عِبرانيين 1 - كِتاب العَهد الجَّديد مِن الكِتاب المُقَدَّس

الإبن أعظَم مِن المَلائكَه

¹ الله، بَعَد ما كَلَّم الأبَهات بِالأنبياء في الزَّمَن الفات مَرّات كَتيرَه و بِطُرُق كَتيرَه،

² كَلَّمنا في الأيام الأخيرَه دي في الإبن. و هو عَمَلو وارِث لِكُلّو حاجَه، و بيهو كَمان هو عَمَل الخَليقَه كُلَّها.

³ و الإبن هو النّور بِتاع مَجد الله، و هو صورَة طَبيعَتو، و شايل كُل الحاجات بِكِلمَة قُدرَتو. و بَعَد ما هو عَمَل نَضافَه لِلخَطايا، هو قَعَد عَن يَمين الله العَظيم في السَّما.

⁴ و هو بِقى أحسَن بِكَتير مِن المَلائكَه بِحَسَب ما وِرِث إسم أحسَن مِنَّهُم.

⁵ عَشان الله لِمِنو مِن المَلائكَه في أي وَكِت قال: ”إنتَ إبني؛ أنا وَلَدتَك اليوم دا.“ و كَمان: ”أنا بَكون ليهو أبو، و هو بِكون لَي إبن؟“

⁶ و كَمان، لَمّا يَجيب البِكر لِلدُّنيا، هو يَقول: ”خَلّي كُلّو مَلائِكَة الله يَعبُدوهو.“

⁷ و عَن المَلائكَه هو يَقول: ”هو يَعمِل مَلائكَتو أرياح، و خَدّامينو لَهيب نار.“

⁸ لَكِن عَن الإبن هو يَقول: ”كُرسيَك، يا الله، لِلأبَد، و البِر بِكون عَصايَة مَلَكوتَك.

⁹ إنتَ حَبيت البِر و كِرِهتَ الشَّر. عَلَشان كِدا، الله، إلَهَك، مَسَحَك بِزيت الفَرَح أكتَر مِن شُرَكاءَك.“

¹⁰ و هو يَقول كَمان: ”إنتَ، يا رَب، في البِدايَه خَتّيت أساسات الأرض و السَّما شُغل إيدينَك.

¹¹ هُم بيَهلِكو، لَكِن إنتَ تِستَمِر. و كُلُّها بَتَبقى قَديمَه زي الهِدوم.

¹² و تَلِفّا زي التّوب، و زي التّوب يَغَيِّروها. لَكِن إنتَ إنتَ دايماً، و سَنينَك ما ليها نِهايَه.“

¹³ و الله لِمِنو مِن المَلائكَه في أي وَكِت قال: ”أقعُد عَن يَميني لِغايَة ما أعمِل عُدوانَك بَمبَر لِكِرعينَك؟“

¹⁴ مُش كُلُّهُم أرواح البِخدِمو، مَرَسَّلين لِلخِدمَه فِشانُم الماشين يورَثو الخَلاص؟