كُولُوسِّي 4 - كِتاب العَهد الجَّديد مِن الكِتاب المُقَدَّس

¹ يا أسياد، أدّو لِلخَدّامين الشّي العَديل، و ما تَعمِلو فارِق بِينُم، عَشان إنتو بِتَعرِفو عِندَكُم سَيِّد في السَّما كَمان.

² إستَمِرّو في الصَّلاه، و أحرِسو فيها بِالشُّكر.

³ و صَلّو سَوا فِشانّا كَمان، عَشان الله يَفتَح لينا باب لِلكِلمَه، عَشان نِتكَلَّم بِسِر المَسيح. و بِالسَّبَب دا أنا مَربوط بِجَنازِير.

⁴ صَلّو عَشان أبَشِّر بِكَلام باين زي ما لازِم أتكَلَّم.

⁵ عيشو بِحكمَه مِن جِهَة النّاس المِن بَرَّه، و إشتَغِلو كوَيس بِكُلّو فُرصَه.

⁶ خَلّو كَلامكُم دايماً يَكون بِنِعمَه، زي الأكل الفيهو مِلِح، عَلَشان تَعرِفو كيف تَرُدّو كوَيس عَلى كُلّو واحِد.

السَّلامات

⁷ تِيخِيكُس بِخَبِّركُم عَن أحوالي كُلَّها. هو أخو مَحبوب و خَدّام أمين و خَدّام مَعانا في الرَّب.

⁸ و أنا رَسَّلتو ليكُم لِلسَّبَب دا نَفسو، عَشان إنتو بِتَعرِفو عَن أحوالنا و عَشان هو يَعَزي قُلوبكُم.

⁹ و هو بِجي مَعَ أُونِسِيمُوس، الأخو الأمين، المَحبوب، و هو واحِد مِنَّكُم. و هُم بِخَبِّروكُم بِكُل الحَصَل هِنا.

¹⁰ وَأَرِسْتَرْخُس، المَحبوس مَعاي، يَسَلِّم عَليكُم، و مَرْقُس كَمان و هو إبن أُخُت بَرْنَابَا. و إنتو قِبِلتو أوامِر عَنّو، و إذا جا ليكُم، أقبَلوهو.

¹¹ و يَسُوع، الإسمو يُستُس، يَسَلِّم عَليكُم. و مِن المُطَهَّرين، ديل بَس بِشتَغِلو مَعاي لِمَلَكوت الله. و هُم بِقو تَعزيَه لَي.

¹² و أَبَفْرَاس يَسَلِّم عَليكُم، و هو مِنَّكُم، و خَدّام يَسُوع المَسيح. هو دايماً بِصَلّي بِكُلّو قُوَّتو فِشانكُم، عَلَشان تَثبُتو كامِلين و بِتأكيد تَمام في كُلّو إرادَة الله.

¹³ و أنا أشهَد ليهو إنّو يَتعَب كَتير فِشانكُم و فِشان النّاس الفي لاوُدِكِيَّةَ و النّاس الفي هِيرَابُولِيس.

¹⁴ لُوقَا، الحَكيم المَحبوب، يَسَلِّم عَليكُم، و ديماس كَمان.

¹⁵ سَلِّمو عَلى الأخوان الفي لاوُدِكِيَّةَ، و عَلى نِمفا و عَلى الكَنيسَه في بيتا.

¹⁶ و لَمّا هُم قَرو ليكُم الجَّواب دا، شوفو إنَّهُم يَقروهو في كَنيسَة ناس لاوُدِكِيَّةَ كَمان. و إنتو كَمان أقرو الجَّواب مِن لاوُدِكِيَّةَ.

¹⁷ و قولو لِلأَرْخِبُّس: ”شوف الخِدمَه الأنتَ قِبِلتا مِن الرَّب، عَشان تَكَمِّلا.“

¹⁸ أنا، بُولُس، أكتِب السَّلام دا بِإيدي. إتزَكَّرو جَنازِيري. النِّعمَه مَعاكُم.