كُولُوسِّي 3 - كِتاب العَهد الجَّديد مِن الكِتاب المُقَدَّس

الحَياة القَديمَه و الجَديدَه

¹ عَلَشان كِدا، إذا إنتو قُمتو مَعَ المَسيح، أطلُبو الحاجات الفي فوق، المَكان الفيهو المَسيح قاعِد عَن يَمين الله.

² خُتّو بالكُم في الحاجات الفي فوق، و مُش عَلى الحاجات بِتاعَت الأرض.

³ عَشان إنتو مُتّو، و حَياتكُم مَدسوسَه مَعَ المَسيح في الله.

⁴ لَمّا المَسيح حَياتنا يَظهَر، في الوَكِت دا إنتو كَمان تَظهَرو مَعاهو في المَجد.

⁵ عَلَشان كِدا، أكتُلو كُلّو حاجَه فيكُم البِتكون مِن الأرض: الزِّنا، و النَّجاسَه، و الشَّهوَه الشَّديدَه، و الشَّهوات البَطّالَه، و الطَّمَع، يَعني عِبادَة الأصنام.

⁶ و عَلَشان الحاجات ديل، زَعل الله بِجي عَلى النّاس الما بِطيعُو.

⁷ و إنتو كُنتو بِتَمشو قُبّال دا في الطُّرُق دي لَمّا كُنتو بِتعيشو فيها.

⁸ لَكِن هَسَّع، أرمو مِنَّكُم كَمان كُلّو ديل: الزَّعل، و الغَضَب، و قَلب مُر، و التَّجديف، و الكَلام الوَسخان مِن خُشومكُم.

⁹ و ما تَكَضِّبو بَعضَكُم عَلى بَعض، عَلَشانكُم قَلَعتو الإنسان القَديم مَعَ أعمالو.

¹⁰ و لِبِستو الإنسان الجَّديد، المِتجَدِّد في المَعرِفَه عَلى صورَة الله الخَلَقو.

¹¹ هِنا ما في إغريقي ولّا يَهودي، ولّا طَهور ولّا ما طَهور، ولّا غَريب ولّا سِكِّيثِي، ولّا عَبد ولّا حُر. لَكِن المَسيح هو الكُل و هو في الكُل.

¹² عَلَشان كِدا، زي النّاس الإختارُم الله، القِدِّسين، المَحبوبين، لَبِّسو القَلِب الرَّحيم و اللُطف و التَّواضُع و الوَداعَه و الصَّبر الطَّويل.

¹³ أصبُرو بَعضَكُم بَعض، و أغفِرو بَعضَكُم بَعض إذا كان واحِد عِندو شَكوى عَلى تاني. أغفِرو زي ما الرَّب غَفَر ليكُم.

¹⁴ و فوق دا كُلّو، لَبِّسو المَحَبَّه، الهي رُباط الكَمال.

¹⁵ و خَلّو سَلام المَسيح يَملِك في قُلوبكُم، عَلَشان هو ناداكُم لِدا في جِسِم واحِد. و كونو شاكِرين.

¹⁶ خَلّو كِلمَة المَسيح تَعيش فيكُم بِكَترَه، و إنتو تَعَلِّمو و تَهَظِّرو بَعضَكُم بَعض بِكُلّو حِكمَه. و تَرَتِّلو بِمَزامير و تَرتيلات و حَمد روحي، و تَشكُرو الله في قُلوبكُم.

¹⁷ و كُل البِتَعمِلو، إذا بِكِلمَه ولّا عَمَل، أعمِلو الكُل بِإسم الرَّب يَسُوع، شاكِرين الله الأبو بيهو.

تَعليم لِأهل البيت

¹⁸ يا نِسوان، طيعو رُجالكُم، زي ما يِستَحِق في الرَّب.

¹⁹ يا رُجال، حِبّو نِسوانكُم، و ما تَكونو شُداد مَعاهُم.

²⁰ يا أولاد، طيعو والِديكُم في كُلّو حاجَه، عَشان دا يَبسِط الرَّب.

²¹ يا أبَهات، ما تَعمِلو أولادكُم مَليانين زَعل، عَلَشان يِمكِن هُم بِكونو بِدون شَجاعَه.

²² يا خَدّامين، طيعو أسيادكُم حَسَب الجِّسِم في كُلّو حاجَه. و أعمِلو كِدا مُش لَمّا هُم يَعاينو ليكُم بَس عَشان تَبسِطوهُم. لَكِن إشتَغِلو بِإخلاص القَلِب و مِن خوف لِلرَّب.

²³ و كُل البِتَعمِلو، أعمِلوهو مِن القَلِب زي لِلرَّب، مُش لِلنّاس.

²⁴ عَلَشان إنتو تَعرِفو أنَّكُم بِتاخدو ميراث مِن الرَّب زي أُجرَه، عَشان إنتو بِتَخدِمو الرَّب المَسيح.

²⁵ و أي واحِد العَمَل الذَّنب، هو بِرَجِّع ليهو زي ما هو عَمَل. و ما في فارِق بين النّاس.