أعمال الرُّسُل 9 - كِتاب العَهد الجَّديد مِن الكِتاب المُقَدَّس

إختِيار و خَلاص شَاوُل

¹ لَكِن شَاوُل كان لِسَّع يتكَلَّم تَهديد، و كَلام كَتَل ضِد تَلاميذ الرَّب. و هو مَشى لِرَئيس القُسُس.

² و طَلَب مِنّو جَوابات لِبِيوت الرَّب بِتاعَت اليَهود في دِمَشق، عَشان إذا لِقى ناس الطَّريق، رُجال و نِسوان، بِسوقُم مَربوطين لِأُورُشَلِيم.

³ و في سَفَرو، لَمّا قَرَّب مِن دِمَشق، طَوّالي إتنَوَّر قِدّامو نور مِن السَّما.

⁴ و وَقَع عَلى الأرض، و سِمِع صوت يَقول ليهو: ”يا شَاوُل، يا شَاوُل، لِشِنو بِتَطرُدني؟“

⁵ و شَاوُل قال: ”إنتَ مِنو، يا سَيِّد؟“ و قال: ”أنا يَسُوع الأنتَ بِتَطرُدو.

⁶ قوم و أدخُل المَدينَه، و بِقولو ليك اللازِم تَعمِلو.“

⁷ و الرُّجال المِسافِرِين مَعاهو وَقَفو ساكِتين، عَشان سِمِعو الصّوت، لَكِن ما شافو زول.

⁸ و شَاوُل قام مِن الأرض، و لَمَّن فَتَح عُيونو، ما قِدِر يَشوف حاجَه. و قادوهو بِإيدو، و جابوهو لِدِمَشق.

⁹ و قَعَد تلاتَه أيام و ما شاف، و ما أكَل، و ما شِرِب.

¹⁰ و كان في دِمَشق تِلميذ إسمو حَنانيّا. و الرَّب قال ليهو في رؤيا: ”يا حَنانيّا!“ و هو قال: ”أهو أنا، يا رَب!“

¹¹ و الرَّب قال ليهو: ”قوم و أمشي لِشارِع إسمو الدُّغري، و أسأل في بيت يَهُوذَا عَن راجِل مِن طَرْسُوس إسمو شَاوُل. و شوف! هو قاعِد بِصَلّي.

¹² و شاف في رؤيا راجِل إسمو حَنانيّا بِدخُل و بِخُت إيدينو فوقو، عَشان يَفتَح عُيونو، عَشان يَشوف.“

¹³ و لَكِن حَنانيّا رَدَّ و قال: ”يا رَب، سِمِعتَ مِن كَتيرين عَن الرّاجِل دا، بِكُل الحاجات البَطّالَه الهو عَمَل لِقِدِّسينَك في أُورُشَلِيم.

¹⁴ و كَمان عِندو إذِن مِن القُسُس الكُبار عَشان يَجي هِنا و يَقبُض كُل البِنادو بِإسمَك.“

¹⁵ لَكِن الرَّب قال ليهو: ”أمشي، عَشان هو بُرمَه مُختارَه لِيَشيل إسمي قِدّام الأُمَم و المُلوك و بَني إِسْرَائِيل.

¹⁶ و أنا بَوَرّيهو كَم لازِم يِتوَجَّع عَشان إسمي.“

¹⁷ و حَنانيّا مَرَق و دَخَل البيت، و خَتَّ إيدينو فوقو و قال: ”يا أخي شَاوُل، الرَّب يَسُوع الظَّهَر ليك في السِّكَّه في الوَكِت الأنتَ جاي هِنا، هو رَسَّلني عَشان عُيونَك بِتكون مَفتوحَه، و إنتَ بِتكون مَليان بِالرّوح.“

¹⁸ و في الوَكِت دا، وَقَع مِن عُيونو حاجَه زي قِشِر، و قِدِر يَشوف مَرَّه تانيَه. و قام و إتعَمَّد.

¹⁹ و أكَل و بِقى شَديد. و قَعَد مَعَ التَّلاميذ الفي دِمَشق أيام قَليلَه.

²⁰ و طَوّالي إبتَدا يَبَشِّر في بِيوت الرَّب بِيَسُوع إنّو إبن الله.

²¹ و كُل السِّمِعوهو إتعَجَّبو و قالو: ”دا هو الكان بِكتُل في أُورُشَلِيم البِنادو بِالإسِم دا؟ و هو جا هِنا عَشان يَسوقُم مَربوطين لِلقُسُس الكُبار.“

²² لَكِن شَاوُل كان بِزيد في قُوَّه، و يَحَيّير اليَهود السّاكنين في دِمَشق، و يَثَبِّت إنّو دا هو المَسيح.

