غَلَاطِيَّه 2 - كِتاب العَهد الجَّديد مِن الكِتاب المُقَدَّس

بُولُس و الرُّسُل التّانيين

¹ و بَعَد أربَعتاشَر سَنَه، طَلَعتَ مَرَّه تانيَه لِأُورُشَلِيم مَعَ بَرْنَابَا، و أخَدتَ مَعاي تِيطُس كَمان.

² مَشيت عَلَشان الله وَرّاني بِرؤيا. و عَلَّمتَهُم الإنجيل البَبَشِّر بيهو بين الأُمَم. لَكِن عَمَلتَ دا بَراي قِدّام المُحتَرمين، مِن خوف يِمكِن أنا بَجري، ولّا كُنتَ جَريت بِدون فايدَه.

³ لَكِن تِيطُس، الكان مَعاي، و هو إغريقي، ما جَبَروهو يَكون مُطَهَّر.

⁴ و لَكِن كانو في أخوان كَضّابين دَخَلو بينَنا بِالسِّر. و هُم إندَسو عَشان يَحرَسو بِالسِّر حُرّيَتنا العِندَنا في المَسيح يَسُوع، عَشان يَعمِلونا عَبيد.

⁵ و ما سِمِعنا ليهُم و لا ساعَه، عَشان نَحفَظ ليكُم حَق الإنجيل.

⁶ و لَكِن المُحتَرمين ما زادو و لا شي لِبِشارتي. و المُحتَرمين كانو شِنو ما بِهِمّني، عَشان الله ما بِشوف الوشوش.

⁷ بِالعَكس، هُم شافو الله أدّاني خِدمَة بِشارات الإنجيل لِلما مُطَهَّر، زي ما هو أدّا بُطْرُس خِدمَة بِشارات الإنجيل لِلمُطَهَّر.

⁸ عَشان هو، العَمَل في بُطْرُس عَشان يَكون رَسول لِلمُطَهَّر، عَمَل فِيني كَمان عَشان أكون رَسول لِلأُمَم.

⁹ و يَعْقُوب و بُطْرُس و يُوحَنَّا، و هُم المُحتَرمين زي عِمدان، أدّاني أنا و بَرْنَابَا يَمين الشَّرِكَه، لَمّا عِرفو النِّعمَه الأدّاني الله. هُم إتَّفَقو نِحنا نَمشي لِلأُمَم و هُم لِلمُطَهَّر.

¹⁰ هُم طَلَبو مِنَّنا بَس نِزَكَّر المَساكين. و دا بِزاتو كُنتَ مُستَعِد أسَوّيهو.

بُولُس يَقاوِم بُطْرُس

¹¹ لَكِن لَمّا بُطْرُس جا لِأَنْطَاكِيَه، أنا عاكَستو لِوَشّو، عَشان الحَق كان عَليهو.

¹² عَشان قُبّال ما بَعض مِن الرُّجال جو مِن يَعْقُوب، هو كان ياكُل مَعَ الأُمَم. لَكِن لَمّا هُم وِصلو، كان يَمرُق مِنَّهُم و يَفَرِّق نَفسو، عَشان خاف مِنَّهُم المُطَهَّرين.

¹³ و باقي اليَهود إشتَرَكو مَعاهو في النِّفاق، حَتّى ساقو بَرْنَابَا لِنِفاقُم.

¹⁴ و لَمّا شُفتُم ما ماشين دُغري بِحَسَب حَق الإنجيل، قُلتَ لِبُطْرُس قِدّام كُلَّهُم: ”إنتَ يَهودي و تَعيش زي الأُمَم، و ما زي اليَهود. لِشِنو تَجبُر الأُمَم يَعِيشو زي اليَهود؟“

¹⁵ نِحنا بِالوِلادَه يَهود، و نِحنا ما مِن الأُمَم خاطيين.

¹⁶ و بِنَعرِف الزّول ما يِتبَرَّر بِأعمال القانون، لَكِن بِالإيمان بِيَسُوع المَسيح. نِحنا كَمان آمَنّا بِيَسُوع المَسيح عَشان نِتبَرَّر بِالإيمان بِالمَسيح، مُش بِأعمال القانون. عَلَشان و لا واحِد يِتبَرَّر بِأعمال القانون.

¹⁷ و لَكِن إذا نِحنا نَطلُب نِتبَرَّر في المَسيح و يَلقونا نِحنا كَمان خاطيين، دا يَعني المَسيح يَخدِم الخَطيَّه؟ مُش مُمكِن!

¹⁸ و إذا كان أبني مَرَّه تانيَه الخَرَبتو، أوَرّي نَفسي مُخالِف القانون.

¹⁹ عَشان بِالقانون أنا مُتَّ لِلقانون، عَشان أعيش لِلَّه.

²⁰ إنصَلَبتَ مَعَ المَسيح. و أنا ما بَعيش تاني، لَكِن المَسيح، هو بِعِيش فِيني. و الحَياة البَعيشا هَسَّع في الجِّسِم، بَعيشا في الإيمان بِإبن الله الحَبّاني، و أدّا نَفسو فِشانّي.

²¹ أنا ما بَرفُض نِعمَة الله، عَشان إذا البِر بِالقانون، المَسيح مات بِدون فايدَه.