عِبرانيين 3 - كِتاب العَهد الجَّديد مِن الكِتاب المُقَدَّس

يَسُوع أعظَم مِن مُوسَى

¹ عَلَشان كِدا، يا الأخوان القِدِّسين، شُرَكا الإختِيار المِن السَّما، إفتَكِرو في الرَّسول و رَئيس القُسُس بِتاع شَهادَتنا، يَسُوع.

² هو كان أمين لِلواحِد الإختارو، زي ما مُوسَى كان أمين كَمان في كُلّو بيت الله.

³ عَشان هو إتحَسَب يَكون مُستَحِق مَجد أحسَن مِن مُوسَى، زي ما بَناء البيت عِندو إحتِرام أحسَن مِن البيت.

⁴ عَشان كُلّو بيت عِندو بَناء، لَكِن الله هو بَناء كُلّو حاجَه.

⁵ و بِالحَق، مُوسَى كان أمين في كُلّو بيت الله زي خَدّام، عَشان يَشهَد لِلحاجات البِقولوها في الوَكِت الجّاي.

⁶ و لَكِن المَسيح كان أمين زي إبن عَلى بيت الله. و نِحنا بيتو إذا بِنَمسِك بِتأكيدنا و فَخرَنا في الرَّجاء، ثابِتين لِلآخِر.

تَعليم ضِد الشَّك

⁷ عَلَشان كِدا، زي الرّوح القُدُس بِقول: ”النَّهار دا، إذا تَسمَعو صوتو،

⁸ ما تَخَلّو روسينكُم يَكونو قَوّيين زي في الفِتنَه، زي في يوم التَجرِبَه في الخَلا.

⁹ هِناك أبَهاتكُم جَرَّبوني و إمتَحَنوني، و شافو أعمالي مُدَّة أربَعين سَنَه.

¹⁰ عَلَشان كِدا كُنتَ زَعلان مِن الجّيل داك، و قُلتَ، هُم دايماً بيَعمِلو الغَلطَه في قُلوبُم، و هُم ما عِرِفو طُرُقي.

¹¹ عَلَشان كِدا، حَلَفتَ في غَضَبي، هُم ما بِدخُلو في راحَتي أبَداً!“

¹² شوفو، يا أخوان، عَشان ما بِكون في أي واحِد مِنَّكُم قَلِب بَطّال و بِدون إيمان، البِرَجِّع عَن الله الحَي.

¹³ لَكِن حَزِّرو بَعضَكُم بَعض كُلّو يوم ما دام يَسَمّو الوَكِت النَّهار دا، عَلَشان راس واحِد مِنَّكُم ما بِكون قَوّي مِن غِش الخَطيَّه.

¹⁴ و نِحنا بِقينا شُرَكا في المَسيح إذا بِنَمسِك لِلآخِر بِالتّأكيد الثّابِت الكُنّا عِندَنا في الأوَّل.

¹⁵ ما دام يَقولو: ”النَّهار دا إذا تَسمَعو صوتو، ما تَخَلّو روسينكُم يَكونو قَوّيين زي في الفِتنَه.“

¹⁶ و مِنو هُم السِّمِعو و ما طاعو؟ مُش كُلُّهُم المَرَقو مِن مَصِر بِواسطَة مُوسَى؟

¹⁷ و هو كان زَعلان مِن مِنو لِمُدَّة أربَعين سَنَه؟ مُش مِنَّهُم العَمَلو خَطيَّه؟ و أجسامُم وَقَعو مَيِّتين في الخَلا؟

¹⁸ و هو حَلَف لِمِنو إنَّهُم ما بِدخُلو راحَتو أبَداً، إلّا ليهُم الما طاعو؟

¹⁹ و كِدا نَشوف هُم ما قِدِرو يدخُلو عَشان ما كانو عِندَهُم إيمان.