عِبرانيين 10 - كِتاب العَهد الجَّديد مِن الكِتاب المُقَدَّس

تَقدِمَة المَسيح مَرَّه واحدَه لِلكُل

¹ و القانون عِندو ضُل الحاجات الكوَيسَه الجّايَه، و ما صورَة الحاجات بِزاتا. و هُم كانو بِقَدِّمو الضَّبايح ديل دايماً كُلّو سَنَه. و لَكِن ما مُمكِن أبَداً يَعمِلُم كامِلين، هُم البِقَرِّبو عَشان يَعبُدو.

² و إذا دا كان مُمكِن، ما كانو وَقَفو يَقَدِّموها؟ و عَلَشان البِيَعبُدو بِقو نُضاف مَرَّه واحدَه، هُم بَعَد دا ما بِكونو عِندَهُم ضَمير عَن خَطايا.

³ لَكِن في الضَّبايح ديل، يِتذَكَّرو الخَطايا كُلّو سَنَه.

⁴ عَشان مُش مُمكِن أن دَم التّيران و الغَنَم يَشيلو الخَطايا.

⁵ عَلَشان كِدا لَمّا المَسيح جا لِلدُّنيا، هو قال: ”إنتَ ما كُنتَ عاوِز ضَبيحَه و تَقدِمَه، لَكِن جَهَّزتَ لَي جِسم.

⁶ إنتَ ما كُنتَ مَبسوط مِن ضَبايح مَحروقَه و مِن ضَبايح الخَطيَّه.

⁷ في الوَكِت دا، أنا قُلتَ: ’شوف! أنا جيت زي ما مَكتوب عَنّي في الكِتاب عَشان أعمِل إرادَتَك، يا الله.“

⁸ في الأوَّل هو قال: ”إنتَ ما كُنتَ عاوِز ضَبايح و تَقدِمات، و ضَبايح مَحروقَه و ضَبايح لِلخَطيَّه، و إنتَ ما كُنتَ مَبسوط مِنَّها.“ و هو قال كِدا مَعَ أنَّ هُم يَقَدِّموها حَسَب القانون.

⁹ و بَعَد دا هو قال: ”شوف! أنا جيت عَشان أعمِل إرادَتَك.“ هو يَشيل الأوَّل عَشان يَثَبِّت التّاني.

¹⁰ و بِالإرادَه دي، نِحنا بِقينا مُقَدَّسين بِتَقدِمَة جِسم يَسُوع المَسيح مَرَّه واحدَه.

¹¹ و كُلّو قَسّيس بِقيف كُلّو يوم و بِخدِم. و بِقَدِّم مَرّات كَتيرَه الضَّبايح ديل زاتا. لَكِن الضَّبايح ديل ما بِقدَرو يَشيلو الخَطايا أبَداً.

¹² لَكِن القَسِّيس دا، بَعَد ما قَدَّم عَن الخَطايا ضَبيحَه واحدَه لِلأبَد، هو قَنَّب عَن يَمين الله.

¹³ و مِن الوَكِت دا، هو بِنتَظِر لِغايَة ما الله يَعمِل عُدوانو بَمبَر لِكِرعينو.

¹⁴ عَشان بِتَقدِمَه واحدَه هو عَمَلُم كامِلين لِلأبَد، ديل الهو قاعِد يَقَدِّسُم.

¹⁵ و الرّوح القُدُس يَشهَد لينا بِدا كَمان، بَعَد ما هو قال:

¹⁶ ”أهو دا الإتِّفاق الأنا بَعمِل مَعاهُم بَعَد الأيام ديل، يَقول الرَّب. أنا بَخُت قَوانيني في قُلوبُم، و بَكتِبا في عُقولُم.“

¹⁷ ”و أنا أبَداً ما بَتزَكَّر خَطاياهم و ذُنوبُم بَعَد دا.“

¹⁸ و لَمّا الخَطايا كانَت مَغفورَه، ما بِتكون في تَقدِمَه عَن الخَطيَّه بَعَد دا.

