عِبرانيين 12 - كِتاب العَهد الجَّديد مِن الكِتاب المُقَدَّس

الله يأدِّب أولادو

¹ و عَلَشان في حَوَلينا سِحابَه كَبيرَه زي دي مِن الشّاهِدين، خَلّونا نَرمي مِنَّنا كُلّو حِمِل و الخَطيَّه البِتضَيقنا بِالسُّرعَه. و خَلّونا نَجري بِالصَّبر السَّبَق المَختوت قِدّامنا.

² خَلّونا نَعاين لِيَسُوع، رَئيس الإيمان و البِكَمِّلو. هو فِشان الفَرَح المَختوت قِدّامو، إتحَمَّل الصَّليب و إحتَقَر الخَجَل، و قَنَّب عَن يَمين كُرسي الله.

³ و فَكِّرو فيهو الإتحَمَّل عَداوَه زي دي لِنَفسو مِن الخاطيين، عَلَشان ما تَبقو تَعبانين في نُفوسكُم و تَقولو ما في فايدَه.

⁴ عَشان في الحَرب بِتاعكُم ضِد الخَطيَّه، إنتو لِسَّع ما قاوَمتو حَتّى الدَّم.

⁵ نِسيتو كِلمَة الشَّجاعَه اليتكَلَّم مَعاكُم زي أولاد: ”يا وَلَدي، ما تَحتَقِر تأديب الرَّب، و ما تَكونو ضَعيفين في الرَّجاء لَمّا يَوَبِّخَك.

⁶ عَشان الرَّب يأدِّب البِحِبّو، و يَجلِد كُلّو وَلَد الهو يَقبَلو.“

⁷ إتحَمَّلو التّأديب عَشان الله يَعامِلكُم زي أولاد. عَشان في أي وَلَد أبوهو ما يأدِّبو؟

⁸ لَكِن إذا إنتو بِدون تأديب، و الكُل يَشتَرِكو فيهو، إنتو أولاد زِنا و مُش أولاد بِالحَق.

⁹ و كَمان كُنّا عِندَنا أبَهات حَسَب الجِّسِم اليأدِّبونا، و إحتَرَمناهُم. و كَم بِالأكتَر لازِم نَطيع أبو الأرواح و نَعيش؟

¹⁰ و بِالحق أبَهاتنا أدَّبونا أيام قَليلَه زي ما هُم إفتَكَرو كوَيس. لَكِن الله يأدِّبنا لِفايدَتنا، عَلَشان نَشتَرِك في قَداسَتو.

¹¹ و بِالحَق، في الوَكِت الحاضِر نَفتَكِر كُلّو تأديب ما لِلفَرَح، لَكِن لِلحُزن. لَكِن بَعدين هو بِجيب ثِمار البِر و السَّلام لِديل الإتعَلَّمو مِنّو.

تَعليم و حَذر

¹² عَلَشان كِدا، شَدِّدو الإيدين التَّعبانَه و الرَّكَبين الضَّعيفَه.

¹³ أعمِلو لِكِرعينكُم سِكَك عَديلَه، عَشان الأعرَج ما يَدَوِّر مِن السِّكَّه، لَكِن بَدَل مِن دا، هو يَشفي.

¹⁴ أتبَعو السَّلام مَعَ كُل النّاس و القَداسَه، عَلَشان ما في واحِد بِشوف الله بِدون القَداسَه.

¹⁵ شوفو كوَيس عَشان واحِد ما يَقَع مِن نِعمَة الله، و عَشان عِرق مِن قَلِب مُر ما يَقوم و يَكون سَبَب التَّعب، و ناس كُتار يِتوَسَّخو.

¹⁶ و شوفو عَشان واحِد ما يَكون زاني ولّا يَكون عِندو أفكار ضِد الله، زي عِيسُو الباع حَق البِكر بِتاعو لِأكلا واحدَه.

¹⁷ عَشان إنتو بِتَعرِفو كيف بَعَد دا، لَمّا كان عاوِز يورَث البَرَكَه، هو كان مَرفوض. و هو ما لِقى طَريق لِلتّوبَه، مَعَ إنّو طَلَبا بِالدِّموع.

¹⁸ عَشان إنتو ما قَرَّبتو لِجَبَل ما مُمكِن يَلمَسو، ولّا لِنار مَوَلَّعَه، ولّا لِغَمام، و ضُلُمَّه، و هَبوب،

¹⁹ ولّا لِصوت بوق، ولّا لِصوت كِلمات. و النّاس السِمِعوهو إترَجّوهو أن ما يَزيدو ليهُم كِلمَه واحدَه،

²⁰ عَلَشانُم ما قِدرو يِتحَمَّلَو الأمر الهو أدّاهُم: ”إذا حَيوان يَلمَس الجَّبَل، لازِم يَرموهو بِحُجار.“

²¹ و المَنظَر كان مَخَوِّف حَتّى مُوسَى قال: ”أنا خايِف خوف شَديد خَلاص و بَرجِف.“

²² لَكِن إنتو قَرَبتو لِجَبَل صِهيون، لِمَدينَة الله الحَي، أُورُشَلِيم السَّماويَّه، و لِجَماعات عَشَرَة آلاف مِن المَلائكَه، و لِإجتِماع،

²³ و لِكَنيسَة المَولودين في الأوَّل، أساميهُم مَكتوبَه في السَّما. و إنتو قَرَّبتو لِلَّه، قاضي كُل النّاس، و لِأرواح البارين البِقو كامِلين،

²⁴ و لِيَسُوع وَسيط الإتِّفاق الجَّديد، و لِرَش الدَّم اليتكَلَّم حاجَه أحسَن مِن دَم هابيل.

²⁵ و شوفو كوَيس عَشان ما تَرفُضو البِتكَلَّم. عَشان هُم ما قِدرو يَهرُبو لَمّا رَفَضوهو، الحَزَّرُم عَلى الأرض. و كَم بِالأكتَر نِحنا ما نَقدَر نَهرَب إذا نَرَجِّع عَنّو اليَحَزِّرنا مِن السَّما؟

²⁶ و في الوَكِت داك صوتو هَز الأرض، لَكِن هَسَّع هو وَعَد و قال: ”مَرَّه تانيَه ما بَهِز الأرض بَس، لَكِن السَّما كَمان.“

²⁷ و الكِلمات دي: ”مَرَّه تانيَه،“ يَعني يَشيل المُمكِن يَهِزّوها، زي الحاجات المَعمولَه، عَلَشان الما مُمكِن يَهِزّوها تِستَمِر.

²⁸ عَلَشان كِدا، إذا نَقبَل مَلَكوت ما مُمكِن يَهِزّوها، خَلّونا نَشكُر الله. و خَلّونا نَقَدِّم لِلَّه خِدمَه مَقبولَه بِإحتِرام و خوف.

²⁹ عَشان إلَهنا هو نار بِتاكُل.