غَلَاطِيَّه 4 - كِتاب العَهد الجَّديد مِن الكِتاب المُقَدَّس

¹ و بَقول كَمان، ما دام الوَلَد البِقبَل مال أبوهو لِسَّع صَغَيِر، ما في فارِق بينو و بين العَبد، مع إنّو هو سيد كُلّو حاجَه.

² و لَكِن هو تِحِت إيدين الحارِسين و الوكَلاء لِلوَكِت أبوهو إختار ليهو.

³ و كِدا نِحنا كَمان، لَمّا كُنّا أولاد صُغار، عَمَلونا عَبيد لِقَوانين الدُّنيا.

⁴ لَكِن لَمَّن الوَكِت كان مَليان، الله رَسَّل إبنو مَولود مِن مَرَه، مَولود تِحِت القانون.

⁵ عَشان يَفدي ديل التِحِت القانون عَشان نَبقى أولاد.

⁶ عَلَشان إنتو أولاد، الله رَسَّل روح إبنو لِقُلوبنا، البِكورِك: ”أبّا، يَعني يا أبوي.“

⁷ عَشان كِدا، إنتَ بَعَد دا مُش عَبد، لَكِن إبن. و إذا كان إبن، إنتَ كَمان وارِث بِالله.

إهتِمام بُولُس لِناس غَلَاطِيَّه

⁸ مِن قَبِل، لَمّا ما كُنتو تَعرِفو الله، كُنتو عَبيد لِآلِهَه بِطَبيعَه مُش آلِهَه.

⁹ لَكِن هَسَّع إنتو تَعرِفو الله، ولّا بِالأكتَر، الله يَعرِفكُم. كيف تَرجَعو لِلقَوانين الضَّعيفَه و المِسكينَه؟ بِتدورو تَكونو عَبيد ليها مَرَّه تانيَه؟

¹⁰ إنتو بِتَحفَظو الأيام و الشُّهور و الوَكِت و السِّنين.

¹¹ بَخاف أنا تِعِبتَ فيكُم بِدون فايدَه.

¹² أطلُب مِنَّكُم، يا أخوان، كونو زَيي، عَشان أنا كَمان بِقيت زيَكُم. إنتو ما ظَلَمتوني في شي.

¹³ زي ما تَعرِفو، بِسَبَب عَيى في الجِّسِم، أنا بَشَّرتَكُم بِالإنجيل في الأوَّل.

¹⁴ و ما إنّو مَرَضي كان تَجرِبَه ليكُم، ما كُنتو مِتكَبِّرين عَلي ولّا كِرِهتوني، لَكِن قِبِلتوني زي مَلاك مِن الله، زي المَسيح يَسُوع نَفسو.

¹⁵ كُنتو مَبسوطين كَتير! مالكُم؟ أشهَد ليكُم، لَو قِدِرتو، كُنتو طَلَّعتو عُيونكُم و أدّيتوها لَي.

¹⁶ هَسَّع بِقيت عَدو ليكُم عَشان كَلَّمتَكُم الحَق؟

¹⁷ النّاس ديل غَيورين عَليكُم، و الغيرَه دي ما كوَيسَه. هُم دايرين يَفَرِّقوكُم عَنّا نِحنا، عَشان إنتو تَكونو غَيورين عَليهُم.

¹⁸ الغيرَه دايماً كوَيس لَمّا الفِكر مِنّو كوَيس، و مُش في الوَكِت البَكون مَعاكُم بَس.

¹⁹ يا أولادي، زي الأُم لَمّا تَلِد، أنا أتعَب نَفس الوَجَع حَتّى المَسيح يِتصَوَر فيكُم.

²⁰ كُنتَ بَدور أكون مَعاكُم هَسَّع و أغَير صوتي، عَشانّي مِتحَيّر فيكُم.

هاجَر و سَارَه

²¹ قولو لَي، إنتو العاوزين تَكونو تِحِت القانون. ما بِتَسمَعو القانون بِقول شِنو؟

²² عَشان مَكتوب، إِبْرَاهِيم كان عِندو وَلَدين، واحِد مِن الخَدّامَه، و التّاني مِن الحُرَّه.

²³ و لَكِن وَلَدو المِن الخَدّامَه إتوَلَد بِحَسَب الجِّسِم، و وَلَدو المِن الحُرَّه إتوَلَد بِحَسَب الوَعَد.

²⁴ و كُلّو داك مَثَل، عَشان الإتنين نِسوان ديل، هُم إتِّفاقين. الواحِد مِن جَبَل سينا، و يَلِد لِلعُبوديَه، و هو هاجَر.

²⁵ هاجَر يَعني جَبَل سينا في بِلاد العَرَب. و هو زي أُورُشَلِيم الفي هَسَّع. عَلَشان هي و أولادا، هُم عَبيد.

²⁶ لَكِن أُورُشَلِيم الفي فوق، هي حُرَّه، و هي أُم كُلُّنا.

²⁷ عَشان مَكتوب: ”أفرَحي، يا عاقِر، الما بِتَلِد. إنتي، الما تِعِبتي في الوِلادَه، كورِكي مِن الفَرَح. عَشان الخَلّوها بَراها عِندَها أولاد أكتَر مِن أولاد الإتزَوَّجَت.“

²⁸ هَسَّع إنتو، يا أخوان، زي إِسْحَاق، أولاد الوَعَد.

²⁹ لَكِن زي ما كان في الوَكِت داك، الإتوَلَد حَسَب الجِّسِم قاوَم الإتوَلَد حَسَب الرّوح. و هَسَّع بِكون كِدا كَمان.

³⁰ لَكِن الكِتاب بِقول شِنو؟ ”أطرُد الخَدّامَه و وَلَدا، عَشان وَلَد الخَدّامَه ما بياخُد شي مَعَ وَلَد الحُرَّه.“

³¹ عَلَشان كِدا، يا أخوان، نِحنا مُش أولاد الخَدّامَه، لَكِن أولاد الحُرَّه.