خَلّونا نِستَمِر

¹⁹ عَلَشان كِدا، يا أخوان، عِندَنا تأكيد عَشان نَدخُل لِقُدُس الأقداس بِدَم يَسُوع.

²⁰ هو فَتَح لينا طَريق حَي و جَديد بِالسِّتارَه، يَعني، جِسمو.

²¹ و عِندَنا قَسّيس كَبير عَلى أهل بيت الله.

²² عَلَشان كِدا، خَلّونا نَقَرِّب بِقَلِب أمين و في كُلّو تأكيد الإيمان، و قُلوبنا مَرشوشَه عَشان يَنَضِّفنا مِن ضَمير بَطّال و أجسامنا مَغسولين بِمويَه نَضيفَه.

²³ و خَلّونا نَمسِك بِشَهادَة الرَّجاء ثابِتين، عَشان هو الوَعَدنا أمين.

²⁴ و خَلّونا نَفتَكِّر بَعَضَنا في بَعض عَشان نَحَرِّك لِلمَحَبَّه و الأعمال الطَّيبَه،

²⁵ و ما نَسيب إجتِماعنا سَوا زي ما بَعض مِن النّاس عِندَهُم عادَه. لَكِن خَلّونا نَشَجِّع بَعَضَنا بَعض و بِالزِّيادَه بِقَدُر ما تَشوفو اليوم يَقَرِّب.

²⁶ عَشان إذا نَعمِل الخَطيَّه بِإرَادَتنا بَعَد ما قِبِلنا مَعرِفَة الحَق، بَعَد دا ما في ضَبيحَه عَن الخَطايا.

²⁷ لَكِن نِستَنّا بِخوف شَديد لِلحُكم، و زَعل نار بِتاكُل عُدوان الله.

²⁸ أي واحِد الأبى قانون مُوسَى مات بِدون رَحمَه عَلى شَهادَة إتنين ولّا تلاتَه ناس.

²⁹ و شِنو بِكون لِلزّول الدّاس إبن الله تِحِت رِجلينو، و إفتَكَر الإتِّفاق القَدَّسو حاجَه وَسخانَه، و شَتَم روح النِّعمَه؟ فَكِّرو كيف هو يِستَحِق جِزا أشَدّا!

³⁰ عَشان نِحنا نَعرِفو القال: ”لَي الإنتِقام، أنا بَدفَع.“ و كَمان: ”الرَّب بِيَحكُم شَعبو.“

³¹ الوقوع في إيدين الله حاجَه مُخيفَه.

³² لَكِن إتزَكَّرو الأيام الفاتَت. في الوَكِت داك بَعَد ما قِبِلتو النّور، كان عِندَكُم صَبر عَلى حَرب صَعب مَعَ أتعاب.

³³ مَرَّه شَتَموكُم قِدّام النّاس و طَرَدوكُم، و تاني مَرَّه بِقيتو شُرَكا ديل الكانو مَطرودين زي دا.

³⁴ و إنتو تِعِبتو سَوا مَعَ المَحبوسين، و لَمّا مَسَكو بُضاعَتكُم بِقُوَّه، إنتو قِبِلتو دا بِفَرَح، عَلَشان إنتو نُفوسكُم عِرِفتو عِندَكُم مال أحسَن البِستَمِر.

³⁵ و عَلَشان كِدا، ما تَرمو عَنكُم تأكيدكُم العِندو أُجرَه كَبيرَه.

³⁶ إنتو تَحتاجو لِلصَّبر، حَتّى إذا عَمَلتو إرادَة الله، بِتَقبَلو الوَعد.

³⁷ ”عَشان بَعَد شوَيَه، هو الجّاي بِجي، و ما بِتأخَّر.

³⁸ لَكِن الإنسان البار، بِعِيش بِالإيمان. و إذا هو رَجَع لِوَرا، نَفسي ما بِكون مَبسوط مِنّو.“

³⁹ و لَكِن نِحنا ما مِن النّاس اليَرجَعو لِوَرا لِلخَراب، لَكِن نِحنا مِن النّاس البِآمِنو لِخَلاص النَّفس.