أفَسُس 3 - كِتاب العَهد الجَّديد مِن الكِتاب المُقَدَّس

بُولُس مُبَشِّر لِلأُمَم

¹ و بِالسَّبَب دا، أنا، بُولُس، مَحبوس المَسيح يَسُوع فِشانكُم، يا أُمَم.

² إذا سِمِعتو بِالحَق عَن تَرتيب نِعمَة الله، الهو أدّاهو لَي فِشانكُم.

³ كيف هو خَبَّرني بِرؤيا عَن السِّر، زي ما كَتَبتَ قُبّال دا بِكِلمات قَليلَه.

⁴ و لَمّا إنتو تَقرو دا، بِتَقدَرو تَفهَمو مَعرِفَتي في سِر المَسيح.

⁵ و ما خَبَّر بيهو لِلنّاس في زَمَن تاني زي ما وَرّاهو هَسَّع لِرُسُلو القِدِّسين و أنبياهو بِالرّوح.

⁶ و دا هو السِّر، إنّو الأُمَم يَشتَرِكو سَوا في الميراث، و هُم أعضاء سَوا في جِسِم واحِد. و يَشتَرِكو سَوا في الوَعَد في المَسيح يَسُوع بِالإنجيل.

⁷ أنا بِقيت خَدّام لِلإنجيل دا بِهَديَّة النِّعمَه الأدّاها لَي الله حَسَب عَمَل قُوَّتو.

⁸ و هو أدّا النِّعمَه دي لَي، و أنا أصغَر كُل القِدِّسين، عَشان أبَشِّر بين الأُمَم بِغِنى المَسيح الما نَقدَر نَفَسِّر بِالتَّمام.

⁹ و أوَرّي كُل النّاس شِنو تَرتيب السِّر دا، الكان مَدسوس مِن زَمان في الله، الخَلَق كُلّو شي.

¹⁰ عَلَشان حِكمَة الله المُختَلِفَه جِدّاً هَسَّع تَكون مَعروفَه لِلرّؤساء و السَّلاطين في المَحَلّات الفي السَّما. و الله بيَعمِل دا بِالكَنيسَه.

¹¹ و دا كان حَسَب التَّرتيب الأبَدي، الهو جَهَّزو في المَسيح يَسُوع رَبَّنا.

¹² و بيهو نَقدَر نَقَرِّب لِلَّه بِدون خوف و بِشَجاعَه بِإيمان فيهو.

¹³ عَلَشان كِدا بَطلُب مِنَّكُم ما تَكونو بِدون شَجاعَه بِسَبَب أتعابي فِشانكُم، عَشان دا لِمَجدكُم.

صَلاة عَشان ناس أفَسُس

¹⁴ بِالسَّبَب دا، أنا بَركَع عَلى رُكبتيني قِدّام الأبو،

¹⁵ المِنّو كُلّو أهل في السَّما و عَلى الأرض ياخُد إسمو.

¹⁶ أنا بَصَلّي عَشان هو بِدّيكُم حَسَب غِنى مَجدو عَلَشان تِتشَدَّدو بِالقُوَّه بِروحو جُوَّه نُفوسكُم،

¹⁷ عَشان المَسيح يَسكُن في قُلوبكُم بِالإيمان، عَلَشان عُروقكُم و أساسكُم بِكونو في المَحَبَّه،

¹⁸ حَتّى إنتو تَقدَرو تَفهَمو مَعَ كُل القِدِّسين كيف مَحَبَّة المَسيح واسِعَه و طَويلَه و عاليَه و غَريقَه.

¹⁹ و تَعرِفو مَحَبَّة المَسيح، الفوق المَعرِفَه، عَلَشان تَكونو مَليانين تَمام بِالله نَفسو.

²⁰ و لِلبِقدَر يَعمِل فوق كُلّو حاجَه زِيادَه جِدّاً مِن كُلّو شي النَطلُب ولّا نَفتَكِر، بِحَسَب القُوَّه التَّشتَغِل فينا،

²¹ ليهو المَجد في الكَنيسَه و في يَسُوع المَسيح لِلأبَد و لِلزَّمَن بِدون نِهايَه! آمين.