غَلَاطِيَّه 1 - كِتاب العَهد الجَّديد مِن الكِتاب المُقَدَّس

¹ مِن بُولُس، هو رَسول، مُش مِن النّاس، و لا بِزول، لَكِن بِيَسُوع المَسيح و الله الأبو القَوَّمو مِن بين المَيِّتين.

² و مِن كُل الأخوان المَعاي، لِكَنايس غَلَاطِيَّه.

³ نِعمَه ليكُم و سَلام مِن الله الأبو و رَبَّنا يَسُوع المَسيح.

⁴ هو أدّا نَفسو فِشان خَطايانا، عَشان يَفدينا مِن الزَّمَن الحاضِر البَطّال، بِحَسَب إرادَة إلَهنا و أبونا.

⁵ ليهو المَجد لِلأبَد. آمين.

ما في إنجيل تاني

⁶ أنا بَستَغرَب عَشان إنتو بِسُرعَه كِدا تَهرَبو مِن النّاداكُم بِنِعمَة المَسيح لِإنجيل تاني.

⁷ بِالحَق ما في إنجيل تاني. لَكِن بَعض مِن النّاس يَلَخبِتكُم، و بِدورو يَغَيِّرو إنجيل المَسيح.

⁸ لَكِن، إذا نِحنا، ولّا مَلاك مِن السَّما بَشَّرناكُم بِإنجيل تاني، الما بَشَّرناكُم بيهو، خَليهو يَكون مَلعون.

⁹ زي ما قُلتَ ليكُم قُبّال، هَسَّع بَقول تاني مَرَّه، إذا واحِد يَبَشِّركُم بِإنجيل تاني الما قِبِلتوهو، خَليهو يَكون مَلعون.

¹⁰ هَسَّع بَطلُب أكون مَقبول قِدّام النّاس، ولّا قِدّام الله؟ ولّا بَطلُب أن أبسِط النّاس؟ إذا أنا لِسَّع أبسِط النّاس، ما بَكون خَدّام لِلمَسيح.

كيف الله إختار بُولُس

¹¹ أخَبِّركُم، يا أخوان، الإنجيل البَشَّرتَكُم بيهو، مُش مِن زول.

¹² أنا ما قِبِلتو مِن زول، ولّا إتعَلَّمتو مِن زول، لَكِن قِبِلتو بِرؤيا يَسُوع المَسيح.

¹³ عَشانكُم سِمِعتو بِطَريق حَياتي قُبّال في الدّين اليَهودي، كيف كُنتَ بَطرُد كَنيسَة الله بِشِدَّه، و جَرَّبتَ أخَرِّبا.

¹⁴ و كُنتَ بَتقَدَّم في دين اليَهودي فوق كَتيرين مِن أصحابي في أُمَّتي، و كُنتَ أشَد مِنَّهُم في الغيرَه في عادات أبَهاتي.

¹⁵ لَكِن الله، الإختارني مِن بَطُن أُمّي، و ناداني بِنِعمَتو،

¹⁶ كان مَبسوط يَوَرّي إبنو فِيني، عَشان أبَشِّر بيهو بين الأُمَم. و في الوَكِت داك أنا ما سألتَ أي زول يَدّيني نَصيحَه.

¹⁷ و ما طَلَعتَ لِأُورُشَلِيم لِلرُّسُل، الهُم كانو رُسُل مِن قَبلي. لَكِن طَوّالي مَشيت لِبِلاد العَرَب. و بَعَد دا رَجَعتَ لِدِمَشق.

¹⁸ و بَعَد تلاتَه سِنين، طَلَعتَ لِأُورُشَلِيم عَشان أزور بُطْرُس، و قَعَدتَ مَعاهو خَمَستاشَر يوم.

¹⁹ و ما شُفتَ أي واحِد مِن الرُّسُل إلّا يَعْقُوب، أخو الرَّب.

²⁰ و البَكتِب ليكُم هو قِدّام الله، و ما بَكَضِّب فيهو.

²¹ و بَعَد دا، جيت لِبِلاد سُورِيَّه و كِيلِيكِيَّا.

²² و ما كُنتَ مَعروف بِالوَش قِدّام كَنايس اليَهُودِيَّه الفي المَسيح.

²³ هُم كانو بِسمَعو بَس البقول: ”الكان بِطرُدنا مِن قُبّال، هَسَّع بِبَشِّر بِالإيمان الكان بِخَرِّبو قُبّال.“

²⁴ و كانو بِمَجِّدو الله فِيني.