أفَسُس 4 - كِتاب العَهد الجَّديد مِن الكِتاب المُقَدَّس

وَحدَة جِسم المَسيح

¹ عَلَشان كِدا، أنا، المَحبوس في الرَّب، بَطلُب ليكُم تَعيشو زي ما يِستَحِق الإختِيار الهو إختاركُم ليهو.

² كونو مِتواضِعين و لُطَفاء، و أصبُرو بَعضَكُم بَعض في المَحَبَّه.

³ و جَرِّبو تَكونو واحِد في الرّوح دايماً، مَربوطين سَوا بِرِباط السَّلام.

⁴ في جِسِم واحِد و روح واحِد، زي ما هو إختاركُم في رَجاء إختياركُم الواحِد.

⁵ في رَب واحِد، و إيمان واحِد، و مَعموديَّه واحدَه،

⁶ إلَه واحِد و أبو لِلكُل، و هو فوق الكُل، و يَشتَغِل في الكُل، و يَعيش في كُلُّنا.

⁷ و لَكِن هو أدّا لِكُلّو واحِد مِنَّنا النِّعمَه حَسَب قِياس هَديَّة المَسيح.

⁸ عَلَشان كِدا هو يَقول: ”لَمّا طَلَع لِفوق، هو أخَد مَعاهو مَحبوسين، و أدّا هَدايا لِلنّاس.“

⁹ ”هو طَلَع لِفوق،“ يَعني شِنو إلّا إنّو نَزَل كَمان لِمَحَلّات الأرض الفي تِحِت؟

¹⁰ الواحِد النَزَل، هو نَفس الواحِد الطَّلَع كَمان لِفوق السَّما كُلّو، عَشان يَملى الكُل.

¹¹ و هو أدّا البَعض يَكونو رُسُل، و البَعض، أنبياء، و البَعض، مُبَشِّرين، و البَعض، رُعاه و مُعَلِّمين.

¹² و هو عَمَل دا عَلَشان القِدِّسين يَكونو كاملين في شُغل الخِدمَه، عَشان يَبنو جِسِم المَسيح.

¹³ و هو بيَعمِل كِدا لِغايَة ما كُلُّنا بِنَجي لِوَحدَة الإيمان و مَعرِفَة إبن الله، لِإنسان كامِل، لِقِياس مَليان بِتاع كَمال المَسيح.

¹⁴ عَشان ما نَكون بَعَد دا أطفال. عَشان كُلّو هَبوب بِتَرمي الاطفال و بِتشيلُم هِنا و هِناك. و الهَبوب يَعني التَّعليم بِتاع النّاس الشّاطرين البِغِشّو بِمَكَرُم الغَلطان.

¹⁵ لَكِن نِتكَلَّم الحَق في المَحَبَّه عَشان نَكبَر في كُلّو حاجَه لِلرّاس، هو المَسيح.

¹⁶ و مِنّو كُل الجِّسِم بِكون مَربوط سَوا بِمُساعدَة كُلّو رُباط. و الجِّسِم يَكبَر و يَبني نَفسو في المَحَبَّه لَمّا كُلّو عُضو يَعمِل شُغلو.

أولاد النّور

¹⁷ و بَقول دا و أشهَد في الرَّب، ما تَعيشو بَعَد دا زي الأُمَم كَمان بِأفكار بِدون فايدَه.

¹⁸ و الفِكر بِتاعُم ضُلُمَّه، و هُم ما عِندَهُم جُزو في حَياة الله، عَلَشان ما عِندَهُم مَعرِفَه، بِسَبَب قُلوبُم القَوّيَّه.

¹⁹ هُم ما يَهتَمّو بِالخير و الشَّر، و سَلَّمو نُفوسُم لِلسَّفاهَه عَشان يَعمِلو كُلّو نَجاسَه في الطَّمَع.

²⁰ لَكِن إنتو ما إتعَلَّمتو كِدا عَن المَسيح،

²¹ إذا بِالحَق سِمِعتوها و إتعَلَّمتو مِنّو حَسَب الحَق الفي يَسُوع.

²² و بِخُصوص طَريق حَياتكُم المِن قُبّال، إنتو إتعَلَّمتو أن تَقلَعو مِنَّكُم النَّفس القَديمَه، الفيها خَراب بِسَبَب الشَّهوات البِغِشّو.

²³ و تَكونو جُداد في روح عَقِلكُم.

²⁴ و تَلبَسو النَفس الجَديدَه، الخَلَقا الله عَشان تَكون زيهو في البِر و القَداسَه المِن الحَق.

²⁵ عَلَشان كِدا، أرمو مِنَّكُم الكِضِب، و إتكَلَّمو الحَق كُلّو واحِد مَعَ جارو، عَلَشان نِحنا أعضاء بَعَضَنا مَعَ بَعض.

²⁶ أزعَلو و ما تَعمِلو خَطيَّه. ما تَخَلّو زَعلكُم يِستَنّى بَعَد المَغرِب.

²⁷ و ما تَدّو إبْلِيس فُرصَه.

²⁸ ما تَخَلّي الكان بِسرِق يَسرِق تاني مَرَّه. لَكِن خَليهو يَشتَغِل بِإيدينو حاجَه طَيبَه، عَشان بِكون عِندو حاجَه عَشان يَدّي لِلزّول العِندو إحتِياج.

²⁹ ما تَخَلّو كَلام بَطّال يَمرُق مِن خُشومكُم، لَكِن كَلام كوَيس البِساعِد، عَشان يَدّي نِعمَه لِلنّاس اليَسمَعو.

³⁰ ما تَعمِلو روح الله القُدّوس حَزنان، عَشان بيهو الله خَتَّ عَليكُم الخِتِم لِغايَة يوم الفِداء.

³¹ و شيلو مِنَّكُم كُلّو قَلب مُر، و زَعل، و غَضَب، و كوراك شَديد، و كُلّو مَكَر.

³² كونو شَفوقين بَعضَكُم بَعض، بِقَلِب رَحيم. و أغفِرو بَعضَكُم بَعض، زي ما الله فِشان المَسيح غَفَر ليكُم.