَمَل دا عَلَشان في حاجَتين الما بِتغَيَّرو، و ما مُمكِن هو يَكَضِّب فيهُم. عَلَشان كِدا، نِحنا الهَربنا ليهو عَشان نَمسِك بِالرَّجاء المَختوت قِدّامنا، عِندَنا شَجاعَه شَديدَه.

¹⁹ و عِندَنا الرَّجاء دا زي مِرساة لِلنَفس، أمينَه و ثابِتَه. و الرَّجاء دا يَدخُل لِداك، الفي وَرا السِّتارَه.

²⁰ و يَسُوع دَخَل هِناك قِدّامنا و فِشانّا. هو بِقى رَئيس قُسُس لِلأبَد، زي التَّرتيب بِتاع مَلكِصادَق.