²³ و لَمّا تَمَّت أيام كَتيرَه، اليَهود إتَّفَقو بِالسِّر عَلَشان يَكتُلوهو.

²⁴ و لَكِن شَاوُل عِرِف السِّر بِتاعُم. و هُم كانو بِحرُسو الأبواب ليل و نَهار عَشان يَكتُلوهو.

²⁵ و تَلاميذو أخَدوهو في اللّيل و نَزَّلوهو مِن الحيطَه في قُفَّه.

²⁶ و لَمّا جا لِأُورُشَلِيم، جَرَّب يَجتَمِعو مَعَ التَّلاميذ. لَكِن كُلُّهُم كانو بِخافو مِنّو، و ما صَدَّقو هو تِلميذ.

²⁷ لَكِن بَرْنَابَا اَخَدو و جابو لِلرُّسُل، و حَكى ليهُم كيف شَاوُل شاف الرَّب في السِّكَّه، و إنّو الرَّب كَلَّمو، و كيف بَشَّر بِإسم يَسُوع في دِمَشق بِدون خوف.

²⁸ و شَاوُل كان بِدخُل و بِمرُق مَعاهُم في أُورُشَلِيم، و بِبَشِّر بِإسم الرَّب بِدون خوف.

²⁹ و كان بِتكَلَّم و بِتفاكَر اليَهود الكانو مِن ناس إغريقيين، لَكِن هُم جَرَّبو يَكتُلوهو.

³⁰ و لَمّا الأخوان عِرفو دا، جابوهو لِقَيْصَرِيَّه، و رَسَّلَوهو لِطَرْسُوس.

إينياس و طابيثا

³¹ و كِدا، ناس الكَنيسَه في كُل اليَهُودِيَّه و الجَّليل و السَّامِرَه كان عِندَهُم سَلام و بِقو شُداد. و كانو يَخافو الرَّب، و عِندَهُم تَعزيَه في الرّوح القُدُس، و كانو يَزيدو في العَدَد.

³² و لَمّا بُطْرُس كان بِسافِر في البِلاد دي كُلّو، هو مَشى كَمان لِلقِدِّسين السّاكنين في لُدَّه.

³³ و لِقى هِناك راجِل مَفلوج إسمو إينياس، كان راقِد عَلى عَنقَرِيبو مِن مُدَّة تَمانيَه سِنين.

³⁴ و بُطْرُس قال ليهو: ”يا إينياس، يَسُوع المَسيح يَشفيك. قوم، و فَرِّش عَنقَرِيبَك.“ و هو قام طَوّالي.

³⁵ و كُل السّاكنين في لُدَّه و ساروون شافوهو و رَجَعو لِلرَّب.

³⁶ و كانَت في يَافَا تِلمِيذَه إسِما طابيثا، و مَعناهو غَزالَه. و هي كانَت مَليانَه بِالأعمال الطَّيبَه، و كانَت بِتساعِد المَساكين.

³⁷ و حَصَل في الأيام ديلاك، هي بِقَت عَيّانَه و ماتَت. و غَسَّلوها و خَتّوها في أوضَه في فوق.

³⁸ و لُدَّه كانَت قَريبَه مِن يَافَا. و التَّلاميذ سِمِعو بُطْرُس كان في لُدَّه. و هُم رَسَّلو ليهو راجلين و سألوهو كَتير و قالو: ”مِن فَضلَك، تَعال قَوام.“

³⁹ و بُطْرُس قام و مَشى مَعاهُم. و لَمّا وِصِل، طَلَعو بيهو لِلأوضَه الفي فوق. و كُل الأرامِل وَقَفو يَبكو، و يَوَرّوهو التّيبان و الهِدوم طابيثا كانَت بِتَعمِلا و هي مَعاهُم.

⁴⁰ و بُطْرُس مَرَّق كُلُّهُم بَرَّه و رَكَع عَلى رُكبَتيهو و صَلّى. و بَعَد دا، إتلَفَت لِلجِّسِم و قال: ”يا طابيثا، قومي.“ و هي فَتَحَت عُيونا، و لَمّا شافَت بُطْرُس، قَعَدت.

⁴¹ و هو أخَدا بِإيدا و رَفَعا، و نادى القِدِّسين و الأرامِل، و قَدَّما ليهُم حَيَّه.

⁴² و الخَبَر مَشى في كُلّو يَافَا، و كَتيرين آمَنو بِالرَّب.

⁴³ و بُطْرُس قَعَد في يَافَا أيام كَتيرَه مَعَ راجِل بِشتَغِل في الجُّلود، إسمو سِمْعَان.