عِبرانيين 13 - كِتاب العَهد الجَّديد مِن الكِتاب المُقَدَّس

النَّصايح الأخيرَه

¹ خَلّو مَحَبَّة الأخوان تِستَمِر.

² و ما تَنسو تَقبَلو الغَريبين زي ضُيوف. عَلَشان بَعض مِن النّاس لَمّا عَمَلو كِدا، قِبلو مَلائكَه زي ضُيوف و هُم ما عِرفو.

³ إتزَكَّروهُم المَحبوسين، زي ما إنتو مَحبوسين مَعاهُم، و ديل المَظلومين زي ما إنتو كَمان مَظلومين.

⁴ خَلّي الزَّواج يَكون مُحتِرَم بِكُل النّاس. و الرّاجِل و المَرَه لازِم يَكونو أُمَنا. عَلَشان الله بِيَحكُم عَلى النّاس البيَعمِلو الزِّنا و الفُجّار.

⁵ أحفَظو حَياتكُم مِن مَحَبَّة القُروش، و كونو مَبسوطين مِن العِندَكُم. عَلَشان الله قال: ”أنا أبَداً ما بَسيبَك، و ما بَخَلّيك وَحدَك أبَداً.“

⁶ و عَلَشان كِدا، نَقدَر نَقول بِتأكيد: ”الرَّب مِساعِدي و أنا ما بَخاف. الزّول بِقدَر يَعمِل شِنو لَي؟“

⁷ إتزَكَّرو رؤساكُم الكَلَّموكُم بِكِلمَة الله. فَكِّرو في ثِمار حَياتُم، و خَلّو إيمانكُم يَكون زي إيمانُم.

⁸ يَسُوع المَسيح هو هو أُمبارِح، و النَّهار دا، و لِلأبَد.

⁹ ما تَخَلّو تَعاليم مُختَلِفَه و غَريبَه تَسوقكُم مِن الحَق. عَشان دا كوَيس إذا القَلِب يَكون ثابِت بِالنِّعمَه، مُش بِأكِل مَخصوص. و النّاس الأكَلوهو ما لِقو مِنّو فايدَه.

¹⁰ نِحنا عِندَنا مَضبَح، و البِخدِمو في الخيمَه ما عِندَهُم سُلطَه ياكُلو مِنّو.

¹¹ و رَئيس القُسُس يَشيل دَم البَهايِم لِقُدُس الأقداس عَشان ضَبيحَه لِلخَطيَّه. لَكِن هُم حَرَقو الأجسام بَرَّه مِن مَحَل الخيام.

¹² و عَلَشان كِدا، يَسُوع كَمان إتوَجَّع بَرَّه مِن باب المَدينَه، عَشان يَقَدِّس النّاس بِدَمّو.

¹³ كِدا، خَلّونا نَمرُق بَرَّه مِن مَحَل الخيام، حامِلين لومو.

¹⁴ عَشان ما عِندَنا هِنا مَدينَه مُستَمِرَّه، لَكِن نَطلُب المَدينَه الجّايَه.

¹⁵ عَلَشان كِدا، خَلّونا نَقَدِّم بِيَسُوع ضَبيحَة الحَمد لِلَّه في كُلّو وَكِت، يَعني ثِمار خُشومنا البِعتَرِفو بِإسمو.

¹⁶ لَكِن ما تَنسو تَعمِلو الخير، و تَشتَرِكو مَعَ التّانيين، عَشان ضَبايح زي دي تَبسِط الله.

¹⁷ طيعو رؤساكُم و كونو تِحِت سُلطَتُم. عَلَشانُم يَحرَسو عَلى نُفوسكُم زي ديل البِدّو حِساب. طيعوهُم عَلَشان شُغلُم بِكون بِفَرَح، مُش بِحُزن. عَشان إذا بِحُزن، ما في فايدَه ليكُم.

¹⁸ صَلّو فِشانّا. بِنَعرِف بِالحَق نِحنا عِندَنا ضَمير طَيب، و نِحنا عاوِزين نَعيش حَياة أمينَه في كُلّو حاجَه.

¹⁹ و بَطلُب ليكُم بِالأكتَر أن تَعمِلو دا، عَلَشان يَرَجِّعوني ليكُم بِالسُّرعَه.

²⁰ و إلَه السَّلام قَوَّم مِن بين المَيِّتين رَبَّنا يَسُوع، راعي الخِرفان، العَظيم، بِدَم الإتِّفاق الأبَدي.

²¹ الله يَعمِلكُم كامِلين في كُلّو عَمَل طَيب عَشان تَعمِلو إرَادَتو. و هو يَشتَغِل فيكُم الحاجَه التَّبسِطو كَتير، بِيَسُوع المَسيح. و لِلمَسيح المَجد لِلأبَد. آمين.

²² بَسألكُم، يا أخوان، تِتحَمَّلو كِلمَة الشَّجاعَه، عَلَشان كَتَبتَ ليكُم جَواب صَغَيِر.

²³ و أنا عاوِزكُم تَعرِفو، أخونا تِيمُوثَاوُس إتفَكّا مِن السِّجِن، و بِنشوفكُم سَوا إذا هو بِجي في وَكِت قَريب.

²⁴ سَلِّمو عَلى كُلّو رؤساكُم و عَلى كُل القِدِّسين. و هُم المِن إيطاليَا يَسَلِّمو عَليكُم.

²⁵ النِّعمَه مَعَ كُلُّكُم.