كُولُوسِّي 2 - كِتاب العَهد الجَّديد مِن الكِتاب المُقَدَّس

¹ أنا عاوِزكُم تَعرِفو كيف أنا بَشتَغِل شَديد خَلاص عَلَشانكُم، و عَلَشان ديل الفي لاوُدِكِيَّة، و كُل الما شافو وَشّي في الجِّسِم.

² أنا بَعمِل دا عَلَشان قُلوبُم يِتعَزّو و بِكونو واحِد في المَحَبَّه، و بِكونو عِندَهُم كُلّو غِنى بِتاع تأكيد الفَهم. و عَلَشان كِدا يَعرِفو سِر الله، و هو المَسيح.

³ و كُلّو كُنوز الحِكمَه و المَعرِفَه مَدسوسَه فيهو.

⁴ بَقول دا ليكُم عَشان واحِد ما بِغِشّكُم بِكَلام شاطِر.

⁵ و لَو أنا مُش مَعاكُم في الجِّسِم، أنا مَعاكُم بِالرّوح، و مَبسوط عَشان أشوف تَرتيبكُم و كيف إيمانكُم ثابِت في المَسيح.

⁶ عَلَشان كِدا، زي ما قِبِلتو المَسيح يَسُوع الرَّب، عيشو فيهو،

⁷ و خَلّو عُروقكُم يَكونو فيهو، و أبنو نُفوسكُم فيهو. و كونو ثابِتين في الإيمان، زي ما عَلَّموكُم، و زيدو في الشُّكر.

الحُرّيَّه الفي المَسيح

⁸ خَلّو بالكُم عَلَشان أي واحِد ما يَغِشّكُم بِتَعليم حِكمَة الإنسان و الغِش الفاضي حَسَب تَرتيب النّاس، حَسَب التَّعليم الأساسي بِتاع الدُّنيا، و مُش حَسَب المَسيح.

⁹ عَشان في المَسيح كُلّو كَمال الله يَعيش في شَكل الجِّسِم.

¹⁰ و إنتو بِقيتو مَليانين فيهو. و هو راس كُلّو رياسَه و سُلطَه.

¹¹ و فيهو طَهَّروكُم بِطَهور مُش مَعمول بِإيد النّاس. بِطَهور المَسيح، بِقيتو حُرّين مِن طَبيعَة الخَطيَّه بِتاعَتكُم.

¹² دَفَنوكُم مَعاهو في المَعموديَّه، و قَوَّموكُم مَعاهو كَمان بِالإيمان بِعَمَل الله القَوَّمو مِن بين المَيِّتين.

¹³ لَمّا كُنتو مَيِّتين في الخَطايا و جِسِمكُم ما كان مُطَهَّر، الله عَمَلكُم حَيين مَعاهو. هو غَفَر لينا كُلّو خَطايانا.

¹⁴ و هو بَطَّل الدّين المَكتوب عَلينا في القَوانين الضِّدَّنا. و هو رَفَعو مِن الوَسِط و سَمَّرو عَلى الصَّليب.

¹⁵ و هو خَرَّب القُوّات و السَّلاطين، و عَمَلُم مَثَل قِدّام كُل النّاس، و غَلَب عَليهُم في الصَّليب.

¹⁶ عَلَشان كِدا، ما تَخَلّو أي واحِد يَحكُم عَليكُم في الأكِل ولّا الشُّرُب، ولّا عَن عيد ولّا شَهَر جَديد ولّا سَبِت.

¹⁷ ديل ضُل الحاجات الجّايَه، لَكِن الحَق، هو المَسيح.

¹⁸ ما تَخَلّو واحِد يَحكُم عَليكُم عَشان هو مَبسوط مِن التَّواضُع و الحَمد لِلمَلائكَه. الزّول زي دا يتكَلَّم كَتير عَن الحاجات الهو شافا. و عَقلو المُش روحي يَحمِد نَفسو بِأفكار بِدون فايدَه.

¹⁹ و هو ما ماسِك بِالمَسيح الرّاس. و كُل الجِّسِم مَربوط سَوا في المَسيح بِرُباطو و مَفاصِلو. و الجِّسِم يَكبَر زي ما الله يَعمِلو يَكبَر.

²⁰ إذا كُنتو مُتّو مَعَ المَسيح عَن التَّعليم الأساسي بِتاع الدُّنيا، لِشِنو تَطيعو قَوانينو زي البِعيشو في الدُّنيا؟

²¹ ”ما تَلمَس! ما تَاكُل! ما تَمسِك!“

²² و كُل الحاجات ديل بِخسَرو لَمّا يَشتَغِلو بيهُم حَسَب أوامِر و تَعاليم النّاس.

²³ و الحاجات ديل عِندَهُم مَنظَر الحِكمَه في العِبادَه بِقوَّة النَّفس و التَّواضُع و شِدَّه لِلجِّسِم، لَكِن ما في فايدَه مِنَّهُم أبَداً عَشان يَمنَعو شَهوات الجِّسِم.