أفَسُس 2 - كِتاب العَهد الجَّديد مِن الكِتاب المُقَدَّس

مِن الموت لِلحَياة

¹ و إنتو كُنتو مَيِّتين بِالذُّنوب و الخَطايا.

² و إنتو مَشيتو فيها مِن قُبّال، حَسَب طُرُق الدُّنيا دي، حَسَب رَئيس سُلطَة الهَوا، الرّوح البِشتَغِل هَسَّع في النّاس الما بِطيعُو.

³ و كُلُّنا عِشنا بِينُم في الزَّمَن الفات في شَهوات جِسِمنا. و كُنّا بِنَعمِل إرادَة الجِّسم و الأفكار. و كُنّا بِالطَّبيعَه أولاد الغَضَب زي النّاس التّانيين كَمان.

⁴ لَكِن الله، عَلَشان هو حَبّانا بِمَحَبَّه عَظيمَه و هو غَني في الرَّحمَه،

⁵ عَمَلنا حَيين مَعَ المَسيح لَمّا كُنّا مَيِّتين بِالخَطايا. عَشان بِالنِّعمَه إنتو مُخَلَّصين.

⁶ و الله قَوَّمنا مَعَ المَسيح، و عَمَلنا نَقعُد مَعاهو في المَحَلّات الفي السَّما في المَسيح يَسُوع.

⁷ هو عَمَل دا عَشان يَوَرّي في الزَّمَن الجّاي، غِنى نِعمَتو الأكبَر بِرَحمَتو عَلينا في المَسيح يَسُوع.

⁸ عَلَشان بِالنِّعمَه إنتو مُخَلَّصين بِالإيمان. و داك مُش مِنَّكُم. هو هَديَّة الله،

⁹ مُش مِن أعمال، عَشان واحِد ما يَشكُر نَفسو.

¹⁰ عَلَشان نِحنا شُغل الله، و هو خَلَقنا في المَسيح يَسُوع عَشان نَعمِل أعمال كوَيسَه، الجَّهَّزا الله مِن قُبّال عَشان نَعمِلا.

واحِد في مَسيح

¹¹ عَلَشان كِدا، إتزَكَّرو إنتو كُنتو مِن قُبّال مِن الأُمَم حَسَب الجِّسِم. و اليَسَمّوهُم مُطَهَّرين بِدا المَعمول في الجِّسِم بِالإيدين، هُم يَسَمّوكُم ما مُطَهَّرين.

¹² عَشان إنتو كُنتو في الوَكِت داك بِدون المَسيح، غَريبين عَن أهل إِسْرَائِيل، غَريبين عَن إتِّفاقات الوَعَد، بِدون رَجاء و بِدون الله في الدُّنيا.

¹³ لَكِن هَسَّع في المَسيح، إنتو الكُنتو بَعيدين بِقيتو قَرِيبين بِدَم المَسيح.

¹⁴ عَشان هو سَلَامنا، و هو عَمَل اليَهود و الأُمَم واحِد. و كَسَّر الحيطَه الفي وَسِط. الكانَت تَقَسِّم بينَنا.

¹⁵ و في جِسمو بَطَّل العَداوَه، الكان في القانون مَعَ أوامِرو و تَرتيباتو. و هو عَمَل دا عَلَشان يَخلُق في نَفسو، مِن الإتنين واحِد إنسان جَديد، و كِدا بيَعمِل سَلام.

¹⁶ عَلَشان يَعمِل الإتنين أصحاب مَعَ الله في جِسِم واحِد بِالصَّليب. و بِالصَّليب، هو كَتَل العَداوَه بِينُم.

¹⁷ و هو جا و بَشَّركُم بِسَلام، ليكُم البَعيدين و القَريبين.

¹⁸ و بيهو، نِحنا الأتنين عِندَنا قُبول لِلأبو بِروح واحِد.

¹⁹ و عَلَشان كِدا، بَعَد دا إنتو مُش غَريبين و ناس مِن بَرَّه، لَكِن مُراح واحِد مَعَ القِدِّسين و أعضاء أهل بيت الله.

²⁰ و هو بَناكُم عَلى أساس الرُّسُل و الأنبياء، و يَسُوع المَسيح نَفسو، الحَجَر، الهو راس الرُّكن.

²¹ و فيهو كُل البُنا يَبني سَوا، و يَكبَر عَشان يَكون بيت مُقَدَّس في الرَّب.

²² و إنتو كَمان، هو يَبنيكُم سَوا فيهو عَشان تَكونو مَسكَن الله في الرّوح.