غَلَاطِيَّه 3 - كِتاب العَهد الجَّديد مِن الكِتاب المُقَدَّس

إيمان ولّا حِفظ القانون

¹ يا ناس غَلَاطِيَّه البَليدين! مِنو سَحَركُم؟ إنتو القِدّام عُيونكُم يَسُوع المَسيح كان مُصَوَر بينكُم مَصلوب.

² بَدور أتعَلَّم مِنَّكُم دا بَس. قِبِلتو الرّوح بِأعمال القانون؟ ولّا بِخَبَر الإيمان؟

³ كِدا إنتو بَليدين قَدُر دا؟ بَعَد ما إبتَديتو بِالرّوح، هَسَّع بِتكَمَّلو بِالجِّسِم؟

⁴ تِعِبتو قَدُر دا بِدون فايدَه؟ إذا بِالحَق يَكون بِدون فايدَه.

⁵ البِدّيكُم روحو و بيَعمِل عَجايِب بينكُم، هو بيَعمِلو عَلَشان إنتو تَحفَظو القانون ولّا عَشان بِتآمِنو السِّمِعتوها؟

⁶ و كِدا: ”إِبْرَاهِيم آمَن بِالله، و داك إتحَسَب ليهو بِر.“

⁷ عَلَشان كِدا، أفهَمو، ديل البِآمِنو، هُم أولاد إِبْرَاهِيم.

⁸ الكِتاب إتقَدَّم و شاف أن الله يَبَرِّر الأُمَم بِالإيمان. و بَشَّر إِبْرَاهِيم مِن قُبّال و قال: ”كُل الأُمَم يَكونو مُبارَكين فيك.“

⁹ عَلَشان كِدا، هُم العِندَهُم إيمان، يِتبارَكو مَعَ إِبْرَاهِيم المؤمِن.

¹⁰ كُل البِتَّكِلو عَلى أعمال القانون، هُم تِحِت لَعنَه. عَشان مَكتوب: ”مَلعون كُلّو واحِد ما يِستَمِر في كُل المَكتوب في كِتاب القانون عَشان يَعمِل بيهو.“

¹¹ و هَسَّع باين و لا واحِد يِتبَرَّر قِدّام الله بِالقانون. عَشان: ”البار بِعِيش بِالإيمان.“

¹² القانون مُش مِن الإيمان. بِالعَكس: ”الزّول البِعمِل الحاجات دي، بِعِيش بيها.“

¹³ المَسيح فَدانا مِن لَعنَة القانون، عَلَشان هو بِقى لَعنَه فِشانّا. عَلَشان مَكتوب: ”مَلعون كُلّو واحِد إتعَلَّق عَلى شَجَرَه.“

¹⁴ هو فَدانا عَشان بَرَكَة إِبْرَاهِيم تَكون لِلأُمَم في المَسيح يَسُوع، عَشان نَقبَل وَعَد الرّوح بِالإيمان.

القانون و الوَعَد

¹⁵ يا أخوان، بَقول ليكُم مَثَل مِن حَياة الزّول. ما في إنسان يَقدَر يَوَقِّف ولّا يَزيد عَلى إتِّفاق الزّول الكان مَثَبَّت.

¹⁶ الله وَعَد إِبْرَاهِيم و وَلَدو. و الكِتاب ما بِقول: ”و لِلأولاد،“ يَعني لِناس كَتيرين، لَكِن: ”و لِوَلَدَك،“ يَعني لِواحِد، الهو المَسيح.

¹⁷ و بَقول دا: الله مِن قُبّال عَمَل إتِّفاق و وَعَد يَحفَظو. القانون الجّا بَعَد أُربُعمِيَّه و تَلاتين سَنَه، ما بِقدَر يَبَطِّل الإتِّفاق داك، و كِدا يَسَوي الوَعَد بِدون فايدَه.

¹⁸ عَشان إذا كان الميراث بِالقانون، ما بِتكون بَعَد دا بِالوَعَد. لَكِن الله أدّاها لِإِبْرَاهِيم بِالوَعَد.

¹⁹ عَلَشان كِدا لِشِنو القانون؟ الله زادو بِسَبَب الذُّنوب، لِغايَة ما الوَلَد الهو وَعَد بيهو يَجي. القانون جا بِتَرتيب مَلائكَه عَلى إيد وَسيط.

²⁰ و ما في إحتِياج لِوَسيط، لَمّا يَكون في زول واحِد. و الله واحِد.

²¹ عَلَشان كِدا، القانون ضِد وُعود الله؟ أبَداً! إذا الله كان أدّا قانون قِدِر يَدّي حَياة، بِالحَق البِر كان جا بِالقانون.

²² و لَكِن الكِتاب حَبَس كُل الدُّنيا تِحِت قُوَّة الخَطيَّه. و كان كِدا عَشان يَدّي الحاجَه الهو وَعَد بيها بِإيمان بِيَسُوع المَسيح، لِلمؤمِنين.

أولاد الله

²³ و لَكِن قُبّال ما الإيمان جا، نِحنا كُنّا مَحفوظين تِحِت القانون، و مَقفول عَلينا حَتّى الإيمان الجّاي يَظهَر.

²⁴ و كِدا القانون كان مُعَلِّمنا البِقودنا لِلمَسيح، عَشان نِتبَرَّر بِالإيمان.

²⁵ و لَكِن بَعَد ما جا الإيمان، نِحنا بَعَد دا مُش تِحِت مُعَلِّم القانون.

²⁶ عَشان كُلُّكُم أولاد الله بِالإيمان بِالمَسيح يَسُوع.

²⁷ عَشان كُلُّكُم الإتعَمَّدتو لِلمَسيح، لِبِستو المَسيح.

²⁸ و كِدا، ما في يَهودي ولّا إغريقي. ما في عَبد ولّا حُر. ما في راجِل ولّا مَرَه. عَشان كُلُّكُم واحِد في المَسيح يَسُوع.

²⁹ إذا كان إنتو لِلمَسيح، كِدا إنتو أولاد إِبْرَاهِيم، و وُرّاث بِحَسَب الوَعَد.