أفَسُس 6 - كِتاب العَهد الجَّديد مِن الكِتاب المُقَدَّس

الأولاد و الوالِدين

¹ يا أولاد، طيعو والِديكُم في الرَّب، عَشان دا صَحيح.

² ”أحتَرِم أبوك و أُمَّك،“ الهو أوَّل أمر مَعَ وَعَد.

³ ”عَلَشان بِكون كوَيس مَعاك، و تَعيش مُدَّه طَويلَه عَلى الأرض.“

⁴ و إنتو، يا أبَهات، ما تَزَعِّلو أولادكُم، لَكِن رَبّوهُم في تأديب و تَعليم الرَّب.

الخَدّامين و الأسياد

⁵ يا خَدّامين، طيعو أسيادكُم حَسَب الجِّسِم بِإحتِرام و خوف، و إخلاص القَلِب، زي لِلمَسيح.

⁶ ما تَخدِموهُم لَمّا هُم يَعاينو ليكُم بَس عَشان تَعمِلوهُم مَبسوطين مِنَّكُم. لَكِن زي خَدّامين المَسيح، أعمِلو إرادَة الله مِن القَلب.

⁷ أخدِمو مِن قَلب طَيب زي لِلرَّب و مُش لِلنّاس،

⁸ عَلَشان إنتو بِتَعرِفو كُلّو واحِد اليَعمِل حاجَه طَيبَه، هو بِقبَل زيهو مِن الرَّب، إذا هو عَبد ولّا حُر.

⁹ و إنتو، يا أسياد، أعمِلو ليهُم زات الحاجات، و خَلّو التَّهديد، عَشان إنتو تَعرِفو إنّو سَيِّدُم و سَيِدكُم هو في السَّما. و هو ما بِقبَل الوشوش.

سِلاح الله

¹⁰ و في الآخِر، يا أخواني، كونو قَوّيين في الرَّب و في شِدَّة قُوَّتو.

¹¹ ألبَسو سِلاح الله عَشان بِتَقدَرو تَقيفو و تَقاوِمو كُلّو غِش بِتاع إبْلِيس.

¹² عَشان ما نَحارِب دَم و لَحَم، لَكِن الحُكّام و السَّلاطين و رؤساء ضَلام الدُّنيا دي، و جُيوش روحيَّه بِتاعَت الشَّر في مَحَلّات عاليَه.

¹³ عَلَشان كِدا، شيلو سِلاح الله الكامِل، عَشان تَقدَرو تَكونو ثابِتين في اليوم الشَّرّير. و بَعَد ما تَكَمِّل كُلّو شي، تَقيفو.

¹⁴ قُومو و كونو ثابِتين، صُلبكُم مَربوط بِحِزام الحَق، و لابِسين دِرِع البِر.

¹⁵ و زي جِزَم لِكِرعينكُم، جَهِّزو عَشان تَبَشِّرو بِإنجيل السَّلام.

¹⁶ و فوق كُلّو شي، شيلو دَرَقَة الإيمان البيهو بِتَقدَرو تَكتُلو كُلّو نِشّابات النّار بِتاعَت الشَّرّير.

¹⁷ و أُخدو بَرنيطَة الخَلاص، و سيف الرّوح الهو كِلمَة الله.

¹⁸ صَلّو دايماً بِكُلّو صَلاه و طَلَب في الرّوح. و خَلّو بالكُم لِدا و أحرِسو و صَلّو كُلّو وَكِت بِطَلَب عَشان كُل القِدِّسين.

¹⁹ و صَلّو فِشانّي لَمّا أفتَح خَشمي عَشان أتكَلَّم، يَدّيني كَلام عَلَشان أوَرّي سِر الإنجيل بِدون خوف.

²⁰ و أنا سَفير في جَنازِير فِشان الإنجيل. و صَلّو عَلَشان أتكَلَّم بِشَجاعَه زي أنا لازِم أتكَلَّم.

²¹ تِيخِيكُس، الأخو المَحبوب، و الخَدّام الأمين في الرَّب، بِكَلِّمكُم بِكُلّو شي عَشان بِتَعرِفو كيف أنا و أنا بَعمِل شِنو.

²² أنا رَسَّلتو ليكُم بِالسَّبَب دا عَشان تَعرِفو كيف نِحنا، و عَشانو يَدّيكُم شَجاعَه.

²³ سَلام لِلأخوان، و مَحَبَّه بِإيمان مِن الله الأبو و الرَّب يَسُوع المَسيح.

²⁴ النِّعمَه مَعَ كُل البِحِبّو رَبَّنا يَسُوع المَسيح بِمَحَبَّه ما بِتموت.