أفَسُس 1 - كِتاب العَهد الجَّديد مِن الكِتاب المُقَدَّس

¹ مِن بُولُس رَسول يَسُوع المَسيح بِإرادَة الله، لِلقِدِّسين الفي أفَسُس و المؤمِنين بِالمَسيح يَسُوع.

² نِعمَه ليكُم و سَلام مِن الله أبونا و الرَّب يَسُوع المَسيح.

البَرَكات الرّوحيَّه في المَسيح

³ مُبارَك الله أبو رَبَّنا يَسُوع المَسيح البارَكنا بِكُلّو بَرَكَه روحيَّه في المَحَلّات الفي السَّما في المَسيح.

⁴ عَشان هو إختارنا مِن قُبّال خَليقَة الدُّنيا عَشان نَكون قِدِّيسين و بِدون لوم قِدّامو.

⁵ و في المَحَبَّه، إختارنا مِن قُبّال عَشان يَعمِلنا أولاد لِنَفسو بِيَسُوع المَسيح، حَسَب فَرَحو و إرَادَتو.

⁶ عَشان نَحمِد مَجد نِعمَتو، الأدّاها لينا مَجّاناً في المَحبوب.

⁷ و فيهو عِندَنا الفِداء بِدَمّو، غُفران الخَطايا، بِحَسَب غِنى نِعمَتو.

⁸ و هو كَتَّر لينا نِعمَتو بِكُلّو حِكمَه و فَهم.

⁹ و هو فَهَّمنا سِر إرَادَتو حَسَب فَرَحو الجَّهَّزو في المَسيح.

¹⁰ و الله بِكَمِّل تَرتيبو لَمّا الزَّمَن يَكون تَمام، عَشان يَلِم كُلّو شي الفي السَّما و العَلى الأرض عَشان يَكون واحِد في المَسيح.

¹¹ و فيهو عِندَنا ميراث و هو إختارنا فيهو مِن قُبّال حَسَب تَرتيبو، هو اليَعمِل كُلّو شي زي فِكر إرَادَتو.

¹² عَلَشان نِحنا الفي الأوَّل خَتّينا رَجاءنا في المَسيح، نَكون لِحَمد مَجدو.

¹³ و إنتو كَمان إتَّكَلتو عَلى المَسيح لَمّا سِمِعتو كِلمَة الحَق، إنجيل خَلاصكُم. و لَمّا آمَنتو بيهو، الله خَتَّ عَليكُم خِتِم، الرّوح القُدُس، الوَعَد بيهو.

¹⁴ و هو عَربون ميراثنا لِفِداء مُلكو، لِحَمد مَجدو.

الشُّكر و الصَّلاه

¹⁵ عَلَشان كِدا، أنا كَمان لَمّا سِمِعتَ بِإيمانكُم بِالرَّب يَسُوع، و مَحَبَّتكُم لِكُل القِدِّسين،

¹⁶ ما بَطَّلتَ أَدِّي الشُّكر فِشانكُم و أتذَكَّركُم في صَلَواتي.

¹⁷ عَشان إلَه رَبَّنا يَسُوع المَسيح، أبو المَجد، يَدّيكُم روح الحِكمَه و رؤيا عَشان تَعرِفو مَعرِفَه كاملَه.

¹⁸ و بَصَلّي عَشان أفكاركُم بِكونو مَفتوحين لِنورو، عَلَشان تَعرِفو الرَّجاء الهو إختاركُم ليهو، و تَعرِفو غِنى مَجد ميراثو في القِدِّسين.

¹⁹ و بَصَلّي عَشانكُم تَعرِفو قُوَّتو الكَبيرَه لينا. و القُوَّه دي فوق كُلّو شي و بِتساعِدنا المؤمِنين.

²⁰ و دي نَفس القُوَّه الهو عَمَل في المَسيح لَمّا هو قَوَّمو مِن بين المَيِّتين، و أدّاهو الكُرسي عَن يَمينو في المَحَلّات الفي السَّما.

²¹ و هو فوق كُلّو رياسَه و سُلطَه و قُوَّه و مَملَكَه و كُلّو إسم البِدّوهو لِلنّاس، مُش في الزَّمَن دا بَس، لَكِن في الجّاي كَمان.

²² و الله خَتَّ كُلّو شي تِحِت كِرعينو، و عَمَلو راس فوق كُلّو شي لِلكَنيسَه.

²³ و الكَنيسَه جِسمو الإتمَلا بيهو، و هو اليَملى كُلّو شي في كُلّو مَكان.