أفَسُس 5 - كِتاب العَهد الجَّديد مِن الكِتاب المُقَدَّس

¹ أعمِلو زي ما الله بيَعمِل، زي أولاد مَحبوبين.

² و عيشو في المَحَبَّه، زي المَسيح حَبّانا و أدّا نَفسو عَشان خاطِرنا، تَقدِمَه و ضَبيحَه لِلَّه زي ريحَه كوَيسَه.

³ و ما تِتكَلَّمو أبَداً مَعَ بَعض عَن الزِّنا و كُلّو نَجاسَه و الطَّمَع، زي ما يَوافِق القِدِّسين.

⁴ و كِدا ما تِتكَلَّمو كَلام وَسخان ولّا بَليد ولّا كَلام خَفيف الما يَوافِق. لَكِن أدّو الشُّكر لِلَّه.

⁵ عَشان إنتو بِتَعرِفو دا، كُل البيَعمِلو الزِّنا ولّا بِكونو نَجِسين، ولّا طَمّاعين، و اليَعبُدو الأصنام، ديل ما عِندَهُم ميراث في مَلَكوت المَسيح و الله.

⁶ ما تَخَلّو أي زول يَغِشّكُم بِكِلمات بِدون فايدَه، عَلَشان بِسَبَب الحاجات دي، زَعل الله يَجي عَلى النّاس الما بِطيعُو.

⁷ عَشان كِدا ما تَشتَرِكو مَعاهُم.

⁸ عَلَشان إنتو كُنتو ضُلُمَّه مِن قُبّال، لَكِن هَسَّع إنتو نور في الرَّب. عيشو زي أولاد نور.

⁹ عَلَشان ثِمار الرّوح هو في كُلّو حاجَه طَيبَه و في بِر و في حَق.

¹⁰ جَرِّبو أن تَعرِفو الحاجَه التَّبسِط الرَّب.

¹¹ و ما تَكون ليكُم شَرِكَه مَعَ أعمال الضُّلُمَّه الما عِندَهُم ثِمار، لَكِن وَبِّخوها.

¹² عَشان دا عيب لَمّا نِتكَلَّم عَن الحاجات ديل الهُم بيَعمِلو بِالسِّر.

¹³ لَكِن كُل الحاجات اليَوَبِّخوها، يَظهَر بِالنّور. و كُلّو شي البِكون باين، يَبقى نور.

¹⁴ عَلَشان كِدا هو بِقول: ”أفتَح عُيونَك، إنتَ البِتنوم، و قوم مِن بين المَيِّتين، و المَسيح بِدّيك نور.“

¹⁵ شوفو بِالظَّبط كيف إنتو تَعيشو، مُش زي البَليدين لَكِن زي الفاهمين.

¹⁶ أعمِلو الأحسَن بِكُلّو فُرصَه، عَلَشان الأيام شَرّيرَه.

¹⁷ عَلَشان كِدا ما تَكونو بِدون حِكمَه، لَكِن أفهَمو شِنو إرادَة الله.

¹⁸ ما تَكونو سَكرانين بِالخَمر، البِقود لِلخَراب، لَكِن كونو مَليانين بِالرّوح.

¹⁹ و تِتكَلَّمو بَعضَكُم بَعض بِمَزامير و حَمد و تَرتيلات روحيَّه و تَرَتِّلو و تَعمِلو مُزيكا في قُلوبكُم لِلرَّب.

²⁰ و تَشكُرو كُلّو وَكِت لِكُلّو حاجَه لِلَّه الأبو، في إسم رَبَّنا يَسُوع المَسيح.

الزّوج و الزّوجَه

²¹ و تَطيعو بَعضَكُم لِبَعض في خوف الرَّب.

²² يا نِسوان، طيعو رُجالكُم زي لِلرَّب.

²³ عَشان الرّاجِل هو راس المَرَه، زي ما المَسيح كَمان راس الكَنيسَه، و هو مُخَلِّص الجِّسِم.

²⁴ عَلَشان كِدا، زي الكَنيسَه تَطيع المَسيح، كِدا النِّسوان يَطيعو رُجالُم في كُلّو شي.

²⁵ يا رُجال، حِبّو نِسوانكُم، زي المَسيح كَمان حَبَّ الكَنيسَه و أدّا نَفسو فِشانّا،

²⁶ عَشان يَقَدِّسا و يَنَضِّفا بِغَسيل المويَه بِالكِلمَه.

²⁷ عَشان يَقَدِّما لِنَفسو كَنيسَه مَجيدَه، ما فيها نُقطَه ولّا كَرمَش ولّا أي شي زي دا، و لَكِن تَكون مُقَدَّسَه و بِدون عيب.

²⁸ و كِدا، الرُّجال لازِم يَحِبّو نَسوانُم زي أجسامُم. البِحِب مَرَتو بِحِب نَفسو.

²⁹ عَشان ما في واحِد كِرِه جِسمو أبَداً، لَكِن يَدّيهو أكل و يَهتَم بيهو، زي المَسيح بيَعمِل فِشان الكَنيسَه.

³⁰ عَلَشان نِحنا أعضاء جِسمو.

³¹ بِالسَّبَب دا، الرّاجِل يَسيب بيت أبوهو و أُمّو و يَلَزِّق بِمَرَتو، و هُم الإتنين بِكونو جِسم واحِد.

³² دا سِر كَبير، لَكِن أنا بَتكَلَّم بِخُصوص المَسيح و الكَنيسَه.

³³ و لَكِن خَلّي كُلّو واحِد مِنَّكُم يَحِب مَرَتو زي نَفسو، و خَلّي المَرَه تَحتَرِم راجِلا.